[1] Taba, eti kakhuufnaanki us Waakh kakhuufo 'dabakhyahe soodowwaacha, toro la mali us khabo wahanyeyyohoor mammarah miinsan, aleeiriirina.
[2] Iyookkoka, etoo kolossoo wihi us kakhuufo a mehe ya, suujoon kijiro mele chu'us gololbaaw us 'hele ka us yaham. I'daasenyi etoo addane Kiriisto kakhuufe, kakhuufnaankiiis la 'daranyahe, imboogati gos kalday on yaham.
[3] Eti golol tuumman yaham, uus ki imboogati gos kalday yaham 'darraawin gi'de. Eti imboogati gos kalday on yaham la, uus eti addane golol tuumman yaham uskeel igoon gi'de. I'di tahe Waakh kan walah tuumman yaham laka a khaatte.
[4] Atihi bow'dati etoo addan uuraah ka hukkunto a ayyo? Kamuriissa gon usu uskeel khabo kufe ommos usu uskeel ikhabine toollo goocha. Ulla 'dee rumanka a toolla, a mehe Kamur toollin a yabuu'de.
[5] Toro la etoo ka seeroo seerassi addan a kamunya. Etoo addan ka la seerar tuumman a ekka on. Ebba ayta ka wihi leemujjume a goocho.
[6] Eti tuummane seeroo munyaacho, i'dane yeela 'dee Kamur inkaanyita. Eti jid yaham la i'dane yeela 'dee Kamur inkaanyita. A mehe ullaka gololaas ka Waakhe kala'd ilaaba. Eti gololletoo bujo laka i'dane yeela, 'dee Kamur inkaanyita, toro la Waakh kala'd ilaaba.
[7] A mehe eteen keley isijiro mele toro eteen keley isiyamuut mele.
[8] Chi'inno jirro, Kamure ijirra. Chi'inno tuunne la, Kamure ituunna. Maantaka jirreey ommos tuunneey ka ba, inno a ki Kamur on.
[9] Jeentetuu Kiriisto a yumuyye toro la toolla a jira, 'dee Kamuri 'doo'di jiro ichoow ki 'doo'di tuume yateeh.
[10] Atihi imboogati gos kalday taham etaahkoo Kiriisto rummeeste uuraah ka ahukkumin gi'de. Toro la atihi golol tuumman taham etaahkoo Kiriisto rummeeste a'darraawin. I'di tahe inno tuumman berri komborti Waakh enenyet kahukkumo orcheeda tolossanna, inno lahukkuma.
[11] Wihi chiiran, “Kamur mehe essa ya, ‘An rumanka a jira gone, weeli enenyet tuumman orteey ka jilbo il a kagu'dda, 'doo'd tuumman la saggi an Waakh iahe 'dow ka a cheeka.’ ”
[12] 'Deerka 'dee eteemba berri wori jirotiis tuumman Waakh a idowdowa.
[13] Maantaka taba gi'de uus inno uskeel isigoon. Fiddihi inno fiddiino ka waha goonno, koloo kalday laka etaahki Kiriisto rummeeste daakki tarraantarricho iitaahane, ommos uskeel goya akalug'din.
[14] Jeenteti ani ichoow Kamureenki Yeessee koo kalday inahuu, wihi an tissibo kallaayo, golol awtiis u bi'dire mele. I'daasenyi, chirri etoo gololoo bi'dir leeyahe, 'deerka gololaas etaas ka a bi'dir gon.
[15] A mehe chirri at gololi at taham ka etaahki Kiriisto rummeeste bolokh ikeento, wihi kiwoyo 'doonin mee gon. Tab gi'de, gololi at taham uus etaahki Kiriisto rummeeste Kiriisto jeentetiis iyumuy uskulaan!
[16] Wihi kileehaaggan, uus etoo addan i'di wohoo suuje ikhaatin.
[17] A mehe dakhi Waakh ka wihi khumman golol ichoow wihi ladamo menye, a innohi fiffissane nebey khabno. Jeenteti inno ichoow Rubeyti Munyee wohoo kalday inahuu la hamaad a 'hella.
[18] Eti tuummane i'daasu Kiriisto ifalo la, Waakh a kahamaada, weeli enenyet laka a jilhaata.
[19] Maantaka taba gi'de wihi nebey keeno ichoow wihi inno iskamiigoonno hol a kadowno.
[20] Jeenteti golol on u hili Waakh uuskulaanna. Golol bi'dire mele, i'daasenyi a suuj chi' walahbaaw at taham etoo addane koo Kiriistee tarraantarrichaan.
[21] A deefta chirri jid liiumhane ommos farsoti sabiib liidamine ommos wohoo addane etaahki Kiriisto rummeeste tarraantarricho liiyeelin.
[22] Wihi wahanyeyyohaas miinsane at rummeysatti, ati ichoow Waakh on isleegarda. Eti Waakh imaalo a ki haaggi us gooche ka uskeel isikagoon.
[23] I'daasenyi eti wohoo us yaham uurlammaal kakhabo chu'us wahaas yuhum, Waakh uskeele igoocha, a mehe wihi us yaham ka Waakh ma kakhuufo. A mehe wihi inno garanni, cha'at walahbaaw at yeesso ka Waakh ikakhuufin, at uskeele yeessa.