[1] Yeesso toro beyti Gaalilaaya afiche ka, Wori Haaggan enenyet abche. Jeenteti ururi weyti buure iyimiy u, Yeesso koobanhoo goya koorronte, enenyet la bey afiche khaariche, dagansate.
[2] Enenyet mammaho ka wihi buure abche, wihi us yidah,
[3] “Dagansada bal! Etoo gos khabo a irte ilmo harra kachibaa.
[4] Ilmoha us taa'hicho, gaasoo jit goya kadiheene, chimbiro la yimaateene, yumheen.
[5] Gaasoo ilassi ng'aajjeenye harrati rucchul khabto kadiheen. Wahaas dowwa on soobaheen, a mehe harra rucchulee.
[6] I'daasenyi chi' orrahe soobahte ka, orrahe geeyohaas soobahe gubte. Hiiyyaye laa yihiin gone, angageen.
[7] Gaasoo laka inti geeyohi rurrucchule kudah khabo kadiheen. Geeyohaas la geeyohi soobahe afcheene 'deerka gurnaan icho deleen mele.
[8] Gaasoo la inti harrati haaggan khabto kadiheene, mujjum baheene, weynaateene, gurnaan deleen. Gaasoo kol tomon seyyah deleene, gaasoo kol tomon lih deleene, gaasoo laka kol kudoo deleen.”
[9] Yeesso 'deerka wihi us yidah, “Eti dogo khabo, a daago gi'de!”
[10] Yeesso inkoo us keley yitah, ergaanotiisti tomon ichoow lammee ichoow 'doo'doo usu sooraahe iyimiyye, wihi mammahohaas yihiin worsateen.
[11] “Waakh atine wihi dagsane dakhi Waakh miinsan atin siiche. I'daasenyi 'doo'di kharaat walah tuumman ka a liimammahta,
[12] 'deerka, “ ‘Walah a yeyaane, yeyaane, i'daasenyi jirtuu ma gelaan. Toro la a dagansataane, dagansataane, i'daasenyi jirtuu ma abtaan. Chi'iche i'daas ieheynan, uskeelicho a kasoonokhanne, Waakh la uskeelicho ikakuta.’”
[13] Yeesso 'deerka wihi us icho iyidah, “Chirri atin mammahta wihi iche tahe igaran, sag 'deerka atin mammahohi addan wihicho iabattaan mele gon.
[14] Etaas gos khabo, a eti Yeedi Waakh taa'hicho.
[15] 'Doo'd gaasoo a i'di ilmohi jit lakachibe. Waha a inti Yeedi Waakh lakataa'hicho. Uus icho Yeedi Waakh daagaan, Seytaan chirraas on yamiite, yeedaas icho daageen kakhaata.
[16] 'Doo'd gaasoo la, a i'di ilmohi ilassi ng'aajjeenye harrati rucchul khabto lakachibe. Yeedi Waakh uun icho daagaan, hamaadi buure ka khaattaan.
[17] I'daasenyi hiiyyay icho khabaan mele, mujjum ma tolossataan. Maanti jeenteti Yeedi Waakh u sinatoo isoobahte ommos sina loomhiche, dowwa on soodihaan.
[18] 'Doo'd gaasoo a i'di ilmohi inti geeyohi kudah khabto lakachibe. Icho Yeedi Waakh a daagaane,
[19] i'daasenyi dowwa on wa'dwaa'di harrata ichoow 'damaanki kamurroon ichoow wahanyeyyohi addane liimoono ba Yeeda afchaane, gurnaan icho delaan mele.
[20] 'Doo'd gaasoo a i'di ilmohi harrati haaggan lakachibe. Icho Yeedi Waakh a daagaane toro khaattaane, gurnaanki buure delaan. Gaasoo kol tomon seyyah delaane, gaasoo la kol tomon lih delaane, gaasoo la kol kudoo delaan.”
[21] Toro wihi Yeesso iyidah, “Etoo taa a bolkhicha, 'dee baakhuul kaankuba ommos siriir iliche gessa? Taa wohoo menya korcho?
[22] A mehe wihi dagsan a lasoobahcha, wihi oboobsan la 'dowe liisoobahcha.
[23] Chi' etoo dogo khabo, a daago gi'de!”
[24] Toro wihi us iyidah, “Waha atin daagtaan la, weyti dagansada. Geeddi atin 'doo'di addan iyeessaan geeddaase atin liiyeela, toro la 'dirihiis atin liiyeela.
[25] Eti tuummane wihi dahan lagesse mujjum woywoye a liikakhaya. I'daasenyi eti wihi dahan lagesse mujjum iwoywoyin, wihi us khabo laka a lakakhaata.”
[26] Yeesso toro imammahte, wihi us iyidah, “Mammahtoo addane dakhi Waakh cheekto talla. Etoo ilmohi golole il gessa, kataba.
[27] Maalim ichoow ibeen us u'duryeey ommos neybaayyeey ka ba, ilime a bahta one weynaatta, chu'us saggi iche ibahto igaran laka.
[28] Harra on gurnaan bihissa, kolooraat la geeye bihissa, geeyaas 'deerka ilim dela.
[29] Uu' gurnaan bissaati on yamiite warhanti gurnaan lakagoocho ka goocha, a mehe a maanti gurnaanee.”
[30] Toro mehe iyidah ya, “Kamalda bal, dakhi Waakh a koo meheenye nadeeh? Toro la mammahtoh i'di u' yahe dowdowta?
[31] Dakhi Waakh a i'di ilinti geeyi dahare, iche la ilmo goyaka a ilinti weyti rucchule il lagesso.
[32] Maanti il lagesse iche soobahte la, gos goyaka geeyi geeyo tuumman kabuurenye liikhimohi burbuure khabo tateeh. Chimbirohi saraat la oosintiis kafiddiyaan.”
[33] Yeesso mammahohi ittaawenye tan iyoog ka, wori Waakh geeddi icho aban yabuu'diin icheeke.
[34] Enenyet mammah on menye, wohoo addan walah ma kaabin. I'daasenyi maanti icho keley yahiin, abattitiis mammahohaas wihi icho yahiin a icheeke.
[35] Maalinkaas geleb ka, Yeesso abattitiis, “Beyta Gaalilaaya maahno, aficheki 'diri a iranni,” iyidah.
[36] Abatti Yeesso i'diis yahaayi khaatte kooban kaleedihte, dowte, urur bey afichekaas katabte. Koobanohoo addan laka kicho a leejireen.
[37] Hafaroo buure la yimiyye bicche irtoo uskul bahcheene, kooban 'dollo jaheene, ichoowka bicche kooban goya isootabeene, buuhin leheet.
[38] Yeesso la kootte reentoo 'da'ddabakhenye matah gessate, kooban 'dubichekuus ka a ur'da. Abatti Yeesso kihisse wihi iche itidah, “Eti weenoow, innoha bicche inno khaataan laka aw ma inno ikhabto ba?”
[39] Ulla sookahe, hafar leejaakhe, ir “Gammadicha! Yaasa!” iyidah. Hafari kootte ir kahcho, baabe beye rukkuy goosse.
[40] Wihi us abattitiis iyidah, “A i'doh i'duu ibur'dowteen? Atin uliba Waakh ma kakhuuftaan a?”
[41] Iche tuumman weyti nahte, wihi iche isworsatte, “Icho eta a ayyo? Hafar ichoow ire laka yeediis daagaan?”