[1] Uun il barye, kuhaaniyyohi wewween ichoow ewweenki Ya'huud ichoow tagaammeti amurre ichoow Jaldaabti Weene Ya'huud tuumman wihi icho Yeesso yeelaan goocheen. Yeesso hidhideene, khaateene, dahan Bilaato gesseen.
[2] Bilaato wihi us worsate, “Karnati Ya'huud a ati?” Yeesso wihi us ilaabe, “A rum, a i'daas at elatti on.”
[3] Kuhaaniyyohi wewween wihi ittaawenye Yeesso kacheekteen.
[4] Bilaato 'deerka toro Yeesso wihi us worsate, “At wahanyeyyoha ma soolaabto? Bal waha ittaawenye icho kaacheektaan yey!”
[5] I'daasenyi Yeesso walah uliba us laabe mele, Bilaato la girmeeste.
[6] Hugum ka Bilaato daawti Baasakka ka etoo hidane enenyet usuhi lasoofuro daahe a soofura.
[7] Etoo Barraba layadeeh ichoow 'doo'doo sirgaal 'dii'do diho ka enenyet dubunuunu bakkiche jeela kijiraan.
[8] Urur yimiyye Bilaato usuhi i'di orrankateet u etoo hidan isoofuro daahe.
[9] Bilaato la, “Anihi Karnati Ya'huud atin isoofuro a 'doontaan?” urur worsate.
[10] A mehe us saggi kuhaaniyyohi wewween jeenteti kal'darri on u Yeesso dahanohiis igesseen a garta.
[11] I'daasenyi kuhaaniyyohi wewween urur leeyeedeene, 'dee Bilaatohi Yeesso menye, Barraba soofuro a daaheen.
[12] Bilaato wihi us urur worsate, “'Deerka ki atin Karnati Ya'huud tadeehiin i'doh idaahe?”
[13] Riireene, “Massalaaba kakaah!” yidaaheen.
[14] Bilaato wihi us worsate, “A i'doh? Mehe suujenye yeele?” I'daasenyi geeddi kootteet 'dirihiis riireene, “Massalaaba kakaah!” yidaaheen.
[15] Jeenteti us icho ihamaadin 'doonuu, Bilaato Barraba icho isoofure, amuri Yeesso lakadoocho toro massalaaba lakakaaho bahche.
[16] Iskare Yeesso uranti minki buurenye gaafana igelo geesse, rabittoo iskareet tuumman isiwahte.
[17] Dafartoo muggee i'di karnat u korisse, 'duuboo kudaheet iskayuubte matah korisse.
[18] Icho la usu, “Karnati Ya'huudoow jiroti deer 'hel!” idowte.
[19] Wussoo ka matah jajjahte, hanjuf kaattufte, a kachaaratta dubunuunu ortiis ka jilbo il kagu'dubte i'doo iche inkaanyit tussuu.
[20] Inkoo icho kachaarteen ka, kabuu'di muggee kabahcheene gaaddiis gesseen. 'Deerka leebaheene woyeen massalaaba kakaahaanee.
[21] Etoo ilkerengeetti Kureene Siimon layadeehe gosiis kayimiyye intaas leeyimiy massalaaba Yeesso sinnaan ihosseen. Siimonha la a aabba Alekisaanda ichoow Ruufo.
[22] Yeesso meessoo Golgoo'da layadeeh keeneen. Golgoo'da la a mehe ya, Meessi Lafohi Matahe Enenyet.
[23] Farsoti sabiibe hanjati halalle lakawarse Yeesso siisse, i'daasenyi ma khaatan.
[24] Icho la Yeesso massalaaba kakaaheen. Goycho ka gaaddiis gisante, kura gu'ddateene ebba wihi us 'helo yeyeen.
[25] Chirra iche massalaaba kakaahto, il a geeddi saha'd seyyahti chirdeereet.
[26] Wihi lakayigisye, massalaaba sarche lakachiire la a mehe ya, Karnati Ya'huud.
[27] Reeroo lammeenye hatto leh leekaaheen. Koo ankiiski miigeet lakakaahe, ki addan la ankiiski gurro lakakaahe.
[29] 'Doo'di intaas tabo a leeabaarrama, 'darraaw ka matah moroogicha. “Aa'heey! Atihi minki Waakhe buure jejjebisso, toro orrah seyyah on ka disso,
[30] bal isribe, massalaaba kasooyag gi'de!” iche idowaan.
[31] Saggaas on u kuhaaniyyohi wewween ichoow tagaammeti amurre laka a kachaartaane, wihi icho goycho ka esseen, “Us 'doo'di addan a ribe, i'daasenyi isribin ma yabuu'd!
[32] Kan Lasubhe, Karnata yaafohi Issiraayele bal toolla massalaaba a kasooyago, 'dee a agarro, a rummeysanni gi'de!” 'Doo'di laleekaahe laka weyti usu leeabaarrame.
[33] Saha'd lihti maalimeet ka, il tuumman mug'di yitahye, ichoowka saha'd saagaale eleesse.
[34] Saha'd saagaal ka Yeesso hooyi buure ka riire, “Elooy, Elooy, laama sabakhtani?” yidah. Wahaas la a mehe ya, “Waakkhaayaaw, Waakkhaayaaw, a i'doh ikatabte?”
[35] 'Doo'doo intaas hagga toollo la, baabule daage, wihi icho yidaaheen, “Daaga, usu eti Waákh íyeyyeedo Eliiya layadeeh iche waha.”
[36] Koo la nyaame, haaruggoo khaate, farsoti sabiibe birrakhe buuhiche. Kho'doonkoo deer kahide, Yeesso iyooge, 'dee a yubhaabe. “'Diicha, usu Eliiya yamiite, sooyagcho, a agarro,” yidah.
[37] Yeesso weyti riire, rubey gooche.
[38] Dafarti weyti yobbeenye minki Waakhe buure seley goosso meel lamma seley igoote, sereye kasookharradde ichoowka iliche kabahte.
[39] Chirri eti koobbintoo iskareet itoollo Yeesso ortiis toollo riiritiis daage saggi us imassate arge ka mehe yidah ya, “Rumanka eta Weeli Waakhe eheet.”
[40] Deyyehotoo fogaka a 'dey'doossa. Goycho ka a Maariyati ilkerengeetti Magdaala ichoow Maariyati Yaakoobohi nugul ichoow Yoosse desse ichoow Saloome.
[41] Maanti Yeesso boroofenhi Gaalilaaya kijire, deyyehotane usu raahte, gargaarte. Deyyehoti addane ittaawenye ilkerengeetti weene Yeerusaleem kaleetimiy laka intaase tolossa.
[42] Maantaas a Ibeenki Latannabti. Waha la a maanti Seeri Lanaso ortiise. Chirri il gelebnowe ka,
[43] Yuussufhi ilkerengeetti Arima'daaya Bilaato roorro laan iirte sar Yeesso daahe. Yuussufha la a etoo Jaldaabti Weene Ya'huud goyaka magah khabo toro la dakhi Waakh laka sugo.
[44] Bilaato Yeessohi geeddaas ka yumuy kagirmeeste, eti koobbintoo iskareet itoollo wahe usu Yeesso 'hor yumuy worsate.
[45] Chirri us eti koobbintoo iskareet itoollo woraas kaabte ka, sar Yeesso Yuussuf siiche.
[46] Yuussuf dafartoo soogate, sar Yeesso massalaaba kasooyagche, dafartaas kaayyuube. Go'ddoo daddaab ka lakhute hawwaal lakayeele goya kareeche, daddaabtoo buure 'dembeleeliye hawwaal afiche gesse.