[1] Maantaka innohi kakhuufnaanki inno Waakh kakhuufno ka miige, 'doo'di kakhuufnaanki us Waakh kakhuufo ka 'dabakhe igarrahsanni, a mehe wihi icho yeelaan ichoow kakhuufnaanki icho Waakh kakhuufaan ma israahaan. Toro la uus inno awteenna on ishamaadin gi'de.
[2] Eteemba 'doo'd Kiriisto a kahamaadicho, wihi haaggan a iyeelo, 'dee rubeyohicho a disno.
[3] A mehe Kiriisto rubeytiis ma iskahamaadin. I'daasenyi wihi chiiran, “Okkhoow abaari 'doo'd kileeabaarramo ani isookute.”
[4] Wihi dakkhane goorat Chiirnaanneti Waakh goya lakachiire walahe inno abchaane, 'dee Chiirnaannetaas ka garrahsi 'hella, uur inno miigowa, toro la khajjeel khabna.
[5] Waakkhi garrahsi lehe enenyet uur miigoocho ba, dabat Yeesso Kiriistoki atin raahtaan ka maloo kalday atin siicha,
[6] 'dee atin tuumman hooyoo kalday ka Waakkhi Yeesso Kiriistohi Kamureene Waakkhiisenye toro la Aabbahiise saa'ddaan.
[7] Taba gi'de, saggi Kiriisto atin ikhaattuu, saggaas isikhaadda, 'dee enenyet Waakh a saa'do.
[8] A mehe wihi an atin icheeko, Kiriisto falfati yaafohi Ya'huude khandiiti iche yitah. Falfatichoti us yitah ka la, saggi Waakh liikakhuufo us ayyinti us aacchinyeteenti oraat igooche irummaache iche tusa.
[9] Kiriisto la a yimiyye 'dee yaafohi Ya'huud ieheynan Waakh saa'daan jeenteti us enenyet uur ikasoonugleestuu. I'di liichiiruu, “Maantaka an 'doo'di yaafohi Ya'huud ieheynan goyaka a kikoolicha, geeyo ka magahaah a saa'da.”
[10] Toro la mehe tadeeh ya, “Taba gi'de, atinhi yaafohi Ya'huud ieheynan 'doo'daas Waakh ikhaya hamaada.”
[11] Toro la, “Atinhi yaafohi Ya'huud ieheynan tuumman taba, Kamur koolicha. Weeli enenyet tuumman Waakh a saa'do.”
[12] Toro la, wihi Isaaya yidahye Kiriisto miinsan kallaayo, “Eti hiiy Yeessee a yamiite, ulla 'doo'di yaafohi Ya'huud ieheynane dakhta. Icho la usu khajjeel kakhabaan.”
[13] Waakkhi khajjeel leh ba, kakhuufnaanki atin usu kakhuuftaan ka, hamaad tuumman ichoow nebey ba atin kahida, 'dee miigti Rubeyti Munyee atin siisso ka, khajjeeliin weyti buuraata.
[14] 'Doo'd Kiriistokaaw, ani rubeyteey saggi wihi hahhaaggan atin ibuuhaane, wihi 'doo'd Kiriisto miinsan tuum igarattaane toro la iswaanin itabuu'diin a tissiba.
[15] I'daasenyi jeenteti haaggi Waakhe buurenye liisiichuu, roorro laan a atin isoochiire 'dee wahanyeyyohoo atin kasoo'helcha.
[16] I'di tahe an a falfa Yeesso Kiriisto, 'doo'di yaafohi Ya'huud ieheynane liisooerge. An hili kuhaani haaggicha, Wori Haaggane Waakh iche cheeka, 'dee 'doo'da i'di soorriyoti Waakh kahamaado Rubeyti Munyee munyaasse yateeh.
[17] Maantaka, jeenteti ani ichoow Yeesso Kiriisto ba wohoo kalday inahuu, hili an Waakh ihaaggicho ka a geeddi an eylajo.
[18] Wihi Kiriisto ikahaagsate on menye, walah addane an kaayyeedo mele. I'da ka yeedeey ichoow jiroteey ka 'doo'di yaafohi Ya'huud ieheynan a woya ayti Waakh raahaan.
[19] Ulla miigti Rubeyti Munyee ka wahanyeyyohi miigti Waakh tuso ichoow wihi weeli enenyet yeelin iubaa'dan ba yeele, icho Waakh iwoye. I'daas ka la ani Wori Haaggane Kiriisto miinsan tuume cheeke. Ilkerengeetti weene Yeerusaleeme kasookhabde ichoowka ili Iliriiko eleeliche.
[20] Wihi kol dakkhan uur i'doono a mehe ya, a anihi Wori Haaggan inti magah Kiriisto injire liikadaagin ka cheeko. I'da ka daddaabohi ilaate etoo addan dise sarche ma kadisdi.
[21] Mele, i'di liichiiruu, “'Doo'di injire farniinkiis liikacheekin usu a arga, ki injire woriis idaagin la a abta.”
[22] Jeenteti an meelassaas Wori Haaggan ikacheekuu, wahaase kolassi ittaawe saggi an atin isoo'daaro itirte.
[23] I'daasenyi toolla an hileey meelassaas ka massiche la, geeddi deere atin sooargin 'doone gone,
[24] mali an khabo a mehe ya, maanti an ili Isbaaniya isohdi a atin soo'daara. Khajjeeli an khabo a ki an atin leeamiite, 'dee atin luhlo iyeessaan. Waha la a inkoo an geeddoo atin leebarye, inno isleehamaane.
[25] I'daasenyi toolla rubeyche ilkerengeetti weene Yeerusaleeme isohda, 'doo'di Waakhe ilaas kajiro wihi lasoobaayiche igeechaa.
[26] I'di tahe urur Kiriistoki boroofenhi Makedooniya ichoow ki Akhaaya ba, baaysihi icho 'doo'di Waakhe miskiinenye ilkerengeetti weene Yeerusaleem kagargaaraan a soobaayicheen.
[27] Icho hamaad on ka baaysihaas diibeen. Icho rumanka moge khabeen. I'di tahe 'doo'di Ya'huud buuhaas Rubeyti Munyee kayamiit a 'hele, toro la 'doo'di yaafohi Ya'huud ieheynan a leegismaan. Jeentetaas u a imasse chi' 'doo'di yaafohi Ya'huud ieheynan buuhi wahanyeyyohi harratane icho khabaan 'doo'di Ya'huud leegismaan.
[28] Cha'an 'dee hila massiche, saggi chilimmeti 'doo'd soobaayiche tuumman 'doo'd liigise arge la, ili Isbaaniya miinsada, 'dee maantaas la a atin leeamiit.
[29] 'Dee maantaas an goytiin imiy la, wihi an tissibo buuh Kiriisto tuume atin ileeamiit.
[30] Toollaka 'doo'd Kiriistokaaw, Yeesso Kiriistohi Kamureene ka ichoow 'dooninti Rubeyti Munyee atin siisso ka a atin hawwaasda, Waakh isoowaha diho ileesoogela.
[31] Waakh isoowaha 'dee dahanohi 'doo'di ili Ya'huudiya kijiro Yeesso Kiriisto rummeysan 'dii'ddan a liibuucho. Toro la Waakh isoowaha 'dee 'doo'di Waakhe ilkerengeetti weene Yeerusaleem hila an icho chilimme igeecho uus 'dii'dine,
[32] 'dee chi'iche 'dooninti Waakh tahe anihi hamaad khabo goytiin a imaate, goytiin a kanaso, a isleehamaano.
[33] Waakkhi nebey tuumman leh ba atin tuumman atin leejira. Aamiin.