[1] Ibeen lamma ankhane 'dee daawti Baasakka ichoow Daawti Makaateti Liikhasin lagela. Kuhaaniyyohi wewween ichoow tagaammeti amurre la ekkeysi ka saggi iche Yeesso ikhabatti 'dee itagiise yowatta.
[2] A mehe wihi icho essaan, “Uus inno daawta goyaka khaban. Kolossoo enenyet hol ka il a baabiichaa.”
[3] Yeesso ilkerengeetti Be'daaniya ka minki etoo Siimonhi Ki Bu'da Khabe layadeeh ka, komborti ballaaddane lakagolossati ka dikkile kajiifa golossata. Makhaabassoo kurunkoo daakki alabaasta lakahaaggiche miricchihoo weyti gato miige kijiro geeyoo naad layadeeh lakahaaggiche leetimiy. Kurum lukhum jebisse, Yeesso miricchi matah kakhubte.
[4] 'Doo'di intaas kijire gaasoo, “Miricchiha a i'doh immarah labaabiicho?” iche hol ka isidowa.
[5] “Kootte chilimmeti eti gu'hoo hil haaggiche laguto 'dirihiissa lakoororicha, chilimme miskiin lasiicha,” iche essaan. Icho la makhaabál weyti leejaakheen.
[6] Yeesso wihi us yidah, “A i'doh iche imalalissaan? 'Diicha! Wihi iche iyeesse a haaggi weyti buure.
[7] Miskiin kol dakkhan goytiinna kakhabtaane, kolbaaw atin 'doontaan la a gargaartaan. I'daasenyi ani kol dakkhan ma ikhabtaan.
[8] Makhaabassa wihi iche tabuu'd tuummane yeesse. Sarteey miricchi ka subahte, orey on geeddi liihawwaalin tannabisse.
[9] Rume atin icheeka, meelbaaw Wori Haaggan harra tuumman ka lacheeko ka, wihi iche yeesse laka a lacheeka, iche la lakasoo'hela.”
[10] 'Deerka Yuuda Iskaariyoothi ullaka abatti Yeessoti tomon ichoow lammee kichekoowe, kuhaaniyyohi wewween iirte, Yeessó 'dub goocha dahanohicho gessaa.
[11] Inkoo icho wahaas daageen ka weyti hamaadeene toro chilimme iayyicheen. Yuuda 'deerka inti leemujjumenye us Yeesso dahanohicho kagesso yowte.
[12] Ibeenki oraate Daawti Makaateti Liikhasin maanti heleenki daawti Baasakka lasoorriyoocho eheet. Ibeenkaas goya abatti Yeesso wihi iche Yeesso worsatte, “Intoh 'doonta iranna katannabanna, 'dee gololi daawti Baasakka kataham?”
[13] 'Deerka abattitiistoo lammee erge wihi us iyidah, “Nyaama ilkerengeet gela, etoo 'dirihoo biccheet si'do afiin a kayamiite raaha.
[14] Minki us gelo wihi atin ooyo itadeehiin, ‘Eti Ween mehe worsata ya, min goyaka meessi marti ani ichoow abattiteey gololi daawti Baasakka kanaham meeke?’
[15] Meessoo buurenye minkiis sartiisenye meeh tuumman khabto lahaaggiche iche atin tusa. Intaas ka golol inno ihaaggicha.”
[16] Abatti bahte ilkerengeet gesse, walah dakkhan ba i'di kootte usu iyidah on i'heleen. 'Deerka gololi daawti Baasakka haaggisse.
[17] Chirri il gelebnowe ka, Yeesso abattitiisti tomon ichoow lammee khabaayi yimiy.
[18] Chirra icho komborti lakagolossati ka dikkille kajiifaane golossataan ka, Yeesso wihi us yidah, “Rume atin icheeka, etiinkoo 'dub igoocha, a etiinkoo ileegolossati.”
[19] Iche tuumman fool ribowe kooba, “Rumanka ani mee menya?” worsate.
[20] Wihi us ilaabe, “Atinha tomon ichoow lammee, a etiinkoo. A etiinki makaate karanta ikaleelug'do.
[21] Ínam Aadam i'di usu miinsane lachiiruu, a yamuut. I'daasenyi eti Ínam Aadam 'dub goocho, sinati sugto eenna a buure! Usuhi goorat idelanne deefta.”
[22] Golossataani Yeesso makaate khaate Waakh kala'd ilaabe, jejjebche abattitiis ididdiibe, wihi us yidah, “Khaata, waha a sartaayaa.”
[23] Toro kokkoob khaate, Waakh kala'd ilaabe, abatti idiibe, iche tuumman la isleeanguumatte.
[24] “Waha a diiggeeyki ayyinti husube Waakh enenyet igoocho, a diiggi iroonoti enenyeti buure liikhubo.
[25] Rume atin icheeka, an farsoti sabiib toro ma damo, ichoowka ibeenkaas an wihi husub dakhi Waakh ka damo yateeh.”
[26] Inkoo icho geeyoo Waakh dowteen ka, Hali Geeyohi Oolif ibaheen.
[27] Yeesso wihi us abatti iyidah, “Atin tuumman a ikafiriddaan, a mehe wihi chiiran, “ ‘An ersime gu'dda, iiye la seley baabaata.’
[28] I'daasenyi inkoo an omoot kasookahe, boroofenhi Gaalilaaya ortiin a irda.”
[29] Beetero la, wihi us yidah, “Chirri iche tuumman kaafiridde laka, ani ma kaafirdo!”
[30] Yeesso wihi us ilaabe, “Rume atin icheeka, maanta ibeenka goya laka, geeddi lukki kol lamma iriirin, ati rubeytaah kol seyyahe, ma igaratti tadeeh!”
[31] I'daasenyi Beetero weyti yeediis katirriinsate wihi us yidah, “Cha'an kileeamuut laka, jirtuu ma kigardi ma adeeh!” Ti addan tuumman laka i'daas tidah.
[32] Intoo Gesseemane layadeeh irteene, Yeesso wihi us abatti iyidah, “Inta orronda, geeddi an Waakh wahdi.”
[33] Beetero ichoow Yaakoobo ichoow Yoohana khaatte. Sohtaayi, uur goya iooye, mali uskul gele.
[34] “Huleesi rubeyteey kijiro, huleesi omooteet laka a ikeena. Inta fiddiya, toorribda la,” iyidah.
[35] I'daaru orey isohte, il isi'diiche, Waakh wahte, chi'iche tateeh saha'dda sinayyoot usu a kakutto.
[36] Wihi us yidah, “Aabba, Aabbahaaw, ati ka walah tuumman a geeddi icho yateehiin. Kokkooba sinayyoot ikakhaat. I'daasenyi in an 'doono menye, in at 'doonto a titaahe.”
[37] 'Deerka abattitiis inokhte, ichehi u'durto 'hele. Beetero leeyeede, wihi us iyidah, “Siimon, a u'durte? At saha'ddoo kalday laka toorribnaan a agaafatte?
[38] Toorribda Waakh wahda, 'dee kajmeti uskeel atin kalugu'ddo akidihina. Rubeyohiin wihi mujjumenye 'doonaane, i'daasenyi sartiinna 'dabakhe.”
[39] Toro irte Waakh wahte, wihi kootte us yidah on inokhte.
[40] Chu'us soonokhti, ichehi u'durto, indo hulees kore toro 'hele. Wihi iche usu itadeeh ma garatti.
[41] Koli seyyahnaatteet soonokhte, wihi us iyidah, “Atin uliba a u'durtaane, nassaan? A geeddaas on! Saha'de a titah. Yeya, Ínam Aadam 'dube lagoocha, dahanohi 'doo'di uskeel leh lagessa!
[42] Sookaha a iranni! Eti 'dub igoocho kalla soosohtaa!”
[43] Yeesso yeyyeedaayi, Yuudahi ullaka abattiti tomon ichoow lammee kichekoowe yimiy. 'Doo'di sooraahe a ururoo birlabbe ichoow khokkhoomme khabo, kuhaaniyyohi wewween ichoow tagaammeti amurre ichoow ewweenki Ya'huud sooergate.
[44] Eta Yeesso 'dub goocho la mehe urur iskakhabeen ya, “Eti 'dee an dongade, a usu, khabda khaata iskar a toorribto.”
[45] Yuuda chirraas on Yeesso iirte, “Eti weenoow!” iyidahye dongate.
[46] 'Doo'd la Yeesso khabte hide.
[47] 'Deerka etoo ullaka intaas toollo, birlab on soo'hiire falfati kuhaanihi weyti ween gu'dde nabah ng'ure.
[48] Yeesso la wihi us yidah, “Cha'atin khokkhoomme ichoow birlabbe leetimaateene ikhabattaan, an a etoo enenyet walah saro?
[49] Maan tuumman ani a atin leejire one, uranti minki Waakhe buure ka Yeedi Waakh atin abche, ma ikhaban la. I'daasenyi wahanyeyyoha a yitaaheene 'dee wihi Chiirnaanneti Waakh kachiiran labuuhicha.”
[50] 'Deerka 'doo'd tuumman usu katabe kafirde.
[51] Etoo nugule dafartoor sookorsate la Yeesso 'dubiissa sooraaha. 'Doo'di kootte Yeesso woyo la, etaas khabte.
[52] Ulla dafar intaas on katabe, murukhenyi firde.
[53] Yeesso minki kuhaanihi weyti ween geecheen. Kuhaaniyyohi wewween tuumman ichoow ewweenki Ya'huud ichoow tagaammeti amurre kulmeen.
[54] Beetero la fogaka Yeesso sooraahe ichoowka uranti kuhaanihi weyti ween fiddiyo goya gele. Intaakka iskarti meel yaakhisso koorronte 'dab dahammoote.
[55] Kuhaaniyyohi wewween ichoow Jaldaabti Weene Ya'huud tuumman, garti iche yeeddo, 'dee icho Yeesso omoot ikagoochaan yowteene, i'daasenyi walah icho 'heleen mele.
[56] A mehe 'doo'di buurenye Yeesso garti beenaat kacheekte, i'daasenyi yeedicho ma israahin.
[57] 'Deerka 'doo'doo kahe, garta beenaat yeede, wihi icho yidaaheen,
[58] “‘Minka Waakhe buurenye dahanohi enenyet diseen a jejjebcha koo addane enenyet idisin ibeen seyyah goyaka disa,’ usuhi essi a daagne.”
[59] I'daasenyi garti icho laabeen laka ma israahin.
[60] Chirraakka kuhaanihi weyti ween 'doo'd tuumman ortiis ka kahe, wihi us Yeesso worsate, “Walah at soolaabto mele? Yeeda enenyet kaacheekti, mehe jira?”
[61] I'daasenyi Yeesso gammadiche, walah us soolaabe mele. Kuhaanihi weyti ween toro wihi us worsate, “At a Ki Lasubhe, a Weeli Waakkhi Lakoolicho?”
[62] Yeesso la wihi us iyidah, “Aa, a ani. Ínam Aadam la usuhi Waakkhi Miig Leh anki dahantiisti miigeet fiddiyo toro mirsohi saraat fuulaayi yamiit a agartaan.”
[63] Kuhaanihi weyti ween hol on ka ubbaariiski deer kharradiche, wihi us worsate, “Inno a i'doh 'doo'doo addane gar laabo iyowanna?
[64] Atin saggi us igafe a daagteen gon! Mehe goosseen?” enenyet worsate. Icho tuumman omoote imasse ayyicheene, omoot igoocheen.
[65] Gaasichekoo hanjuf katufin sookhabteene, indo hideene khomhoyyo kajaheene, “Eti Waákh íyeyyeedoow, eti kigu'dde nah isoocheek,” idoween, a kachaartaanee. Iskarti meel yaakhisso khaatte, jahte.
[66] Beetero uranti minkaas khariise iliche fiddiyaayi, inantoo falfati kuhaanihi weyti weene timiy.
[67] Chirri iche Beeterohi 'dab dahammooti agarte ka fiirisse, “At laka etaas Naasarete Yeesso layadeeh a leejirte,” tidah.
[68] I'daasenyi 'dii'de, “An waha at elatti ma gardi, foolicho ma khabo ba,” yidahye, kahe, anki ariteet tabe. Chirraas on lukkihoo riire.
[69] Chirri inanti falfee intaas ka agarte ka, 'doo'di intaas toollo wihi iche toro itidah, “Reenka alah a kichekoo.”
[70] Beetero toro 'dii'de. I'daaru on fiddiyeene, 'doo'di intaas hagga toollo wihi us Beetero iyidah, “At rumanka a kichekoo, i'di tahe at laka a 'doo'di Gaalilaaya!”
[71] Beetero isabaare toro Waakh dowe, “An eta atin kaayyeeddaan ma gardi!” yidah.
[72] Chirraas on lukki koli lammaatteet riire. 'Deerka Beetero yeedi Yeesso iyidah kasoo'hele, “Geeddi lukki kol lamma iriirin, at kol seyyah, ‘Ma kigardi!’ tadeeh.” Chirraas on ilmo sookhube, ooye.