[1] Kamalda bal, aacchiheenki Aburaaham layadeeh ayta ka mehe isabche?
[2] Chirri rumanka Waakh wihi Aburaaham yeele ka usu eti fissan iekkaache, wihi us keeylajo a khaba gon. I'daasenyi Waakh ortiis ka, Aburaaham walah us yeele us keeylajo mele.
[3] Chiirnaanneti Waakh mehe kachiiran? “Aburaaham wihi Waakh yidahye rummeeste, Waakh la usu eti fissan iekkaache.”
[4] Wihi inno garanni, eti hil haaggicho a laguta. Toro la wihi laguto wihi liisoomure menye, a wihi usu mu'dan.
[5] I'daasenyi weeli enenyet jeenteti wihi us haaggicho menye, jeenteti us Waakkhi 'doo'di uskeel leh 'doo'di fiffissan iekkaacho ikakhuufo, iche Waakh eti fissan iekkaacha.
[6] Saggaas on u karnati Dawuud layadeeh, eti rumanka Waakh imaale eti fissan iekkaacho a cheeke. Eti i'dee jeenteti holi us dowo mee Waakh eti fissan iekkaacho. Wihi us essi la kallaayo,
[7] “Eti Waakh imaale a ki Waakh hugun'darritiis ikakute, toro uskeeliis hiyyaaye!
[8] Eti Waakh imaale la a ki Kamur jirtuu uskeeliis iekkaan!”
[9] Kamalda bal, 'doo'di Waakh imaale a ki yaafohi Ya'huude khandiiti kalday a, bal ki yaafohi Ya'huud ieheynane ikhandiyan laka? Wihi inno elanne a mehe ya, Aburaaham jeenteti us Waakh ikakhuufe, iche Waakh usu eti fissan iekkaache.
[10] Kakhuufnaanki Aburaaham Waakh kakhuufo la maantoh sagga liikeekkaache? Geeddi Aburaaham liikhandiyin a, bal inkoo lakhandiye yimiy? Waakh Aburaaham inkoo lakhandiye menye, geeddi liikhandiyine eti fissan iekkaache.
[11] Sumatti Aburaaham khandi ka lasunte mehe tussa ya, geeddi liikhandiyin on Waakh usu eti fissan iekkaache, jeenteti us Waakh ikakhuufo on u. Aburaaham 'deerka a i'doo us ooyohi 'doo'di Waakh kakhuufo yitah chi'icho liikhandiyin laka. I'di Aburaaham u jeenteti icho Waakh ikakhuufaan, iche Waakh 'doo'di fiffissan iekkaacha.
[12] Aburaaham la toro i'doo ka a ooyohi 'doo'di khandihi lakhandiiti kalday on menye, i'daasenyi a ki lakhandiye toro la dabat aacchiheenki Aburaaham layadeehe Waakh kakhuufe raaho.
[13] Wihi inno garanni, Waakh goorat Aburaaham ichoow nyaakhut nyaakhut Aburaaham ayyinti us igooche a mehe ya, harra tuummane dalhaan. Aburaaham jeenteti us amurre Muusa iraaho ayyinta ma i'heline, i'daasenyi jeenteti us Waakh ikakhuufe usu eti fissan liiekkaache, iche Waakh ayyinta igooche.
[14] A mehe chi' ayyinti Waakh gooche eti amurretaas raaho kalday dalho, kakhuufnaanki weeli enenyet Waakh kakhuufo walah us yahe mele gone, ayyinti Waakh enenyet igooche laka walah iche tahe mele gon.
[15] I'di tahe amurre Muusa holi Waakh on keenta. A mehe chirri amurretaas ijirin, amurre lajebcho mele gon.
[16] Maantaka ayyinti Waakh 'doo'diis igooche, 'doo'di usu kakhuufo on 'hela 'dee haaggi Waakhe buure ka nyaakhut nyaakhut Aburaaham tuumman i'daanu rumanka lasiicha. Ayyintaas la nahi amurre Muusa raahno kalday menye, 'doo'di tuummane saggi Aburaaham Waakh ikakhuufe Waakh ikakhuufo laka a miinsantahe. Jita ka Aburaaham a ooyohi inno tuummane,
[17] i'di liichiiruu, “An ooyohi yaafohi ittaawenye kaayeele.” Aburaaham Waakh ortiis ka a ooyoheenna. Waakkha us rummeeste a Waakkhi enenyet omoot kasookahcho toro la wihi goorat nolol ikhabin noolaacho.
[18] Aburaaham chirri us khajjeel waaye laka, us Waakh on rummeeste toro khajjeel kakhabe. Waakh 'deerka usu ooyohi yaafohi ittaawe kayeele i'di Kamur usu iyidah u, “Nyaakhut nyaakhutaah 'deerka a ittaawa.”
[19] Geedda ka Aburaaham a araarrowe, sartiis la a i'doo iche tumuy, i'di tahe us geeddi gu'h kudoo a eleele. Toro la arantiisti Saara layadeeh a mahan. Chu'us waha dakkhan kamasse laka, kakhuufnaanki us Waakh kakhuufo ma ka'harin ba.
[20] Aburaaham injire ayyinti Waakhe us rummeesti ka uurlammaal ma khabin. I'daasenyi kakhuufnaanki us Waakh kakhuufo ka a miigowe, toro la Waakh koolo ikeene.
[21] I'di tahe wihi us tissibo a mehe ya, Waakh ayyinti us enenyet igooche tuumman buuhin a yabuu'd.
[22] Jeentetaase, “Waakh Aburaaham eti fissan iekkaache.”
[23] Toollaka ayta chiirane, “Waakh Aburaaham eti fissan iekkaache,” tadeeh, Aburaaham kalday mee ichiirantahe.
[24] I'daasenyi ayta inno laka a inno ichiirantahe. Chi'inno Waakkhi Yeessohi Kamureene omoot kasookahche inno rummeysanni, Waakh inno laka 'doo'di fiffissane inno iekkaacha.
[25] Waakh Yeesso a soodiibe, jeenteti uskeeleen iyumuyye, Waakh la usu omoot kasookahche, 'dee Waakh 'doo'di fiffissan inno iekkaacha.