[1] 'Deerka mehe nidaahe? Uskeeli inno yeello on orey ileesohanna yeella 'dee haaggi Waakhe buurenye inno imunneynan kakhayma?
[2] Mele, i'daas mee! Inno a i'doo inno wihi uskeel miinsan ka tuunne, uskeel kola ma inno dakhti, 'deerka uskeel goya ma kaassahanni gon.
[3] Rumanka waha a garattaan! Maanti inno labaattissiye inno ichoow Yeesso Kiriisto ba wohoo kalday nitahye, toro omoottiis ka wohoo kalday leenitah.
[4] Maantaka baattissiyoti inno labaattissiye ka, a i'doo inno Kiriisto leenumuyye toro la inno laleehawwaale. Saggaas goorat Kiriisto Aabbahiis weynaantiis ka omoot ikasookahche, saggaase inno laka toolla jirotoo husub ijirra.
[5] Inno ichoow usu ba omoottiis ka wohoo kaldaye nitah gone, omootti i'diis u inno lakasookahacho ka laka, inno ichoow usu ba rumanka wohoo kaldaye nateeh.
[6] I'di tahe wihi inno garanni, eti inno goorat nahe a i'doo Kiriisto massalaaba ka laleekaahe, 'dee wihi goyteen kijiro uskeel imoono miigti icho inno kaantaan latira. I'da ka inno kola bow'dayyohi uskeel mee gon,
[7] a mehe eti tuummane omoot Kiriisto ka usu ichoow Kiriisto ba wohoo kalday yitaaheen, miigti uskeel usu kadakhti a lakasoofure.
[8] Kiriisto a leenumuy gone, wihi inno rummeysanni a mehe ya, inno laka usu a leejirra.
[9] A mehe wihi inno garanni, Kiriisto omoot a lakasookahche gone, maantoo addan toro ma yamuut. Omoote kola usu miigtoo rucchul laka ma kakhabto.
[10] Us koloo kalday on yumuyye jirtuu tuumman miigti uskeel jejjebche, i'daasenyi jiroti us jiro, a ti us Waakh ijiro.
[11] Saggaas on u taba gi'de, atin laka 'doo'di wihi uskeel miinsan ka tuume isiekkaacha. I'daasenyi jeenteti atin ichoow Yeesso Kiriisto ba wohoo kalday itahiin u, jiroti atin jirtaan Waakh ijira.
[12] Maantaka uus uskeel sartiinta tamuut dakhan, uus 'dee atin wihi uurassiin kijiro uskeel imoono raahine.
[13] Wihi addan, miiliinkoo kaldach laka uus uskeel dakhan, uus 'dee atin wihi khollokkhan yeeline. Waakh tuum isibahcha, a mehe Waakh omoot a atin kasookahche, jiro atin siiche. I'daasenyi miilassi sartiin tuumman Waakh ibahcha, wihi fissan kalday on kahaaggicha.
[14] A mehe uskeel kola ma atin dakhti, i'di tahe jirotiin ka wihi amurre Muusa atin ka'doonto mee atin dakhti, haaggi Waakhe buurenye inno imunneynane atin dakhta.
[15] Mehe yeello 'deerka? Jeenteti amurre Muusa inno idakhanne, haaggi Waakhe buure inno idakhtuu, uskeel goya on kaassahanna? I'daas mee!
[16] Wihi atin rumanka garattaan a mehe ya, eti tuummane etoo addan isibahche i'di bow'duu raaho wihi kamuriis ka'doono yeela. Atin a bow'dayyohi uskeele omoot isohti ommos atin a bow'dayyohi ayti Waakh raaho 'dee us 'doo'di fiffissan iekkaacho.
[17] Waakh weyti kala'd ilaabno gi'de! Chirri atin goorat bow'dayyohi uskeel eheneet laka, toolla uurassiin ka runti Waakhe dahantiin lasoogesse tuum a raahteen.
[18] Uskeeli goorat sam atin dese a atin lakafure, atin kola a bow'dayyohi Waakhe, ulla 'doo'di fiffissane atin iekkaacha.
[19] Jeenteti atin 'dabakkhi weeli enenyet ikhabtaan u, an iyookkoyyohi jiroteen ka inno garanni atin kaleeyyeeda. Atin goorat miilassi sartiin a soobihisseene, bow'dayyohi bi'diri nool ichoow ti hugun'darriti weyti kakhayanto eheet. Saggaas on u taba, miilassi sartiin bow'dayyohi fiffissan ibahcha, 'dee 'doo'di munyee ateeha.
[20] Maanti atin bow'dayyohi uskeel eheneet, Waakkhi enenyet 'doo'di fiffissan iekkaacho bow'dayyohiis ma eheynan.
[21] Uskeeli atin yeesseene toolla la atin kalakhaanyeysattaan, indigir us atin ikeene mele. Wihi us keeno dakkhamba a omoot on.
[22] I'daasenyi toolla miigti uskeel a atin lakasoofure, bow'dayyohi Waakhe titaaheen. Indigirti atin 'hessaan munya atin iwoyta, waha la jiroti jirtuu imassanne delaan.
[23] I'di tahe gunnaanki eti uskeel yeelo laguto, a omoot. I'daasenyi siinti Waakh i'daanu enenyet siicho, a jiroti jirtuu imassan. Waha la a chirri inno ichoow Yeesso Kiriistohi Kamureene ba wohoo kalday nahe.