[1] Maantaka Waakh kakhuufnaanki inno usu kakhuufno ka, 'doo'di fiffissane inno iekkaache gone, Yeesso Kiriistohi Kamureene ka Waakh nebey a ikhabna.
[2] Kiriisto ka ichoow kakhuufnaanki inno usu kakhuufno ka, haagga Waakhe buurenye inno 'helle iche katololla. Inno la khajjeeli weynaanti Waakh inno siisso iche keeylajna.
[3] Wahaas kalday menye, sinayyohi inno 'hello laka a keeylajna. I'di tahe wihi inno garanni, sina a inno gargaarta, 'dee garrahsanna.
[4] Garrahsi la jiro ka sohoti haaggane Waakh jilhaati keena, sohota haaggan la khajjeele keena.
[5] Khajjeela inno khabno ka, rubeye ma inno jebto. I'di tahe Waakh Rubeytiisti Munyee a inno siiche, 'dee iche la 'dooninti Waakh rubeyoheen goya buuhissa.
[6] A mehe geeddi inno uliba miigtoo rucchule inno iskaribno awteen u ikhabin laka, Kiriisto innohi Waakh 'dii'dne a inno iyumuy. Waha la a maanti Waakh on gooche.
[7] Weyti 'hool tahe chirri etoo issoobahcho meessi etoo fissan kayamuut. I'daasenyi etoo a geeddi us issoobahcho us meessi etoo weyti haaggan u roorro laan kayamuut.
[8] I'daasenyi Waakh saggane geeddi us inno 'doono inno tusa, 'doo'di uskeel leh nahaayi, Kiriisto inno iyumuy.
[9] Diig Kiriisto ka, Waakh 'doo'di fiffissane inno iekkaache gone, geeddoo meheenye Kiriisto ka holi Waakh inno lakariba?
[10] I'di tahe inno chiiyti Waakh nahaayi, Waakh omootti Weeliis ka ankiis inno keene. Toolla Waakh ankiis inno keene la, geeddoo meheenye jiroti Weeli Waakh ka inno lariba!
[11] Waha kalday la menye, Yeesso Kiriistohi Kamureene ka Waakh a keeylajna, a mehe Kiriisto ka Waakh ankiis a inno keene.
[12] Maantaka uskeel maanti goorat us harra soogele etoo kaldache keene, uskeeli etaas la omoote 'dub kasookhabe. Omoottaas weeli enenyet tuumman itaa'hte, a mehe weeli enenyet tuumman uskeel a yeele.
[13] Rumanka geeddi amurre Muusa enenyet liisiin laka, weeli enenyet tuumman uskeel on yeele, i'daasenyi inti amurre ikajirin, uskeel ma leekkaacho gon.
[14] Chi'iche i'daas tahe laka, uus maanti Aadam harrata kijire ichoowka maanti Muusa, omoot on weeli enenyet dakhatte. Aadam amuri Waakhe raahiwwaaye. 'Doo'di uskeeli Aadam yeele iyeelin laka, omoot on dakhatte. Toollaka Aadam a iyookkoti Kiriistohi yomboka yimiy.
[15] I'daasenyi siinta Waakh inno siiche i'di amurreti lajebcho Aadam yeele mee. A mehe chirri 'doo'di ittaawe amurreti lajebcho etaas kalday yeele ka tuume, haaggi Waakhe buurenye inno imunneynan ichoow siinta eta kaldaye Yeesso Kiriisto keene geeddoo meheenye 'doo'di ittaawe ikakhubta.
[16] Toro siinta Waakh ichoow wihi uskeeli etoo kalday yeele keeno i'doo kalday mee. A mehe inkoo Aadam uskeeloo kalday yeele, Waakh usu a hukkume, sina igooche. I'daasenyi inkoo uskeel buuraate, siinti inno imunneynan timiy. Siinta ka la Waakh 'doo'di fiffissane inno iekkaacha.
[17] A mehe jeenteti amuroo kaldaye lajebcho goorat eta kalday yeele u, omoote etaas kalday ka tuum a inno dakhatta. I'daasenyi wihi Yeesso Kiriisto inno iyeele, geeddoo meheenye wahaas kussanyahiin. Siinta haaggi Waakhe buurenye inno imunneynan ichoow siinti us 'doo'di fiffissan inno iekkaacho a inno siiche. Siinta ka 'doo'd jiroti soorinnaane 'hela.
[18] 'Deerka saggaas amuroo kaldaye lajebcho hukkunki Waakh weeli enenyet tuumman hukkumo sina igoocho keenuu, saggaas on u, wihi kaldaye fissane etoo kalday yeele keeneen ka Waakh weeli enenyet tuumman 'doo'di fiffissane iekkaacha, jiro siicha.
[19] A mehe saggi etoo kaldaye Waakh raahin 'dii'de ka, 'doo'di ittaawe 'doo'di uskeel lehe lakayeele, saggaas on u etoo kaldaye Waakh raahe ka, Waakh 'doo'di ittaawe 'doo'di fiffissane kayeela.
[20] Amurre Muusa a lakasookhaye 'dee amurreti lajebcho kakhayanta, i'daasenyi maanti uskeel kakhayme, weyti 'dirihiissa haaggi Waakhe buurenye inno imunneynan kakhayme.
[21] I'da ka saggi uskeeli weeli enenyet yeele omoot ikeene idakhtuu, saggaas on haaggi Waakhe buurenye inno imunneynan weeli enenyet idakhta, 'dee Waakh Yeesso Kiriistohi Kamureene ka 'doo'di fiffissan inno iekkaacha, toro jiroti jirtuu imassan 'hella.