[1] 'Doo'd Kiriistokaaw, wihi uur weyti i'doono toro la an Waakh daaho, a 'doo'di Issiraayele laribo.
[2] Ani rubeyteey saggi icho rumanka weyti Waakh ikafalin i'doonaan a cheeka. I'daasenyi raahnaanki icho Waakh raahin 'doonaan ka, jiti runti Waakh lakaabti ma raahaan.
[3] Icho jiti Waakh enenyet 'doo'di fiffissan iekkaacho ma aban. Icho awtichooda on u jiti icho 'doo'di fiffissan iskayeelaan yowtaan. Icho jiti Waakh enenyet 'doo'di fiffissan iekkaacho raahin a 'dii'deen.
[4] Kiriisto jiti amurre Muusa laraaho 'dee enenyet 'doo'di fiffissan lakayeelo a massiche, 'dee eti tuummane Kiriisto rummeeste, Waakh eti fissan iekkaacha.
[5] Wihi Muusa yidahye jita amurreta laraaho 'dee enenyet 'doo'di fiffissan liiekkaacho miinsan a waha, “Eti tuummane wihi amurre cheekto tuum raaho, amurretaas us raaho ka, jiro 'hela.”
[6] I'daasenyi jiti Waakh lakakhuufo toro la Waakh enenyet eti fissan iekkaacho ka, “Uur ka i'da ma leessi, ‘Ayyo serey irta ichoowka goobi Waakh goya gela?’ ” 'Dee i'daakka Kiriisto iche harrata lakeena.
[7] Toro la, “I'da ma leessi, ‘Ayyo ankhari dahane ieleelin iyaga?’ ” 'Dee i'daakka Kiriisto iche omoot kasookahcha.
[8] Kamalda bal, Chiirnaanneti Waakh mehe tadeeh? “Farniinki Waakh weyti atin idowyahe, furuurohiinna fuula, uurassiin goya la kajira.” Wahaas la a farniinki kakhuufnaanki Waakh lakakhuufo miinsane, nah enenyet icheekno.
[9] Farniinka la a mehe ya, chirri at afaah ka, “Yeesso usu Kamure,” cheekto, uuraah ka la saggi Waakh Yeesso omoot ka isookahche rummeysatte, Waakh a kiriba.
[10] I'di tahe uuraahha Yeesso karummeysatta, wahaas la mehe delaan ya, Waakkhi eti fissan kiekkaacho. Toro la cha'at 'dow ka saggi at Yeesso rummeysatti cheekto, waha mehe delaan ya, Waakkhi kiribo.
[11] I'di Chiirnaanneti Waakh lakachiiruu, “Eti tuummane usu kakhuufo, lakhaanyo ma lakadowo.”
[12] Waha mehe tusaan ya, eti Ya'huude ichoow eti Ya'huud ieheynan seley ma gaan. Kamur a Kamuri enenyet tuummane, ulla eti tuummane usu wahe, weyti imaala.
[13] A mehe i'di Chiirnaanneti Waakh liikachiiruu “Eti tuummane magahi Kamur waho, Waakh a riba.”
[14] I'daasenyi, saggoh Kamuri icho irummeysan iwahaan? Toro la chirri icho woriis idaagin, saggoh Kamura irummeestaan? Toro la saggoh wora idaagaan chirri etoo wora ikacheekin?
[15] 'Doo'di wora cheeko la saggoh woraas 'doo'd ieleelicha chirri liiergin? I'di liichiiruu, “Luhti Wori Haaggan keento, weyti lagantahe!”
[16] I'daasenyi 'doo'd tuumman mee Wori Haaggan raahe. I'di Isaaya rubeytiis chiiruu, “Kamur, ayyo woreenyo rummeeste?”
[17] Maantaka kakhuufnaanki Waakh lakakhuufo Wora Haaggane ladaago kayamiit. Wora Haaggan la chirri wori Kiriisto miinsan lacheeko iche ladaaga.
[18] I'daasenyi wihi an worsadi a mehe ya, 'doo'di Issiraayel wora ma daagin a? Aa! Rumanka a daageen. I'di Chiirnaanneti Waakh liikachiiruu, “Hooyassicho harra tuumman a kataa'heene, yeedi icho yeyyeedeen harra gin'dohiche tuumman a eleele.”
[19] Toro la wihi an worsadi, 'doo'di Issiraayel wora ma aban a? Aa! A abteen. Kolooraat Muusa wihi us soolaabe yaafohi Issiraayel miinsan a mehe ya, “An inaafi atin 'doo'doo yaafti rummaat laka ieheynan kiinaaftaan iche goytiin gessa, yaafti 'dalammee ka a atin holloocha.”
[20] Yomboka Yeedi Waakhe Isaaya roorro laan cheeke kalla, “'Doo'di ani i'hele a ki 'hor ani iyowan. 'Doo'di an istuse la, a ki 'hor ani iwahin.”
[21] I'daasenyi wihi 'doo'di Issiraayel miinsane Waakh yidah a waha, “An maalinki noole goya ween 'doo'di yeedeey iraahine, ani itirrimo iche dahanoheey iooge.”