[1] Maantaka 'doo'di icho ichoow Yeesso Kiriisto ba wohoo kalday yahiin, Waakh icho ma hukkumo, sina la ma igoocho.
[2] I'di tahe runti gaan Rubeyti Waakh Yeesso Kiriisto ka jiro kikeenta, runtaas gaan la uskeeli omoot keeno a kaasoofurta.
[3] Wihi amurre Muusa yeelin iubaa'dan jeenteti wihi uurasseen goya kijiro uskeel imoono 'darsicheen u, Waakh a yeele. Waakh weeliiski kaldaye sooerge, soorriyoti uskeel yitah. Weeliiska la i'di weeli enenyet u sarti weeli enenyete uskeel lehe khabe. Waakh 'deerka uskeeli weeli enenyet sartiis kijiro hukkume sina igooche,
[4] 'dee jiroteen ka wihi fiffissane amurretaas inno ka'doonto tuum labuuhicha. A mehe wihi uurasseen goya kijiro uskeel imoono ichoow jiroteen ma israahaane, Rubeyti Waakh ichoow jiroteen a israahaan.
[5] 'Doo'di jiroticho ichoow wihi uurassicho goya kijiro uskeel imoono israahaan, wihi icho kamassaan a wahaas uurassicho goya kijiro uskeel imoono on. I'daasenyi 'doo'di jiroticho ichoow Rubeyti Waakh israahaan, wihi icho kamassaan a wihi Rubeyti Waakh imoonto.
[6] Malassi 'doo'di wihi uurassicho goya kijiro uskeel imoono dakhtaan, omoote 'hela. I'daasenyi mali Rubeyti Waakh dakhatti, jiro ichoow nebeye 'hela.
[7] A mehe malassi 'doo'di wihi uurassicho goya kijiro uskeel imoono a chiiyti Waakh. Malassi i'daase amurreti Waakh ma raahaane, toro la raahin ma yabuu'diin.
[8] 'Doo'di wihi uurassicho goya kijiro uskeel imoono dakhtaan, koloo kalday laka Waákh ma kahamaadicho.
[9] I'daasenyi Rubeyti Waakh goytiinna fiddiita gone, 'deerka wihi uurassiin goya kijiro uskeel imoono ma atin antaane, Rubeyti Waakhe atin anatta. Eti tuummane Rubey Kiriisto ikhabin koo Kiriisto mee gon.
[10] Kiriisto goytiinna kijira gone, chirri sartiin jeenteti uskeel u tamuut, jeenteti Waakh 'doo'di fiffissan atin iekkaachuu, Rubeyti Waakh jiro a atin siissa.
[11] Toro la chirri rumanka Rubeyti Waakhe Yeesso omoot kasookihisse goytiin fiddiito, saggaas Waakh Kiriisto omoot ikasookahche, saggaase Rubeyta goytiin fiddiito ka, sartiinta tamuut jiro ikasoolaaba.
[12] Maantaka 'doo'd Kiriistokaaw, wihi rumanka Waakh inno ka'doono, uus koloo kalday laka jiroteen ichoow wihi uurasseen goya kijiro uskeel imoono israahin.
[13] A mehe cha'at wihi uuraah goya kijiro uskeel imoono on raahto, rumanka a tamuut. I'daasenyi cha'at Rubeyti Munyee ka uskeeli uuraah imoono tagiis a jirta.
[14] I'di tahe 'doo'di tuummane Rubeyti Waakh woyto, a nyaakhuti Waakh.
[15] I'di tahe Rubeyti Waakhe atin 'hesseen ti toro bow'dati bur'dowto atin kayeesso mee. Atin Rubeyti Waakhe i'di teyyanohi Waakh atin kayeesso iche 'hesseen. Inno la Rubeytaas ka Waakh a iooyna, “Aabba, Aabbahaanya!” inadeeh.
[16] Rubeyti Waakh ichoow rubeyoheen saggi inno rumanka nyaakhuti Waakh inahe a isleecheekaan.
[17] Inno a nyaakhutiissa gone, wihi Waakh nyaakhutiis siicho a mu'dannahe. Toro wihi Waakh Kiriisto siicho laka a lee'hella. A mehe chirri rumanka inno sinati usu lakawaariche leegisanno, weynaanti usu laweynaacho laka a leegisanna gon.
[18] An wihi an kamalde a waha, sinayyohi toolla harrata ka inno khabno ichoow weynaanti buurenye Waakh 'dee inno isoobabbakkaahicho ma isiyeyno.
[19] Harrati goorat Waakh soouume tuumman maanti Waakh 'doo'di rumanka nyaakhutiis yahe soobabbakaahicho weyti sugta.
[20] I'di tahe harrataas Waakh soouume ti suusahto iche lakayeele. Wahaas la wihi iche 'doonto menye, a wihi Waakh gooche. I'daasenyi khajjeeli lakhabe kalla,
[21] harrataas Waakh soouume tuumman suusakki hide a lakasoofura, nyaakhuti Waakhe jiroti haaggane suusah hidin iubaa'dan 'hele ikhayta.
[22] Wihi inno garanni, harrati goorat Waakh soouume tuumman ichoowka uliba, i'di wohoo chiisenye bolkhuu, weyti ooyta.
[23] Harrataas Waakh soouume kalday ma ooyto, innohi gurnaanki oraate Rubeyti Munyee khabno laka a ooyna. Geeddi inno ibeenki Waakh nyaakhutiis inno kayeelo toro la us sarteenti omoote hidde ribnaanki 'da'ddaboot ribo sugno, goyteen ka a ooyna.
[24] A mehe Waakh a inno ribe, khajjeeli wihi soosohti inno siiche. I'daasenyi chirri inno wihi inno berri khajjeello indoheen kaagarro, waha khajjeel mee gon. Etoo wihi us 'hele a khajjeela?
[25] Chirri inno wohoo inno i'helin khajjeel kakhabno la, inno a garrahsanna, wahaas sugna.
[26] Toro Rubeyti Munyee laka 'darriteen ka a inno gargaarta. Wihi tahe, inno saggi inno Waakh iwahanni ma garanni. I'daasenyi Rubeyti Munyee iche Waakh inno ihawwaassatta, wihi iche ooyto Waakh idowto la, wihi af ka idaahan layabuu'd mee.
[27] Waakkhi uurassi weeli enenyet fiiricho la, mali Rubeyti Munyee a garta, a mehe wihi Rubeyti Munyee 'doo'di Waakh Waakh ihawwaassatti ichoow wihi Waakh 'doono a israahaan.
[28] Wihi inno garanni a mehe ya, walah tuumman ka Waakh 'doo'di usu 'doono wihi haaggan a iyeela. 'Doo'daas la a ki Waakh saggi us igooche iwahe.
[29] I'di tahe Waakh uumaccho on ka 'doo'di kiise garte, toro la 'hor on 'doo'daas saggi us i'di Weeliis ikayeelo gooche. Ulla i'dane yeele, 'dee Weeliis 'doo'di ittaawenye Kiriisto rummeeste goyaka teyyan yateeh.
[30] Toro la 'doo'daas us 'hor saggi us i'di weeliis ikayeelo gooche, wahe. 'Doo'daas us wahe la 'doo'di fiffissan iekkaache. 'Doo'daas us 'doo'di fiffissan iekkaache la, saggi us weynaantiis ileegismo iayyiche.
[31] Haagga tuumman a khabna gone, 'deerka mehe nidaahe? Chi' Waakh ankeen jiro, ayyo inno tirrima?
[32] Waakh Weeliis laka ma inno karimmanne, soorriyoteenna yitah! Waakh Weeliis a inno siiche. Maantaka haaggiiski buure ka walah tuumman usu a inno leesiicha.
[33] Icho ayyo maanta 'doo'di Waakh rubeytiis soobahsate uskeeloo kacheekta? Waakh rubeytiis 'doo'daas 'doo'di fiffissane iekkaache.
[34] Ayyo uskeel inno igoocha? Yeesso Kiriistohi yumuyye, wahaas 'dirihicho ka la omoot lakasookahche, toolla la anki dahanti miigeete Waakh jiro, Waakh a inno ihawwaasta.
[35] Mehe inno ichoow 'dooninti Kiriisto inno 'doono seley inno bahcha? Sinati inno 'hello, ommos wihi miigenye inno kijirro, ommos sinayyohi inno loomhicho, ommos raarah, ommos miskiinnoon, ommos wohoo inno bur'doocho, ommos omoot, wohoo kaldaye inno ichoow 'doonintiis ba seley inno bahcho ma jiraan!
[36] I'di liichiiruu, “Nah jeentetaah u kol tuumman omoot on afiche raahna, i'di iiyti khalme liiwoyo, iche nah liiwoya.”
[37] Mele gon! Chirri wahanyeyyoha tuumman inno isoobahaan laka, inno 'dooninti Kiriisto inno 'doone ka, a 'doo'di tuum soorin leh!
[38] An wihi an tissibo a mehe ya, walah jirtuu dakkhan 'dooninti Kiriisto inno 'doono inno kagoocho mele. Omoot ommos jiro ommos herti Waakh ommos ginnayyo ma inno kagoochaan. Wihi toolla jiro ommos wihi sooyomboocho ommos miigti Seytaan laka ma inno kagoochaan.
[39] Wihi sereyta daayan sartiis kijiro ommos harrata iliche kijiro laka ma inno kagoochaan. Wihi Waakh soouume tuumman goyaka laka, wohoo kaldaye 'dooninti Waakh Yeesso Kiriistohi Kamureene ka inno 'doono inno kagoon yabuu'd ma jiraan.