[1] Chirra icho ilkerengeetti weene Yeerusaleem isoodowwaateene, ilkerengeetti Be'difaage ichoow Be'daaniya Hali Geeyohi Oolif haggee yimaateen ka, Yeesso abattitiistoo lammee ergate,
[2] wihi usu icho iyidah, “Ilkerengeetti ortiin kijirto irda, uus atin gessaan la inkuraarruhoo injire liirarine hidan a 'hessaan. Soofura inta keena.
[3] Chirri etoo, ‘A i'doh i'da iyeessaan?’ atin worsate la, mehe itadeehiin ya, ‘Kamure 'doona, inkoo dow on la inta isoolaaba.’ ”
[4] Iratte, inkuraarruhi afafhi min kahidan 'hesse. Geedda iche furto,
[5] 'doo'doo intaas toollo, “Inkuraarruhaas atin furtaan, a i'doh?” worsate.
[6] Iche la wihi kootte Yeesso iyidah tidahye, 'doo'd la soo'diiche.
[7] Chirri icho inkuraarru Yeesso ikeeneene, kabuu'ddeticho kagaadeen ka, Yeesso koorronte.
[8] 'Doo'di ittaawe kabuu'ddeticho jit kagolge, gaasoo la seytohi icho gosas goya kasoogoocheen, jit kagolge.
[9] 'Doo'di Yeesso ortiis raaho ichoow ki 'dubiis raaho riire wihi us yidah, “Waakh koolinno!” “Waakh ki magahi Kamur kayamiit a imaale.”
[10] “Waakh dakhi aacchiheenki Dawuud layadeehe yamiit a imaale!” “Waakkheenki inti weyti saraat kijiro koolinno!”
[11] Yeesso ilkerengeetti weene Yeerusaleem gele. Minki Waakhe buure gele, walah tuumman yeye. Il a sooibeennowe, abattitiisti tomon ichoow lammee khabaayi, ilkerengeetti Be'daaniya irte.
[12] Ibeenki kaas sooraaho chirri icho ilkerengeetti Be'daaniya kasoobaheen ka, Yeesso ankaye.
[13] Foga ka geeyoo fiig layadeehe seeb khabo arge, ibuje, usu gurnaan khabo yeyaa. Chu'us geey sooeleele ka, seeb on menye walah us ka'hele mele. A mehe maanti geey gurnaan bahcho mee gon.
[14] 'Deerka geey fale wihi us iyidah, “Yombuu tuumman etoo kalday laka gurnaan ma kaayaham!” Abattitiis la a daagte.
[15] Chirri icho ilkerengeetti weene Yeerusaleem yimaateen ka, Yeesso uranti minki Waakhe buure gele, 'doo'di intaas ka walah gatti ichoow ki walah ororicho ba rihnaan sookhabte. Komborohi balballaaddane 'doo'di chilimmeti ilassi addan iskadooricho leeyahe ichoow komborohi 'doo'di kutukuurrug ororsati ba rerreeche.
[16] Yeesso la eti tuummane meeh si'do, uranti minki Waakhe buure dah kaleegoocho tirte.
[17] Enenyet ayti Waakh abche, wihi us iyidah, “Wihi chiiran, “ ‘Minkeey mehe layadeeh ya, minki weysiite, 'doo'di harra tuumman,’ I'daasenyi, ‘inti 'doo'di hatto leh kadagti,’ kayeesseen.”
[18] Kuhaaniyyohi wewween, ichoow tagaammeti amurre ba, yeedaas daagte. Jiti iche Yeesso katagiis yowatte. Jeenteti urur tuumman wihi us enenyet abcho ka weyti igirmeestuu, usu weyti karoorte.
[19] Chirri il gelebnowe ka, Yeesso ichoow abattitiis ba ilkerengeet kabaheen.
[20] Chirdeer geeddi icho 'dulaan, geeyi cheletteete fiig usuhi hiiyyay kasookhabte tuum angage argeen.
[21] Beetero wihi chele eheet kasoo'hele wihi us Yeesso iyidah, “Eti ween bal yey! Geeyi fiige chele at fasse, a angage!”
[22] Yeesso wihi us ilaabe, “Waakh kakhuufa!
[23] Rume atin icheeka, chi' etoo hala, ‘Nyaam beyti buure goya iskalugu'd!’ iyidahye toro la uurlammaal ikhabine, wihi us yidah saggi icho iyateehiin rummeesti, etaas wahaas a liiyeela.
[24] Maantaka wihi an atin isoocheeko, walahbaaw atin weysi ka Waakh daahteen, saggi atin i'hesseen rummeesda, wahaas la a atin lasiichaa.
[25] Chirra atin tolossattaane weysattaane, etoo la wohoo ikhabtaan etaas wahaas ikakuta 'dee Aabbahiinki serey jiro uskeeliin a atin ikakuto.”
[27] Toro ilkerengeetti weene Yeerusaleem yimaateen. Geedda Yeesso uranti minki Waakhe buure goya raaho kuhaaniyyohi wewween ichoow tagaammeti amurre ichoow ewweenki Ya'huud la Yeesso iyimaateen.
[28] Wihi icho worsateen, “Antohi at wahanyeyyoha kahaaggisso, a weheeyya? Antohi at wahanyeyyoha kahaaggisso ayyo kisiiche?”
[29] Yeesso wihi us ilaabe, “Wohoo kaldaye atin worsada. Isoolaaba, ani la antohi an khabo, an wahanyeyyoha dakkhan kahaaggicho, a weheeyya a atin isoocheeko.
[30] Yoohanahi Enenyet Baattissiyo, antohi us enenyet kabaattissiyo, Waakhe kayimaateen, bal enenyet? Isoocheeka!”
[31] Iskaleehawwoocheene wihi icho isiyidaaheen, “Chi'inno, ‘Waakhe kayimaateen,’ nadeeh, mehe inno iyadeeh ya, ‘A i'doh 'deerka irummeysanna?’
[32] I'daasenyi chi'inno, ‘Enenyete kayimaateen,’ nadeeh mehe soobaha?” A mehe 'doo'de karooraan jeenteti enenyet tuumman saggi Yoohana rumanka eti Waákh íyeyyeedo iekkaachuu.
[33] 'Deerka wihi icho Yeesso ilaabeen, “Nah ma garanni.” Yeesso la iiyeyye, “Ani laka antohi an wahanyeyyoha kahaaggicho ma atin isoocheeko gon.”