[1] Beyti Gaalilaaya aficheki 'diri eleeleen. Wahaas a ili ilkerengeetohi Geraasa layadeeh kijiro.
[2] Chirri Yeesso kooban kasooyage ka, etoo ginna dakhatti, go'ddassi enenyet lakahawwaalo kasoobahe, usu 'hele.
[3] Eta fiddihiis a go'ddassaas hawwaaloot on. Ét biingoyyo ka laka jeyin yabuu'd mele.
[4] A mehe biingoyyo luhlo ichoow dahano geeddi buure lakahidhida, i'daasenyi kol dakkhan biingoyyohaas goggooche, ga'daarreti luhlo lakahide laka bar tire. Et miigti jeyisso khabo mele.
[5] Maalim ichoow ibeen ba go'ddassaas hawwaaloot ka, ichoow kuro ka riirit a tuma, dagah laka sar iskagoggoocha.
[6] Chirri us Yeesso foga kaarge ka, soonyaame, ortiis ka jilbo il kagu'dde wahte.
[7] Deeddi us yabuu'd dakkhan riire, “Yeesso, weeli Waakkhi weynaan tuumman tiis tahe, at mehe ika'doonta? Magahi Waakh ka daato, bolokh iitusin!”
[8] A mehe Yeesso chirraas mehe idowa ya, “Ginnata, eta goya kabah!”
[9] Yeesso 'deerka, “Magahaah a ayyo?” worsate. Wihi us ilaabe, “Magaheey a Ururi Iskareet, a mehe nah a ittaawee.”
[10] Yeessó hahhawwaaste, uus icho ilaas kaguurin.
[11] Woyhoo buurenye golcha la, burroo intaas idow, iche tahariis yaakha.
[12] Ginnayyo Yeesso hawwaasteene, “Golcha goya nah i'dii! Alley goyche a gello!” iyidaaheen.
[13] Yeesso amur siiche, ginnayyo golcha goya itabeen. Woyhi golcha geeddi elif lammee, orye bur kakhubte, beyti Gaalilaaya goya itabe, usu tuumman ba bicche khaateen.
[14] 'Doo'di golcha yaakhicho orye, ilkerengeet ichoow ilaas tuumman ka wihi yitah cheeke. Enenyet la soobahe wihi yitahye yeyaa.
[15] Chirri 'doo'd Yeesso iyamiit, eti ginnayyohi ittaawe dakhteen usuhi samacchaar fiddiyo, darfo mujjum gessate matah la haagsate argeen. Enenyet roorro gesse.
[16] 'Doo'di kootte wihi yitah arge la, wihi eti ginnayyo dakhteen ichoow golcha kayitah 'doo'di addan icheeke.
[17] 'Doo'd 'deerka Yeesso hawwaaste, 'dee ilicho a katabo.
[18] Chirri Yeesso kooban goya kidiho, etaas kootte ginnayyo dakhteen Yeesso hawwaaste, usuhi raaho daahe.
[19] I'daasenyi Yeesso wihi us iyidah, “Mele, nyaam goobaah iro, geeddi Kamuraah kiyeele, ichoow saggi us uur ikaasoonugleeste, 'doo'daah icheek.”
[20] Et 'deerka irte, Dekaabolis goya tabe, geeddi Yeesso iyeele cheeke. Eti daage tuumman weyti girmeeste.
[21] Inkoo Yeesso kooban ka toro bey afichekuus imaahe ka, bey hagga kijiraayi ururi buure kasoourure.
[22] 'Deerka etoo 'doo'di minassi weysiite Ya'huud itoollo kichokoowenye Yaayiro layadeeh intaas yimiy. Yeesso arge, luhlohiis kakufe,
[23] hawwaaste, “Inanteeyti rucchul a omoot. A kihawwaasde, kaale dahan ka'daare, 'dee a samaatti jiro a 'hesso,” iyidah.
[24] Yeesso 'deerka makhaábal raahe. Enenyeti buure laka raahe, 'dollohiis tuumman ka enenyet a ishude.
[25] Ururaas goyaka la makhaabassoo khannane gu'h tomon ichoow lamma ba hugunkiche tolossawwaaye, diig on 'dulo a jirta.
[26] Chirri iche ilkitarrinyeti ittaawe iiratte sina tuhum laka, a samaawwaayte. Wihi iche khabte tuumman massisse toro ma deefsanne, a ka'darsatte on.
[27] Chirri iche Yeesso woriis daagte ka, 'dubiis leetimiyye urur goyaka kabuu'diis 'daarte.
[30] Chirraas on Yeesso saggi miige sar ikabahte abte, urur goyaka urgiye, “Ayyo gaaddeey 'daare?” worsate.
[31] Abattitiis la wihi iche ilaabte “At saggi 'doo'd isisootakho a agarta, i'daasenyi ‘Ayyo i'daare?’ worsatta.”
[32] I'daasenyi Yeesso enenyet indo leeraahe, eti 'daare yowte.
[33] Makhaabale 'deerka wihi kayitah agarte, ichehi roorro ka hamarto timiyye, ortiis ka il gu'dubte, rum tuumman icheekte.
[34] Ulla wihi us iyidah, “Inantaay, kakhuufnaanki at ikakhuufte a kisamaache gone, tab gi'de nebey leeiro, sinati sugeer kikeene a lakasamaachee.”
[35] Yeesso yeedaas af kakhabaayi, 'doo'doo goob Yaayirohi minki weysiit itoollo kayimiyye wihi icho iyidaaheen, “Weel a massate. A i'doh uliba eti ween immarah sina ikawaarissa?”
[36] Yeesso la wahaas icho essaan nabah laka ma isudine, eti minki weysiite Ya'huud itoollo wihi us iyidah, “Roorro akhabine, ani on irummeyso.”
[37] Beetero ichoow Yaakoobo ichoow walaal Yaakoobohi Yoohana layadeehe us khaatte on menye, 'doo'di addan tuumman et us khaatte mele.
[38] Chirri icho minki eti minki weysiit itoollo yimaateen ka, Yeesso saggi enenyet iriiro, iooyo, iuwwicho arge.
[39] Min goya gele, enenyet mehe worsate ya, “A i'doh iriirtaane iuwwissaan? Weel ma umaatane, i'daasenyi a ur'da!”
[40] I'daasenyi Yeesso kareyteen. Enenyet tuumman khar ibahche, weel abarche ichoow aabbahiche ichoow abattitiisti seyyahe khaatte, meessi weel jiifo geleen.
[41] Inám dahan sookhabte, “Talii'da kuum!” iyidah. I'da ka mehe leessa ya, “Inantaay sookahe kidowa!”
[42] Chirraas on sootolossatte sohatte. Iname la gu'h tomon ichoow lamma khabte. Enenyet uu' wahaas yitah arge, weyti girmeeste.
[43] Yeesso la weyti katirriinsate amur ibahche, uus etoo kalday laka yeeda garan. Weel wohoo us yaham a lasiicho yidah.