[1] Inkoo ibeennetoo kutte, Yeesso ilkerengeetohi Kafarnaa'hum isoonokhte. 'Doo'd saggi us goob iyimiy daage.
[2] 'Doo'di buure kulme, min goya inti lagelo lawaaye, min afafhiis ka laka meel lawaaye. Yeesso la Yeedi Waakhe 'doo'd icheeke.
[3] 'Doo'doo affare la, etoo khannane sar tuumman hanjaawte iche Yeesso ikeene.
[4] Jeenteti urur buur iyahuu saggi iche Yeesso ikageesso waayte. Min sartiis korte, inti Yeesso toollo sartiis alohoo doobbo kabihisse. Ilaali et kajiifo il iwoyte, ichoowka Yeesso ortiis tissil.
[6] Tagaammetoo amurre la intaase fiddiita. Wihi icho uuricho ka essaan,
[7] “Eta mehe i'daas kayadeeh? Wahaas gaf menya? Ayyo addane enenyet uskeeliis ikakuta, Waakh on menye?”
[8] Chirraas on Yeesso uuriis ka wihi icho uuricho goyaka dowtaan garte, wihi us makhaaballetaas iyidah, “Mehede malassi i'daase idowattaan?
[9] Mehe maanta ki addan ka'dabakhe, chirri an eta sare hanjaawte, ‘Uskeelaah a liikaakute,’ iadeeh a ommos usuhi an, ‘Kah ilaalaah okhso, soho,’ iadeeh?
[10] I'daasenyi saggi Ínam Aadam antohi us harrata ka enenyet uskeel ikakuto ikhabo a abattaan.” Wihi us eti sare hanjaawte iyidah,
[11] “Tolosso, ilaalaah okkhiche, goob iro!”
[12] Et tolossate, ilaal okhsate enenyet tuumman 'dey'doochaayi bahe. Icho tuumman la girmeesteene, Waakh koolicheene wihi icho yidaaheen, “Inno injire wihi i'dee ma argin.”
[13] Yeesso toro beyti Gaalilaaya afiche irte, ururoo buure la intaas ka iyimiyye, ulla wori Waakh abche.
[14] Toro orey isohte, etoo Laawi layadeehe koo Alfaayee arge. Laawi meessi kooddi lakagoocho goya fiddiya. Yeesso, “Isooraahe, abattiteey ateeh,” Laawi iyidahye, Laawi la kahe usu raahe.
[15] Saahka Yeesso min Laawi kagolossataayi, 'doo'doo kooddi goocho ittaawe ichoow 'doo'doo 'doo'di uskeel leh liiekkaacho ittaawe yimiyye, Yeesso ichoow abattitiis ba leegolossate. A mehe 'doo'di buurenye usu sooraahe.
[16] Tagaammeti amurre iche laka Farissaayee la, Yeessohi 'doo'di i'daase leegolossati agarte. Wihi iche abatti Yeesso worsatte, “Yeesso a i'doh 'doo'di kooddi goocho ichoow ki uskeel leh ileegolossata?”
[17] Yeesso la chirri us wihi icho essaan daage ka wihi us iyidah, “'Doo'di ilkitárri yowti ki feffeyyan menye, i'daasenyi a ki khakkhannan. 'Doo'di an iimiyye an waho, ki 'doo'di fiffissan isiekkaacho menye, i'daasenyi a ki uskeel leh.”
[18] Maantoo abatti Yoohanahi Enenyet Baattissiyo ichoow Farissaayo af hiitaane jirte. 'Doo'doo la yimiyye, wihi us Yeesso worsate, “A i'doh abatti Yoohana ichoow too Farissaayo af ihiitaane, abattitaah la af ihidan?”
[19] Yeesso wihi us ilaabe, “'Doo'di mindischo yimiy af ma hiiti geeddi eti min disti intaas kijiro, menya? Geeddi eti min disti on leejiro af ma hiitaan.
[20] I'daasenyi maane a tamiit, ti 'doo'd eti min disti lakakhaato. Maantaase 'dee 'doo'd af hiita.”
[21] Yeesso la yeed orey iwoye, wihi us yidah, “Et goonankoo dafareete husub gaaddiisti raagane kharradde kadaddabo mele. Chirri us i'da yeele, goonankaas husub a isinyaama gaaddi raagan la kharradiche orey isohta geeddi oraat laka kuta.
[22] Ommolla et farsoti sabiibe husub urgohi uktoote raagan kachibo mele. Chirri i'da layeele farso urgo a fuurissa doossa, farso lawaaya urgo laka lawaaya. I'daasenyi farsoti sabiibe husub urgohi uktoote husub on lakachiba.”
[23] Maalinkoo Seeri Lanasee Yeesso abattitiis khabaayi gosase goya raaha. Geedda icho 'dulaan, abattitiis ilmohoo 'dargaayye guratte.
[24] Farissaayo wihi iche Yeesso itidah, “Yey, abattitaah a i'doh Seeri Lanaso ka wihi amurre 'dii'ddantahe iyeessa?”
[25] Yeesso wihi us ilaabe, “Atin injire wihi Dawuud yeele maanti usu ichoow 'doo'di us khabe ba raarahteen Yeedi Waakh ka ma soomin a?
[26] Maanti Abiyaa'dar kuhaanihi weyti ween eheet, Dawuud uranti minki Waakhe gele, makaateti Waakh liibahche yuhuyye, toro reeri leejire laka wohoo siiche. Amurreti laraaho ka la kuhaaniyyo kaldaye makaatetaas yaham.”
[27] Yeesso 'deerka wihi us ilaabe, “Seeri Lanaso iroonoti enenyete liiyeele, enenyet mee Seeri Lanaso liiyeele.
[28] 'Deerka Ínam Aadam a Kamuri Seeri Lanaso laka.”