[1] 'Deerka wihi an worsadi, Waakh 'doo'diis a 'dii'de? Mele, i'daaru laka ma 'dii'din! Ani rubeyteey a 'doo'di Issiraayele, hiiy Aburaahame kiimiyye, a yaaf Beenjameen.
[2] Waakh rumanka sag us 'doo'diiski goorat usu on uumaccho ka garte i'dii'de mele gon. Atin laka rumanka Chiirnaanneti Waakh goyaka maanti eti Waákh íyeyyeedo Eliiya layadeeh Waakh hawwaaste us yaafohi Issiraayel wihi ittaawe kacheekte a garattaan. Eliiya wihi us yidah a mehe ya,
[3] “Kamur icho 'doo'daahki kiyeyyeedo a bakkicheene, chalagtaahti hoola lakasoorriyoocho laka jejjebcheen. Ani kalday on soo'hade, toro ani laka ogoose i'doonaan.”
[4] Kamalda bal, wihi Waakh Eliiya isoolaabe a mehe? “An mejeli alif teebeenye Baali waakkhi beenaate iwahan, iche isisoo'haache.”
[5] Toolla laka a i'daas one, Waakh haaggiiski buurenye inno imunneynan ka, 'doo'doo rucchule soobahsate, isisoo'haache.
[6] 'Doo'da Waakh soobahsate jeenteti icho wohoo haaggan iyeeleen menye, a jeenteti haaggi Waakhe buure on. A mehe chirri Waakh wihi enenyet yeele yeyo, kootte 'deerka i'daakka haaggaas kola haaggi Waakhe buure mee gon.
[7] Mehe 'deerka nidaahe? 'Doo'di Issiraayel wihi us weyti yowte ma 'heline, i'daasenyi 'doo'di Waakh soobahsate iche waha 'hele. 'Doo'di addane Waakh ikakhuufin Waakh matahenyeticho a dagahnooche.
[8] I'di liichiiruu, “Waakh matahenyeticho saggoo icho ikamalanne iyeele, indohicho saggoo icho walah ikaargin iyeele, dogohicho la saggoo icho walah ikadaagin iyeele, ichoowka maanta laka waha a i'da on.”
[9] Karnati Dawuud layadeeh wihi us yidah, “Waakh ba 'doo'da gololi us yaham ka angey gessa, khabta. Genney dagah halgo gela, sinati imasse taham.
[10] Genney indohicho 'duu'damaane, icho il argiwwaayaan. Toro la genney huleesicho dabarreticho jirtuu jebcha.”
[11] Toro wihi an worsadi, 'doo'di Issiraayel goorat a tarraantarrate ichoowka sookahin agaafte? Mele! I'daaru laka i'daas mee. Jeenteti 'doo'di Issiraayel Waakh idaagiwwaaye, iche Waakh 'doo'di yaafohi Ya'huud ieheynan iribe, 'dee 'doo'di Issiraayel inaafi us 'doo'di yaafohi Ya'huud ieheynan us kiinaafo gesse.
[12] I'daasenyi jeenteti 'doo'di Issiraayel Waakh idaagiwwaayuu 'doo'di harra tuumman buuhi buure a 'hele. Toro la jeenteti icho buuhi Waakh iwaayeen u, 'doo'di yaafohi Ya'huud ieheynan kamurroonki rubeyeet a 'hele. 'Deerka maanti tiri 'doo'di Issiraayel labuuhiche kamurroonkicho buuhoo geeddohenye keena!
[13] An atinhi yaafohi Ya'huud ieheynane atin leeyyeeda. An a ergaanoti yaafohi Ya'huud ieheynane, toro la hila wohoo weyti khummane iekkaacha.
[14] An i'dane yeela a mehe anihi 'doo'deey inaaf gesso khajjeela, 'dee saggoo an gaasichokoo iribo 'hola.
[15] I'di tahe maanti Waakh 'doo'di Issiraayel 'dii'de, iche 'doo'di addane harrata ankiis keene. A haaggoo geeddohe maanti Waakh 'doo'di Issiraayel khaatti? A i'doo 'doo'di goorat tuume omoot kasookaho!
[16] Chirri goonanki oraate makaate Waakh liibahche munya yahe, makaatetaas tuumman a munya gon. Toro la chirri hiiyyassi geey munya yahiin, liikhimohi geeyaas a munya gon.
[17] A i'di liikhimohoo geeyi oolife gos goyaka bahe geeyaas lakasoojebche. Atinhi 'doo'di ilassi addane i'di liikhimohi geeyohi oolife yibaat u, a atin lasookhaate geeyi gos goya kabahe atin lakakabe. Maantaka atin laka subakki hiiyyassi geeyaas oolif kayamiit a 'hessaan. Geeyaas oolif la a i'di 'doo'di Issiraayel.
[18] Toollaka atinhi liikhimohi geeyi oolife yibaate, 'doo'di liikhimohi Waakh jebchee, sarcho iisgeenna. Chirri atin sarcho isgeessaan waha abda, atin alah hiiyyay menye a liikhimo on. A mehe hiiyyaye liikhimo goollicha.
[19] I'daasenyi, 'deerka mehe tadeehiin ya, “Liikhimohaas goorat a lajebche, 'dee ani meel liiyeele.”
[20] A eysiisseen! I'daasenyi icho jeenteti liijebche, a jeenteti icho Waakh ikakhuufin. Atin la jeenteti atin geey ikakabantahiin, a jeenteti atin Waakh ikakhuufteen. Maantaka, taba gi'de rannyaat akhabina, Waakh karoora.
[21] A mehe Waakh chirri goorat liikhimohi 'hor geey kijire i'diin, atin laka ma atin 'diicho gon.
[22] Mujjum saggi Waakh uur i'dabakhyahe us uskeel ikagarrahsan isiyeya. Waakh 'doo'di uskeel kaassohti a hukkuma, sina igoocha. Atin la uuri 'dabakhenye atin tusa, chirri atin saggi us i'doono isohattaan. Koli addan la, atin laka Waakh a atin jebcha, atin roga.
[23] 'Doo'di Issiraayel la chu'us uskeeliiski us Waakh ikakhuufin soo'diiche, Waakh icho laka a inokhta, geey kakaba. I'di tahe Waakh geeyi us toro atin kakabo a yabuu'd.
[24] Atinhi 'doo'di ilassi addane a i'di liikhimohi geeyi oolife yibaat lakasoojebche, geeyi oolife gos goyaka il lagesse, lakakabe. Waha la a wihi 'hoolenye wihi layeelo mee. I'daasenyi 'doo'di Issiraayel a i'di geeya oolife gos goyaka il lagesse. Geeddoo meheenye 'dabakhtahe, chi' liikhinti geeyaas geeyi leh on lakakabo.
[25] 'Doo'd Kiriistokaaw, runtoo dagsane an atinhi abattaan 'doono iche jirta, uus 'dee atin wihi atin tahiin ka weyti serey isgeenne. Waha la i'dicho a i'da, 'doo'doo Issiraayel matahenyeticho a lamiigooche, i'daasenyi 'dee maanti 'doo'di yaafohi Ya'huud ieheynan tiricho buuhsame, matahmiigtichotaas a massatta on.
[26] Waakh 'deerka 'doo'di Issiraayel tuumman a riba, i'di liichiiruu, “'Doorribe Saayone kasoobaha. Ulla nyaakhuti hiiy Yaakoobo kayimiy uskeelicho tuumman a kasoolaaba.
[27] Waha la a ayyinteeyti an icho igooche, maanti an uskeelicho tuumman kabahcho.”
[28] Jeenteti 'doo'di Issiraayel Wori Haaggan i'dii'duu, icho a chiiyti Waakh. Wahaas la atinhi 'doo'di ilassi addan a atin irooyyahiin. I'daasenyi jeenteti Waakh 'doo'di Issiraayel isoobahsatuu, Waakh weyti icho 'doona. Waha la a jeenteti ayyinti us aacchinyeticho iayyiche.
[29] I'di tahe Waakh 'doo'di us siintiis i'daanu siicho ichoow 'doo'di us waho ka maliis ma urgiyicho.
[30] Atinhi 'doo'di ilassi addan goorat Waakh raahin a 'dii'ddeen. Toolla la 'doo'di Issiraayel Waakh a raahiwwaaye gone, Waakh uur a atin isoonugleeste.
[31] Saggaas on u, 'doo'di Issiraayel toolla Waakh raahin a 'dii'da. Waakh uur a atin isoonugleeste gone, icho laka uur a inugleesta.
[32] Maantaka Waakh weeli enenyet tuumman 'doo'di lahide usu raahin 'dii'de kayeele. Ulla i'dane yeela, 'dee icho tuumman uur inugleesta.
[33] 'Hay! Wihi Waakh garti ichoow kharati Waakh a too geeddohe? Enenna a buure! Ayyo maanta wihi Waakh gooche 'dubicho bahcha? Ebba! Toro la ayyo jitiis garta? Ebba!
[34] “Ayyo mali Kamur garta? Ommos ayyo Waákh waanicha?”
[35] “Ayyo injire Waakh wohoo siiche, 'dee Waakkhi isooguto suga?”
[36] A mehe Waakh a uumacchoti walah tuummane, usu on ka walah tuumman lasoouume toro la walah tuumman usu liisoouume. Jirtuu tuumman usu a lakoolicho. Aamiin.