[1] Taba, weynaanti sirgaal afiche akutina. A mehe weynaanti Waakh soobahche on menye, too addan ma jirto. Weynaanti jirto la Waakhe intaas gesse.
[2] Maantaka eti tuummane weynaanti sirgaal tirrimo, amuri Waakh soobahche tirrima. 'Doo'di i'daase la, hukkunki lahukkumo sina liigoocho iche isikeena.
[3] I'di tahe weynaane 'doo'di iche kanahisso ki haag yeelo menye, ki suujoon yeelo kanahissa. Atinhi weynaantiin ikaroorine 'doontaan? Taba gi'de wihi haaggan yeela. I'da ka la weynaane a atin saa'dda.
[4] A mehe weynaane a falfayyohi Waakhe haag atin iyeesso. I'daasenyi cha'at suujoon yeesse, roorro a khabta gon, a mehe miigti iche sirbi kaagelisso a khabta. Weynaane a falfati Waakhe, iche holi Waakh ka eti uskeel yeelo sirbi gelissa.
[5] Maantaka, wihi lakaa'doono a atihi weynaanti sirgaal afiche ikutin. Waha la jeenteti holi Waakh kalday on menye, i'daasenyi uus 'dee rubeyoheen suujoon inno kacheekan.
[6] Jeentetane kooddi laka iguttaan, i'di tahe weynaanti sirgaal a falfati Waakhe, icho la geeddi noole hil haaggichaane, wihi laka'doono buuhichaan.
[7] Taba gi'de, ebba wihi miinsan siicha. Taba eti kooddi goocho kooddi iguta, eti chilim liiguto la chilim iguta. Eti inkaanyit imale inkaanyita, eti roorro imasse la karoora.
[8] Mogti kaldaye atin iskakhabtaan, ti atin is'doontaan on menye, too addan iiskakhabina. I'di tahe eti etoo addan 'doono, rumanka amurre Muusa wihiche a buuhicha.
[9] A mehe amurreta, “Makhaabali kaah ieheynan ommos makhaabassi taah ieheynan aleeur'din, ogoos dubunuunu agelin, walah ahatin, walah amaanjeeran,” tadeeh tuumman ichoow chi' too addan jirto, amuroo kaldach on kakulanta. Amura la mehe yadeeh ya, “Ollokkaah geeddi at is'doonto 'doon.”
[10] Cha'at ollokkaah 'doonto wohoo suuje ma iyeesso gon. A mehe 'dooninti rummaat, amurre tuumman a buuhissa gon.
[11] Waha tuumman yeela, i'di tahe ibeenneti luur'do kola a kutte, 'deerka ur'dummetiin kasooneybaada! A mehe ibeenki Kamur inno ribo, maanti goorat inno Kiriisto rummeysanne ichoow toolla, toollane soodowwaate.
[12] Ibeen kola a kute, il a soobarya. Maantaka taba, wihi suujenye mug'di kasootaba. Birti haaggane banayeet okhsada, 'dee uskeel diha.
[13] Jirotiin tuumman wihi mujjumenye saggi fiddihi 'doo'di banay goya fiddiyo a eheetti. Taba gi'de, daawohi bi'dire ommos meleefu uus goytiin kijirine, ommos uus 'doo'di isidisanne isleeur'do ommos soho'ddarri goytiin kijirine, ommos uus jihit ommos inaaf laka goytiin kijirin.
[14] Taba gi'de sagag tuumman ka Yeesso Kiriistohi Kamure i'diis ateeha, toro la wihi uurassiin goya kijiro uskeel imoono koloo kalday laka araahina.