[1] Kamalda bal, yaafohi Ya'huude Waakh soobahsate 'deerka yaafohi Ya'huud ieheynan saggoo a ikadeefaan? Toro la khandihaas Ya'huud indigirtoo khabaayi?
[2] Rumanka Ya'huudhi layahe indigirti buurenye khaba. Kolooraat wori Waakh yaafohi Ya'huude dahan lagesse.
[3] Rumanka gaasichokoo Waakh ma kakhuufin. Jeenteti icho Waakh ikakhuufin u Waakh koloo kalday laka ayyintiis ma jebcho.
[4] I'daas mee! Chirri weeli enenyet tuumman been goocho laka, Waakh rume leeyahe. I'di liichiiruu, “'Dee atihi Waakhe saggi at rum on ikaayyeeddo laarga, toro la saggi at 'doo'di wohoo kaacheekti isoorisso laarga.”
[5] I'daasenyi chirri inno 'doo'di khokkhollokkhan nahe waha la saggi Waakh tuum ifissanyahe 'doo'd rumanka tusaan, mehe nidaaheey? Waakh chu'us holiis inno tuso, a khollokkhayyahe nadeeh? Waha abda, an saggi 'doo'd gaasoo iyeyyeedo iche iyeyyeeda.
[6] I'daas mee! Waakh chu'us wihi fissan iraahin, sag us weeli enenyete harrata ihukkumo mele gon.
[7] Etoo kolossoo a geeddi us i'da yadeeh, “Chirri beenteey runti Waakh enenyet mujjum tusso 'dee koolohi Waakh buuraataan, Waakh a i'doh ani uliba eti uskeel leh ikagoocha?”
[8] Chirri atin mali i'daase raahtaan, a geeddi atin i'di 'doo'doo iabaaruu i'da tadeehiin on, “Alleya suujoon a yeello 'dee haag a yimaate!” 'Doo'di wihi i'dee essi, wihi imale a hukkunki lahukkumo, sina liigoocho.
[9] Maantaka nahi Ya'huude mehe goonna? Innohi yaafohi Ya'huud yaafohi Ya'huud ieheynan a kadeefna? I'daaru laka ma kadeefno! Saggi an atin ituse u, weeli enenyet tuumman Ya'huud ichoow ki Ya'huud ieheynan ba, uskeele sam dese, woya.
[10] I'di liichiiruu, “Eti fissan ma jiro, koo kalday laka ma jiro.
[11] Etoo kaldache kharee ma jiro, etoo kaldaye Waákh yowti ma jiro.
[12] Weeli enenyet tuumman Waakh adah a kakhabte, usu tuumman la hili Waakh ka, tir a kabahe, etoo kaldaye haag yeelo ma jiro. Koo kalday laka ma jiro.”
[13] “Yeedi aficho kasoobaho omoote keena, harrabbeticho la yeedi beenaat on yeyyeedda.” “Ayti furuurohicho leetamiit a i'di hadaadohi toof.”
[14] “Yeedicho tuumman falo ichoow bolokh on buuha.”
[15] “Icho la diiggi icho khubaan a i'har'haraan.
[16] Meelbaaw icho irtaan ka walah on baabulaane, toro oytim keenaan.
[17] Icho la jiti nebey laka'helo ma gartaan.”
[18] “Waakh ma karooraane, ommos ma inkaanyitaan.”
[19] Toollaka wihi inno garanni a mehe ya, wihi amurre Muusa goya kachiiran tuumman 'doo'di amurretaas anatti iche leeyyeedda. Waakh la i'dane yeela, 'dee enenyet tuumman wihi us laabti waaya toro la enenyet tuumman hukkuma, sina igoocha.
[20] Maantaka etoo kaldaye jeenteti us hili amurretaas 'doonto iyeeluu Waakh ortiis ka eti fissan liiekkaacho ma jiro. Amurretaas ka saggi inno uskeel iyeelle on abanna.
[21] Toollaka Waakh jiti us 'doo'di fiffissan inno iekkaacho a soobabbakkaahiche. Jita la ki amurre laraaho menye, a jiti goorat archiiy Chiirnaanneti amurre Muusa ichoow ti 'doo'di Waákh íyeyyeedo cheekte.
[22] Waakh kakhuufnaanki enenyet Yeesso Kiriisto kakhuufo ka iche enenyet eti ortiis ka fissan iekkaacha. Waha la eti tuummane Yeesso Kiriisto rummeesti ka a rum. Waakh enenyet seley ma sassaaho,
[23] i'di tahe weeli enenyet tuumman uskeel a yeele, weynaanti Waakh kadeeraate.
[24] I'daasenyi Waakh jeenteti haaggiiski buurenye inno imunneynan u enenyet i'daanu 'doo'di ortiis ka fiffissan iekkaacha. Jiti us i'da kayeele la a ki us Yeesso Kiriisto ka inno gatte.
[25] Waakh Yeesso enenyet ortiis ka soorriyo kayeele, 'dee diig Kiriisto ka holiiski us inno ikhabe laaba. Chirri etoo saggi Yeesso soorriyoti Waakh iyahe kakhuufe, uskeeliis a liikakuta. Waakh la Yeesso soorriyo kayeele, saggi us iffissanyahe tusa. Waakh la i'dane yeele a mehe us a samacchaare, 'doo'di orey uskeel yeele sirbi ma gelin.
[26] Toro la Waakh i'dane yeele saggi us wey'da laka ifissanyahe tusa. I'daas ka us a fissanyahe toro la eti tuummane Yeesso kakhuufe eti fissane iekkaacha.
[27] Kamalda bal, wihi inno keeylajno a khabna? Mele, wohoo rucchule inno keeylajno ma khabno! Jeenteti inno amurretoo iraahnuu eylajin a nabuu'd? Mele, a jeenteti inno Yeesso ikakhuufno on.
[28] A mehe chirri inno amurre Muusa raahno menye, chirri inno Yeesso kakhuufno kaldach on Waakh 'doo'di fiffissan inno iekkaacha.
[29] Waakh a Waakkhi yaafohi Ya'huud kaldach on a? Us Waakkhi yaafohi Ya'huud ieheynan laka menya? Aa, a i'daas on,
[30] i'di tahe Waakh a koo kaldach one, jiti us weeli enenyet tuumman 'doo'di fiffissan iekkaacho la a koo kaldach on. Waha la a chirri enenyet Kiriisto kakhuufo on, yaafohi Ya'huude khandiiti eheetteey ichoow yaafohi Ya'huud ieheynane ikhandiyan eheetteey ka ba.
[31] Maantaka chi'inno kakhuufnaanki Waakh lakakhuufo on khumummaanno, amurre Muusa 'dol nassil? Mele, i'daas mee! Rumanka chi'inno Waakh kakhuufno kaldache amurretaas laka miigoonna.