[1] Ani ichoow Kiriisto ba rum on cheekna, ani been ma goocho. Toro la rubeyteeyti haag ichoow suujoon seley saahto ichoow Rubeyti Munyee a israahaan.
[2] Runtaas la a mehe ya, uureey ka oytinti buure ichoow bolokkhi uskule khaba
[3] jeenteti 'doo'deey u. Chirri kootte iche tateehe an yaafteey indigirtoo igelo, incheenka Waakh a ifala, 'dee ani ichoow Kiriisto ba seley bahna.
[4] Icho a 'doo'di ili Issiraayele, Waakh icho a khaatte, nyaakhutiiski i'di teyyanohiise kayeesse. Toro la weynaantiis goycho ka tuse, ayyinti ittaawenye us igooche ichoow amurre Muusa ba 'heleene, jiti Waakh minki Waakhe buure ka lakawahti 'heleene, wihi ittaawenye 'dee yateehe Waakh gooche laka 'heleen.
[5] Icho la aacchinyetichoti lagarti Aburaaham ichoow Isakh ichoow Yaakoobo illehe a khabaan. Kiriisto anki weeli enenyet ka, hiiyyaase kayimiy. Ulla a Waakkhi walah tuumman anti, koolo a 'helo jirtuu tuummamba! Aamiin.
[6] Waha i'doo Yeedi Waakh kufe mee. A mehe 'doo'di Yaakoobohi Waakh Issiraayel yidah hiiyyiis kayimiy tuumman mee rumanka Issiraayelenye 'doo'di Waakhe.
[7] Ommos nyaakhuti hiiy Aburaaham kayimiy tuumman mee rumanka nyaakhuti Waakhe. Waakh wihi us Aburaaham iyidah, “Nyaakhut nyaakhutaah Isakhe lakawaha.”
[8] Waha la wihi icho yihiin a waha, nyaakhuti Aburaaham uume tuumman mee rumanka nyaakhuti Waakhe, nyaakhuti ayyinti Waakh gooche kadesse on nyaakhut Aburaaham liiekkaacha.
[9] A mehe ayyinti Waakh Aburaaham igooche ka wihi us yidah, “'Dee maanti ibeenki lasoobahsate yitah toro a soonokhda, Saara la geeddaakka inankoo a 'hesse.”
[10] Inanka aacchiheenki Isakh layadeehe eheet. Usu Rebeekka diste, iche la inam lamma man'daanee desse.
[11] I'daasenyi Waakh geeddi man'daanoha idelanne icho wohoo haaggan ommos suujoonkoo laka iyeelin, iche saggi us 'doo'd iwaho 'dee wihi us gooche isoo'hadaan tuse.
[12] Wihi Waakh gooche la jeenteti holi enenyet dowo menye, a jeenteti Waakh rubeytiis enenyet iwaho. Wihi us Rebeekka iyidah, “Inanki ween inanki nugule ifala.”
[13] I'di liichiiruu, “An Yaakoobo a 'doone, i'daasenyi Essaawo a 'dii'de.”
[14] Mehe 'deerka nidaahe? Waakh wihi us 'doo'di yeerare igoocho ka a khollokkhanyahe? I'daaru laka i'daas mee!
[15] A mehe Waakh wihi us Muusa iyidah, “Ani on eti an uur inugleesdi uur inugleesda, toro la ani on eti an isoonaho isoonaha.”
[16] Maantaka chirri Waakh etoo uur isoonugleesti wahaas saggi etaas i'doono ommos saggi etaas hol idowo ma iyateehiine, jeenteti Waakh etaas ikasoonaho on iyateehiin.
[17] I'di tahe i'di Chiirnaanneti Waakh karnati Miissiri Faraawo layadeeh itadeeh u, “Wihi an kiweynaache, a jeenteti wihi an ati ichoow ilaah iyeelo ka miigteey liiargo, toro la magaheey harra tuumman ka liiabti.”
[18] Maantaka Waakh usu on eti us uur inugleysan 'doono uur inugleesta, eti us matakkiis miigoon 'doono la matakkiis miigoocha.
[19] Etiinkoo kolossoo mehe iworsata ya, “A i'doh 'deerka Waakh weeli enenyet uskeeli us yeelo ikacheekta? A mehe ayyo injire mali Waakh tirrime?”
[20] Etaaw, atiha Waakh yeed ilaabto, at ayyo iskoogtahe? 'Dirihi doobbo eti yeele, “At a i'doh sagga ikayeesse?” ma worsati gon.
[21] I'daasenyi eti 'diryohi doobbo yeelo, antohi us doobbotaas kalday 'dirihoo daaweet kahaaggicho koo la ki hili ballaaddan kahaaggicho ma khabo?
[22] Saggaas on u, chi' Waakh enenyet holiis ichoow miigtiis tusin 'doone laka, wihi us gooche, us 'doo'di kootte baabiin liigooche weyti a isamacchaara on.
[23] Ulla toro samacchaare eheete, 'dee kamurroonki weynaantiis 'doo'di us uur isoonugleesti us orey on tannabiche 'dee weynaantiis 'helo tuse.
[24] Inno laka 'doo'di Waakh wahe goya a kijirra, ki Ya'huude kalday on menye, i'daasenyi 'doo'di yaafohi Ya'huud ieheynan laka.
[25] Buuggi 'Hoseeya chiire ka, wihi Waakh 'doo'di Ya'huud ieheynan iyidah kallaayo, “An 'doo'di keey ieheynan iche, ‘'Doo'daaya,’ adeeh. 'Doo'di goorat 'hor an i'doonin iche, ‘Chinnitaaya,’ ” adeeh.
[26] Toro, “Wihi yateeh, inti Waakh, ‘Atin 'doo'deey mee,’ ikayidah, intaas on ka wihi us icho iyadeeh, ‘Atin a nyaakhuti Waakkhi jiro.’ ”
[27] Isaayahi Waákh íyeyyeedo wihi nyaakhuti Issiraayel miinsane us kooye a waha, “Chirri nyaakhuti Issiraayel ittaaw ka geeddi yoohti beyti buure afichee yahe laka, Waakh 'doo'doo rucchul on goycho ka riba.
[28] A mehe Kamur 'dee koloo kalday on 'doo'di harra tuumman hukkuma sina igoocha.”
[29] A i'di 'hor Isaaya icheeke on, “Chirri Kamuri Miig Tuumman Leh nyaakhutoo nah ikasoowaan, nah laka i'di goorat 'doo'di ilkerengeetti Soodom ichoow ti Goomorah u, Waakh afe nah kahiyyaayta.”
[30] 'Deerka mehe nidaahe? 'Doo'di yaafohi Ya'huud ieheynane goorat jiti icho 'doo'di fiffissan liiekkaache iyowan, iche toolla Waakh 'doo'di fiffissan iekkaacha jeenteti icho Waakh ikakhuufaan u.
[31] I'daasenyi, 'doo'di Issiraayel amurre Muusati laraaho jiti Waakh icho 'doo'di fiffissan iekkaacho a yowteene, toro la ma 'helin.
[32] Icho a i'doh i'helin? A jeenteti icho kakhuufnaanki icho Waakh kakhuufaan ka iyowanne, icho wihi icho yeeleen ka wahaas iyowteen. I'da ka icho daakki enenyet tarraantarricho kombicheen.
[33] I'di liichiiruu, “Yeya, an ilkerengeetti Saayon goya daakkoo enenyet tarraantarricho gessa, waha la a daddaabtoo enenyet laga'ddo. Eti tuummane usu rummeeste la, lakhaanyo ma lakadowo.”