[1] 'Doo'd Kiriistokaaw, an atinhi amurre Muusa wihiche garattaane atin leeyyeeda, saggi amurretaas enenyet geeddi us jiro anto ikakhabto ma garattaan a?
[2] A mehe aranti ladiste, amurretaas mehe tadeeh ya, geeddi arankiche on jiro, arankaas kaldach on lakahide. I'daasenyi chirri arankiche buje, amurreti mindischo miinsan ka aranta a lafure gon.
[3] 'Deerka chirri arame geeddi arankiche jiro arankoo addan leefiddiito, arantaas uskeeli iche aranki kiche ieheynan leeu'durto iche gesse. I'daasenyi chirri arankiche buje, amurretaas mindischo miinsan ka a lafure. Chi' arankoo addan diste laka uskeel iche yeesse mele.
[4] I'daasu laka 'doo'd Kiriistokaaw, atin omoot Kiriisto ka amurre Muusa kola ma atin dakhatti, a mehe atin toolla a koo Kiriistohi Waakh omoot kasookahche, 'dee atin la wihi Waakh 'doono dessaan.
[5] A mehe geeddi wihi uurasseen goya kijiro uskeel imoono inno dakhtaan, amurretaas ildeerroti suujenye goyteen kijirto iche neybaasse, sarteen woyte, gurnaanki omoot keeno khabne.
[6] I'daasenyi toolla amurre Muusa ma inno dakhatti. Amurretaas ka a inno lafure, 'dee kola jiti raagane goorat amurretaas chiiran inno iwoyte ma isohanni, jiti husube Rubeyti Munyee inno abisse iche raahna.
[7] Toollaka wihi inno elanni kamalanni. Amurre Muusa rubeyche a uskeele nadeeh? Mele! I'daaru laka i'daas mee! Amurretaas rubeycheeda ani wihi uskeel rumanka yahe iabisse. A mehe chirri amurre, “Wihi etoo addan amaanjeeran,” iidaahan, ani rubeyteey wihi etoo addane lamaanjeerti suujoonkicho ma abdi ba.
[8] I'daasenyi uskeel aytoo amurretaase kasookoosse, maanjeeroti nool goyteey kadele. A mehe chi' amurre ijirin, uskeel a wihi yumuy.
[9] Ani rubeyteey goorat 'hor geeddi amurre Muusa wohoo ileeheynan laka a jire on. I'daasenyi inkoo an wihi aytoo amurre 'dii'ddo abde, iche uskeeli nool yeelin 'doone.
[10] An a i'doo an umuy. Aloha amurre kootte incheenka jiti jiro ikeeno, iche ba jiti omooteete ikeenta.
[11] A mehe uskeel alohaas amurre kasookoosse, iekkeeste alohaas amurre ka iyigis.
[12] Maantaka amurre Muusa rubeyche a munya, alohiche laka a munya, a fissanyahiine, toro la a haagganyahiin.
[13] 'Deerka amurretaas haaggane ani omoot ikeente? Mele, i'daaru laka i'daas mee. Uskeele i'daas yeele, amurretaas haaggan kasookoosse, omoot keene 'dee uskeel saggi us rumanka uskeel iyahe laarga. Toro la alohi amurre saggi uskeel rumanka wihi weyti suuje iyahe iche inno tusaan.
[14] Inno tuumman saggi amurre Muusa Waakh ikatimiy a garanna. I'daasenyi 'dabakkhi weeli enenyete an khabo Waakh ma kayamiite, ani i'di bow'duu uskeele liiororiche.
[15] Ani rubeyteey wihi an yeelo ma gardi ba. A mehe wihi an 'doono ma yeelo, wihi an 'dii'ddanahe on yeela.
[16] Toro la chirri an amurretaas ka saggi wihi an yeelo suuj iyahiin abde, waha mehe tusaan ya, an saggi amur ihaagganyahe a rummaacha.
[17] I'da ka ani mee suujoonka yeelo, i'daasenyi a uskeeli goyteey kajiro.
[18] Wihi an tissibo, walah haaggane goyteey kijiro mele, saggaas on u wihi uureey goya kijiro uskeele imoonaan. A mehe an haage yeelin imoona i'daasenyi yeelin ma abuu'd.
[19] A mehe wihi an yeelo, haaggi an yeelin 'doono menye, suujoonki an yeelin i'doonin iche yeela.
[20] Maantaka chirri an wihi an yeelin i'doonin yeelo, waha mehe tusaan ya, ani mee wahaas yeelo, uskeeli goyteey kijiro, iche wahaas yeela.
[21] Maantaka runta gaane jiroteey goyaka abde. Chirri an wihi haaggan yeelin 'doono tuumman, suujoon la garabaaya on raaha.
[22] A mehe ani maleey goyaka weyti amurreti Waakh kahamaada.
[23] I'daasenyi runtoo gaane miilassi sarteey hil kahaaggisso a jirta. Runtaas gaan ichoow runti gaane maleey 'doono a i'doo icho isdihaan. Toro la runtaas gaane sarteey goya kijirto bow'dati uskeeli goyteey kijiro ikayeessa.
[24] Wooy! Mal a ibuuhiche! Ayyo sarta omoot igeesso ikasoofura?
[25] Waakh weyti kala'd ilaaba! A mehe Yeesso Kiriistohi Kamureene ka, Waakh a isoofure. Kola 'deerka saggi an ijiro a i'da, maleey ka an a bow'dati amurreti Waakh. I'daasenyi wihi uureey goya kijiro uskeel imoono ka, ani a bow'dati miigti uskeel.