[1] Khadaaba eti atin isoochiiro, a ani Baawulo ichoow eteenki koo Kiriisteenye Soosteena layadeeh. Anna Waakhe jeenteti us i'doono on u, iwahe ergaano Yeesso Kiriisto ikayeele.
[2] 'Doo'di nah khadaaba isoochiirro la, a ururi Waakhe ilkerengeetti weene Koriinto kijiro. Atin a 'doo'di Waakh rubeytiis wahe munyaache, atin ichoow Yeesso Kiriisto ba wohoo kalday atin kayeele. Toro la eti tuummane harrata ka Yeesso Kiriistohi Kamureenenye toro la icho laka Kamurichee wahti iche ichiirra.
[3] Waakkhi Aabbaheene ichoow Yeesso Kiriistohi Kamure ba atin imaalaane nebey atin kakaalaan.
[4] An kol dakkhan Waakkheey kala'd a ilaaba. Us haaggiiski buurenye inno imunneynan a atin tuste jeenteti atin ichoow Yeesso Kiriisto wohoo kalday itahiin u.
[5] I'di tahe jeenteti atin ichoow Kiriisto wohoo kalday ititaaheen u, Waakh walah tuumman ka a atin kamurrooche. Waha la a i'di maanta, wihi atin cheektaan ichoow wihi atin abatteen.
[6] Waha la saggi Wori Kiriisto miinsane nah atin icheekne uurassiin goyaka irummaateene tusaan.
[7] Maantaka siinti Rubeyti Munyee katamiit too kaldaye atin kaankhan ma jirto, geeddi atin Yeesso Kiriistohi Kamureenenye inno liisoobabbakkaahicho weyti sugtaan.
[8] Yeesso Kiriistohi Kamureene la a atin miigoocha, usu mujjum kakhuuftaane, 'dee maanti us soonokhti ka, wohoo rucchul laka ma atin kacheekti.
[9] Waakkhi atin wahe, atin ichoow Weeliiski Yeesso Kiriistohi Kamureene ba kulankoo kalday atin kayeele, a lakakhuufa.
[10] Maantaka 'doo'd Kiriistokaaw, anto Yeesso Kiriistohi Kamureene ka a atin hawwaasde, taba atin tuumman isdaaga 'dee seley agoggowina. Toro la wihi atin goossaan ka maloo kalday khaba.
[11] I'di tahe 'doo'd Kiriistokaaw, 'doo'doo goob Kiilow kayimiy saggi atin isileejaakhtaan a isoocheeke.
[12] Wihi an eldi a mehe ya, gaasiinkoo mehe essa ya, “Ani Baawulo raaha,” gaasoo la, “An Aboollo raaha,” essaane, gaasoo la “An Keefase raaha,” gaasoo la “Ani Kiriisto raaha,” essaan.
[13] Kiriisto seleye laaggooche? Anihi Baawuleenye goorat jeentetiin u massalaaba liikakaahe? Ommos maanti atin labaattissiye, magahaaya atin lakabaattissiye? Mele!
[14] An Waakh kala'd a ilaaba, i'di tahe goytiin ka Kiriisba ichoow Gaayo on menye, et addane an baattissiye mele.
[15] Et 'deerka goytiin ka magahaaya lakabaattissiye yadeeh mele.
[16] Aa, waha laka a kasoo'hele, min Isteefana laka ani baattissiye. 'Doo'da on menye, et addane an baattissiye an kasoo'helo mele.
[17] A mehe Kiriisto 'doo'di an baattissiyo mee isooerge, i'daasenyi wihi us isooerge, a Wori Haaggane an cheeko. Wora la kharati yeedi weeli enenyet mee kacheeko. Uus 'dee omootti Kiriisto massalaaba ka yumuy miigtiche waayine.
[18] I'di tahe 'doo'di baabaa kijiro ka, wora massalaaba Kiriisto miinsan, a wori 'dalam on. I'daasenyi innohi Waakh inno ribo ka, wora a miigti Waakh.
[19] I'di tahe wihi chiiran, “An kharati 'doo'di kharayyee a baabiicha, mali 'doo'di wihi buure garti la 'dole ilaaba.”
[20] 'Deerka 'doo'di kharayyee meeke? Tagaammeti amurre meete? 'Doo'di weyti yeyyeed garti meeke? Ma jiraan! Waakh kharati 'doo'di harrata 'dalam ma kayeelin a?
[21] I'di tahe Waakh kharatiis ka wihi us gooche, 'doo'di harrata kharaticho on ka Waakh ma abti. Wihi Waakh kahamaadicho a chirri jiti 'dalammoon liikhaato Wori Haaggane lacheeko ka, us 'doo'di woraas rummeeste ribo.
[22] 'Doo'di Ya'huud wahanyeyyohi miigti Waakh tuso marma, 'doo'di Giriig la kol dakkhan yeedi khara daagin 'doona.
[23] I'daasenyi nah wori Kiriistohi massalaaba lakakaahe miinsan iche enenyet icheekna. Wora la 'doo'di Ya'huud daakki tarraantarricho iyateehe, yaafohi Ya'huud ieheynan ka la, wora a yeedi 'dalam.
[24] I'daasenyi 'doo'di Ya'huud ichoow ki Ya'huud ieheynane Waakh wahe ka, wora a koo Kiriistohi miigti Waakhenye toro la kharati Waakhe.
[25] I'di tahe wihi 'dalanki Waakh lakoog, kharati weeli enenyet a kussantahe, toro la wihi 'darriti Waakh lakoog, miigti weeli enenyet a kussantahe.
[26] 'Doo'd Kiriistokaaw, maanti Waakh atin wahe 'doo'diiyye atin eheet kamalda bal. Mali weeli enenyet ka, buurtiin kharayyo ma eheynane, buurtiin la 'doo'di weynaan khabo ma eheynane, buurtiin la goobi magah khabo laka ma kiimaatan.
[27] I'daasenyi Waakh wihi 'doo'di harrata 'dalam ikhaato iche soobahche, 'dee 'doo'di kharayyee lakhaanyo kadowa. Us wihi 'doo'di harrata 'darri ikhaato iche soobahche, 'dee 'doo'di mimmiige lakhaanyo kadowa.
[28] Waakh wihi harrata ka magah ikhabin ichoow wihi 'doo'di harrata 'darraawo, ichoow wihi 'doo'di harrata wohoo ikoogeynane soobahche, wihi 'doo'di harrata wohoo khumman koog kabaabiiche.
[29] Waakh i'dane yeele, uus 'dee etoo kalday laka ortiis ka eylajine.
[30] I'daasenyi jeenteti wihi Waakh yeeluu, atin ichoow Yeesso Kiriisto ba a wohoo kalday. Kiriisto la kharati Waakh katimiyye inno liikayeele. Kharataas ka la Kiriisto 'doo'di fiffissane inno kayeele toro la inno munyaache toro la inno gatte, uskeel inno kasoofure.
[31] Maantaka i'di liichiiruu, “Eti tuummane eylajin 'doono wihi Kamur yeele kalday on a keeylajo.”