[1] Yeesso 'deerka intaas kakahe, anki boroofenhi Ya'huudiya ichoow hawti Yoordane 'dusso berihiche irte. Urur toro isootabe, ulla i'diiski orrankateet u wahanyeyyohi Waakh abche.
[2] Farissaayotoo la timiy, usu angey gelin 'doonta, wihi iche worsatte, “Eti makhaabassiis tuum riho ichoow amurreteen a israahaan?”
[3] Yeesso wihi us ilaabe, “Muusa amuri us atin siiche mehe yadeeh?”
[4] Iche la wihi iche itidah, “Muusa ka a geeddi makhaabal khadaabi seley lakabaho chiiro, toro la a geeddi us makhaabassiis tuum riho.”
[5] Yeesso wihi us ilaabe, “Muusa jeenteti matahmiigtiinna amuraas atin ikasoochiire.
[6] I'daasenyi uumaccho ka, maanti Waakh walah dakkhan soouume, ‘labo ichoow deyyeho soouume.’
[7] ‘Jeentetuu, mejel aabbahiis ichoow abartiis a kataba, usu ichoow makhaabassiis la wohoo kalday yateehiine,
[8] lammacho ba sartoo kalday yateehiin.’ 'Deerka kola et lamma menye, a sartoo kalday.
[9] Maantaka wihi Waakh isikeene, uus weeli enenyet seley bihin.”
[10] Inkoo icho min inokhteen ka, abattitiis wihi kootte us essi, a mehe worsatte.
[11] Wihi us ilaabe, “Eti tuummane makhaabassiis tuum rihe makhaabassoo addan diste, uskeeli us makhaabassi tiis ieheynan leeur'do, iche gele.
[12] Makhaabassi makhaabaliche tuum katabte, makhaabaloo addan khaatatte diste, uskeeli iche makhaabaloo kiche ieheynan leeu'durto, iche gesse.”
[13] 'Doo'd la nyaakhuti rurrucchule sookhaata, Yeesso ikeena, 'dee ulla dahano korcha iweesta. I'daasenyi abatti 'doo'daas leejaakhte.
[14] Chi' Yeesso waha arge ka hollowe wihi us abatti iyidah, “Nyaakhuti rurrucchul ajeyinna 'diicha ani a iyimaatee, a mehe dakhi Waakh a ki 'doo'di i'dee.
[15] Rume atin icheeka, eti dakhi Waakh saggi weeli rucchul ikakhaatan, koloo kalday laka goobi Waakh ma gelo.”
[16] Ulla nyaakhut khabte, dahanohiis korche iweeste.
[17] Chirra Yeesso abattitiis khabaayi bahe ka, etoo sooyiriyye, ortiis ka jilbo il kagu'dde, wihi us worsate, “Eti weene haaggan, mehe yeelo 'dee jiroti jirtuu imassan 'hela?”
[18] Yeesso wihi us ilaabe, “At a i'doh ani, ‘Eti haaggan,’ ikawahta? Etoo kaldaye haaggan laka ma jiro Waakh on menye.
[19] Amurreti Muusa enenyet siiche a garatta, ‘Weeli enenyet dubunuunu iigaasan, makhaabali kaah ieheynan ommos makhaabassi taah ieheynan aleeur'din, walah ahatin, garti beenaat ayeedin, enenyet akakharaawin, aabbahaah ichoow abartaah inkaanyit.’ ”
[20] “Eti ween, wahaas tuumman, koo an iraahin mala, uu' goorat an weel eheet,” et yidah.
[21] Yeesso et yeye, 'doonine buuhisse. Ét iiyeyye, “Wohoo kaldaye kaankhan. Nyaame wihi at khabto tuumman ororiche, chilimme miskiin siiche, 'dee kamurroonki goobi Waakh 'hele, 'dee kaale isooraah.”
[22] Chu'us yeedaas daage ka hamaad waaye. Usuhi fool ribowe nokhte, a mehe hoolahi buurenye khabe.
[23] Yeesso jilakh rogte, wihi us abattitiis iyidah, “A 'hoossoo geeddohe chi' kamurre dakhi Waakh gesso!”
[24] Abattitiis weyti girmeysatte. I'daasenyi Yeesso wihi us yidah, “'Doo'daaw, a 'hoossoo geeddohe chi' dakhi Waakh lagelo!
[25] Naffi gaale issi irbi kakhaduutti weyti 'hooltahe. Eheet a, 'hoossi eti kamurenye dakhi Waakh gelo iche weyti kutta.”
[26] Abatti geeddaas 'dirihiis girmeysatte, wihi iche isworsatte, “Ayyo 'deerka lariba?”
[27] Yeesso icho yeye, wihi us iyidah, “Weeli enenyet ka waha a wihi koloo kalday laka iitaahan. I'daasenyi Waakh ka i'daas mee. Waakh ka walah tuumman a geeddi icho yateehiin.”
[28] Beetero wihi us iyidah, “Bal yey, nah weheenyo tuumman a kasootabne, 'dee ati kiraahna.”
[29] Yeesso wihi us ilaabe, “Rume atin icheeka, eti jeenteteey u ichoow jeenteti Wori Haaggan u goobiis ommos walaalinyetiis ichoow albehi leedesse kasootabe, aabbahiissa, abartiissa, nyaakhut, ommos gosiis kasootabe,
[30] jiroti toolla us jiro ka kol kud, iche wahaas us kasootabe 'dirihiis 'hela. Goob ichoow walaalinyetiis ichoow albehi leedesse, arbo, nyaakhut, ichoow gosas 'hela, toro la geedda tuumman sina laka loomhicha. Jiroti yomboot ka la, jiroti jirtuu imassanne 'hela.
[31] I'daasenyi 'doo'di ittaawenye oraate ki 'duboot yateehe, ki 'duboot la ki oraat yateeh.”
[32] Yeesso oreye kasohta, abatti la 'dubiis sooraahta, ilkerengeetti weene Yeerusaleeme ikoraan. Abatti girmeysatte, 'doo'di sooraaho la roorro khaba. Yeesso abattitiisti tomon ichoow lammee 'dol iwahe, wihi usu dowwanoha ka layeelo icheeke.
[33] Wihi us iyidah, “Ilkerengeetti Yeerusaleeme iranna, Ínam Aadam la 'dube lagoocha kuhaaniyyohi wewween ichoow tagaammeti amurre dahanohicho lagessa. Iche la omoot igoossa, 'doo'di Waakh igaran dahanohicho gelissa,
[34] icho la usu kachaartaane, fool hanjuf katufaane, laajja ka doochaane, 'da'ddaboka yagiisiin. Chirri ibeen seyyahe kutte ka omoot kasookaha.”
[35] Chirraakka yeele Sebedaayoti Yaakoobo ichoow Yoohana layadeeh, Yeesso itimiyye, “Eti ween! Atihi walahbaaw nah kidaahne ka nah iyeesso 'doonna,” itidah.
[36] “Mehe atin iyeelo 'doontaan?” Yeesso worsate.
[37] Wihi icho ilaabeen, “Maanti at ababtaayi kombortaahti antoot koorrommatti, alley eteenyokoo ankaahki miigeet a orronti, koo la ankaahki gurro a orronti.”
[38] Yeesso wihi us yidah, “Atin wihi atin daahtaan wihiche ma garattaan. Atin maanta kokkoobi sinayyoote an damo damin a tabuu'diin? Ommos baattissiyoti omooteete ani liibaattissiyo a tabuu'diin?”
[39] Wihi icho ilaabeen, “Aa, a nabuu'd.” Yeesso la wihi us icho iyidah, “Kokkoobi an damo a dantaane toro la baattissiyoti liibaattissiyo ka laka atin labaattissiya.
[40] I'daasenyi eti ankeeyki miigeet ommos ankeeyki gurro orronti ani mee goocho. Meelassa a ti 'doo'di liiyeele.”
[41] Abattiti addane tomone, chi'iche wahaas daagte ka, Yaakoobo ichoow Yoohana kahollowte.
[42] Yeesso isiwahe, wihi us iyidah, “Saggi atin igarattaan u, 'doo'di weynaanti 'doo'di Waakh igaran liiekkaacho, saggi suujenye 'doo'd idakhtaane toro ewweenkicho la wihi 'doo'd yeelo icheeka.
[43] Atin ka i'daas mee. Eti tuummane goytiin ka weynaan 'doono, falfatiin a yitaahe.
[44] Eti tuummane orey 'doono la, bow'dati enenyet tuumman a yitaahe.
[45] A mehe Ínam Aadam laka, ma imaatane 'dee enenyet usu ma ifalo, i'daasenyi a yimiyye 'dee us 'doo'd ifala, rubeytiis diiba, 'dee enenyeti ittaawe mogti uskeelicho iguta.”
[46] 'Deerka ilkerengeetti Yeeriko sooeleeleen ilkerengeetti weene Yeerusaleeme isohtaanee. Chirra Yeesso ichoow abattitiis ichoow ururoo buure Yeeriko kabahaan, etoo indo laaye Bartimaayo layadeehe koo Timaayee, jite fiddiya, walah daddaaha.
[47] Chirri us saggi us Yeessohi Naasaret iyahe daage ka riire, “Yeesso, Inam Dawuud, uur isoonugleyso!” yidah.
[48] 'Doo'di buure usu leejaakhe, gammadi iyidah. I'daasenyi geeddi kootteet laka 'dirihiis riire, “Ínam Dawuud, uur isoonugleyso!” yidah.
[49] Yeesso tolossate, “Soowaha,” yidah. 'Deerka eti indo laa waheene, “Hamaad! Sookah, Yeesso a kiwahaa,” iyidaaheen.
[50] Kabuu'diis seye, serey isoonyaame, Yeessó iyimiy.
[51] “Mehe kiyeelo 'doonta?” Yeesso usu worsate. Eti indo laa wihi us yidah, “Eti ween, anihi toro il argo 'doona.”
[52] “Nyaam gi'de kakhuufnaanki at ikakhuufte a kisamaachee,” Yeesso iyidah. Chirraas on indo bahche, jit kadihe Yeesso raahe.