[1] Maantaka atihi etoo addan uuraah goyaka hukkunto, wihi ati isikaayyeeddo ma khabto. I'di tahe walahbaaw at etoo addan uuraah goyaka kahukkunto, a i'doo at uskeel isigoosso. I'di tahe wihi etaas yeelo on at laka yeessa.
[2] Wihi inno garanni a mehe ya, Waakh chu'us 'doo'di wihi i'dee yeelo hukkumo us sina igoocho, us wihi rummaat on yeela.
[3] Maantaka chirri atinhi weeli enenyete eti wihi i'dee yeelo uurassiin ka hukkuntaane i'daasenyi atin rubeytiin wahaas yeessaan, kol atin hukkunki Waakh atin hukkumo kabahsattaane koogtahiin?
[4] Ommos uuri 'dabakhenye Waakh atin ikhabo 'darraawtaan? Rumanka us a Waakkhi walah ikanyaamine toro la samacchaare. Atin saggi uuri 'dabakhenye Waakh atin ikhabo, atin iwoyo, 'dee atin uskeeliin kasoonokhattaan ma garattaan a?
[5] I'daasenyi matahenyetiin a mimmiige toro la uurassiin ka uskeeli atin kasoonokhattaan a 'dii'ddaan. Jeentetaas u atin sinati berri ibeenki Waakh holiis atin tuso toro jiti rummaat ka enenyet hukkumo, a isibuuraassaan.
[6] A mehe Waakh weeli enenyet tuumman ebba geeddi us walah yeele guta.
[7] Waakh eti tuummane garrahsati haag on yeelo, jita ka la Waakkhi usu koolicho, inkaanyit tuso toro la jiroti ituumin siicho yowti, jiroti jirtuu imassanne siicha.
[8] I'daasenyi eti tuummane wihi awtiis kalday on yowti, toro la wihi rummaat 'dii'do, khollookh on raaho, Waakh a kabolkha, hol tusta.
[9] Waakh sina ichoow bolokh eti tuummane suujoon yeelo a tusa, yaafohi Ya'huude kasookhabta, 'dee yaafohi Ya'huud ieheynan ikuta.
[10] I'daasenyi Waakh eti tuummane haag kalday on yeelo a koolicha, inkaanyit tusta, nebey siicha. Koloo la yaafohi Ya'huude kasookhabta, 'dee yaafohi Ya'huud ieheynan ikuta.
[11] I'di tahe Waakh gar badah ma gatti, enenyet tuumman ortiis ka a ekka on.
[12] 'Doo'di Ya'huud ieheynan amurre Muusa walah iche leetahe mele. Chirri icho uskeel yeelaan, Waakh icho a baabiicha chi' amurreta wohoo ileeheynan laka. I'daasenyi yaafohi Ya'huud amurre Muusa anatta gone, chirri icho uskeel yeelaane, amurretaas iraahin, Waakh icho amurretaase kahukkuma.
[13] A mehe 'doo'di amurre Muusa nabah on ka daago mee Waakh 'doo'di fiffissan iekkaacho. I'daasenyi 'doo'di wihi amurre 'doonto yeelo iche Waakh 'doo'di fiffissan iekkaacha.
[14] Chirri 'doo'di Waakh igaranne amurre Muusa ikhabin, uuricho on woyo wihi amurre elatti raaho, 'doo'da saggi us amurre iraaho tusa chi'icho amurre ikhabin laka.
[15] Sohoticho wihi us tuso a mehe ya, wihi amurre Muusa enenyet ka'doonto a i'doo uurassicho goya lakachiire. Rubeyohichoki haag ichoow suujoon seley saaho laka waha a cheekaan. Toro la malassicho ankoo ka saggi icho uskeel iyeeleene cheekaane, ankoo ka la a iyeyyeedaane saggi icho haag iyeeleen icheekaan.
[16] Waha la saggane iyateehiin maalinki Waakh Yeesso Kiriisto ka mali weeli enenyete dagsan tuumman hukkumo. Wori Haaggane an cheeko i'daase yadeeh.
[17] Toollaka atihi Ya'huud istadeeh, amurre Muusa khucchissa, wihi ati ichoow Waakh isitahiin keeylajja.
[18] Toro la wihi Waakh kaa'doono a abatte, wihi haaggan ichoow wihi suuje seley bihin a tabuu'd. Waha la a jeenteti amurre Muusa kiabisse.
[19] Saggi at eti ki indo laa angaamicho, at banayhi 'doo'di mug'di goya kijiro, Waakh igaran itahe a tissibta.
[20] Atin 'doo'di wihi Waakh miinsan ka 'dalammee jite tussaane, 'doo'di ii'dowin jiti Waakh abissaan. I'di tahe atin mehe tissibtaan ya, amurre Muusa ka, buuhi runti Waakh enenyet abcho a khabtaan.
[21] Toollaka atinhi 'doo'di addan walah abissaan, a i'doh atin rubeytiin walah isiabinna? Atinhi hatto suujjiche cheektaan, atin rubeytiin walah a hattaan?
[22] Atinhi makhaabali kaah ieheynan ommos makhaabassi taah ieheynan aleeur'din, elattaan, atin rubeytiin mejel ommos deyyehoti tiin ieheynan a leeu'durtaan? Atin iyookkoyyohi lawahti weyti a 'dii'ddaane, atin rubeytiin la minassi iyookkoyyoha lakawahti a hattaan?
[23] Atin amurre Muusati atin khabtaane keeylajjaane, i'daasenyi atin rubeytiin amurreti atin iraahin ka, Waakh lakhaanyo a kadowtaan?
[24] I'di liichiiruu, “Jeenteti atinhi Ya'huude, iche 'doo'di Waakh igaran magahi Waakh ikagafa.”
[25] Khandihi Ya'huude atin khandiyattaan indigir a atin ikhaba cha'atin amurre Muusa raahtaan. I'daasenyi cha'atin amurre Muusa iraahin a i'doo atin ikhandiineynan.
[26] Maantaka chirri eti Ya'huud ieheynane ikhandiineynan wihi amurre Muusa enenyet ka'doonto raaho, Waakh etaas i'di etoo lakhandiye ma iekkaacho?
[27] 'Doo'di Ya'huud ieheynane sartiis ka ikhandiyanne toro amurre Muusa raaho, iche atinhi Ya'huude chiirnaanneti amurreta khabtaane khandiyattaane toro la iraahin, saggi atin amur ijebisseene uskeel iyeesseen atin igoocha.
[28] Eti rumanka Ya'huude ki wihi indo ka laargo kalday menye, ommos khandihi rummaat ki sarti kharaate laaggoocho mee.
[29] Wahaas mee etoo Ya'huud kayeelo. Eti rumanka Ya'huude, a ki uuriis ka Ya'huude. Khandihi goyaatteete rummaat la wihi yeelo, amurreti chiiran menye, a Rubeyti Waakhe enenyet urgiyisso. Eti i'daasu luurgiyiche, weeli enenyet menye, Waakhe koolo ka'hela.