[1] Maantaka 'doo'd Kiriistokaaw, jeenteti uurnugleeli Waakh u, a atin hawwaasda, taba sartiin Waakh ibahcha, i'di soorriyoti jirto toro la munyee u. Soorriyotaas la a ti Waakh kahamaadisso. Waha la a saggi imasse atin Waakh iwahattaan.
[2] Taba gi'de, jiroti 'doo'di wahanyeyyohi harratane sussuuje raaho ajirina. Rubeyti Waakh mali atin malattaan tuum a husubnaasso. I'daas ka wihi Waakh atin igooche a fiirissaane toro khaatattaan. Waha la a wihi haaggan ichoow wihi Waakh kahamaado toro la a tuum.
[3] A mehe haaggi Waakhe buurenye liisiiche ka, an etiimba waansihane siicha. Taba etiimba uus weyti serey isgeen i'doo us khummanyahuu. I'daasenyi ebba mujjum a isfiiricho geeddi kakhuufnaanki Waakh usu siiche ka.
[4] Saggi sarteen miilassi ittaawe ikhabto, miil ba la hiliis yeer iyahuu,
[5] saggaas on u innohi ittaawe laka, jeenteti inno ichoow Kiriisto ba wohoo kalday inahuu, a i'di sartoo kaldaye miilassi ittaawenye iskaattoollo khabto.
[6] Waakh haaggiiski buure ka, eteemba siimohi yeerenye siiche. Maantaka, chirri siinti Waakh kisiiche ti Waakh liiyeyyeedo tahe, taba gi'de, ebba kakhuufnaanki Waakh siiche ka, Waakh mujjum a iyeyyeedo gi'de.
[7] Chirri siinti Waakh kisiiche ti enenyet liihilo tahe, enenyet ihil gi'de. Chirri siintaah ti enenyet walah laabcho tahe, enenyet mujjum wihi rummaat abi gi'de.
[8] Chirri siintaah ti enenyet uur lamiigoocho tahe, tab enenyet uur miigooy. Chirri siintaah ti enenyet walah lasiicho tahe, tab uuri haaggan ka enenyet walah sii. Chirri siintaah ti enenyet lawoyo tahe, tab enenyet mujjum woy. Chirri siintaah ti enenyet uur liinugleesti tahe, tab hamaad ka enenyet uur inugleyso.
[9] 'Dooninti atin enenyet ikhabtaan ti rummaat a eheetti. Wihi suuje tuumman 'dii'da, haag on jurkhicha.
[10] I'di 'doo'di uuroo kaldaye u, is'doona, 'doo'di addan kol tuumman 'dirihiin inkaanyita.
[11] Hiliin ka 'doo'di sey'hooti iitaahana. Rubeyohiin ka hili Kamur tuum gela.
[12] Jeenteti atin khajjeel ikhabtaan u, hamaada. Sinati atin loomhicho ka garrahsada, kol dakkhan la Waakh wahda.
[13] Wihi atin khabtaan 'doo'di Waakhe gargaar 'doono leegisma, toro la artohiin faha, marti urmohiin a soogesso.
[14] Eti sina atin omhicho afalina iweesda on.
[15] 'Doo'di hamaado leehamaada, ki ooyo la leeooya.
[16] Maloo kalday khaba. Eeylajina, 'doo'di miskiine fiddihi haaggan ikhaba. Weyti serey iisgeenna.
[17] Etoo kalday laka suujoon suujoon akagutanna. Wihi enenyet tuumman ortiis ka haaggan on yeela.
[18] Chi'iche tateeh, geeddi atin tabuu'diin tuumman, hol dowa, 'doo'di addan nebey kaleefiddiya.
[19] Aalassaay koloo kalday laka aál agutanna, holi Waakhe buure aassiin a gutti. A mehe wihi chiiran, “Aale a taaya, ani baha,” iche Kamur essa.
[20] Atinhi i'daas yeessaan ka atinhi i'da yeessaane deefta, “Chirri chiiytankaah raarah khabo, golol sii. Chirri us sugub khabo, sugub bihi. I'da ka jilahti lakhaanyo matahenyeticho kichibta.”
[21] Taba gi'de, suujoon uus atin kahataatine, haag yeela, 'dee suujoon sooricha.