[1] Yeesso intaas katabe, ilkerengeetti goobicheenye Naasaret layadeeh irte, abattitiis khabaayi.
[2] Seeri Lanaso ka, minki weysiite Ya'huud ka enenyet Yeedi Waakh abin sookhabte, enenyeti buurenye usu daage weyti girmeeste. Wihi icho worsateen, “Us eta waha tuumman inta us kaabte a intoh? Kharata deeddeenye lasiiche a toh? Saggoh waha weeli enenyet yeelin iubaa'dan iyabuu'd?
[3] Eta tagaanki kho'doomme diso menya? Maariya abartiis menya? Yaakoobo ichoow Yuuda, ichoow Yoosse, ichoow Siimon menya leedesse? Waha la albehi leedesse menya inno leejiro?” 'Doo'd la usu kahollowe.
[4] Yeesso 'deerka wihi us icho iyidah, “Eti Waákh íyeyyeedo goobicho ka 'doo'di uuriise ichoow yaaftiis kalday on iinkaanyitin.”
[5] 'Doo'doo rucchule khakkhannane us dahan korche samaache on menye, wihi weeli enenyet yeelin iubaa'dan intaakka yeelin ma ubaa'dan.
[6] Ulla girmeeste icho ikakhuufinee. Yeesso 'deerka goobassi intaas kamarsan marche, Yeedi Waakh abche.
[7] Abattitiis tomon ichoow lammacho ba isiwahe, lallamma ka ili kharaat ierge, antohi icho ginnayyo enenyet goya kabahchaan laka siiche.
[8] Wihi us leefarme la a i'da, “Wul on menye, wohoo addan asi'danna. Golol ommos ugar ommos chilimme asi'danna.
[9] Kobo gessada, ubbaari deere atin khabtaan on menye, koo addan agessanna.
[10] Meelbaaw atin gessaan ka, minkaas on fiddiya ichoowka maanti atin ilkerengeettaas kabahtaan.
[11] Meelbaaw atin liikamartiisanne ommos atin liidagansan, ebeeri luhlo atin fuulo sahda geedda atin bahtaan. Waha a garti ichó cheekatti.”
[12] Abatti bahte, Yeedi Waakh cheekte, enenyet tuumman la, “Uskeeliin kasoonokhda,” itidah.
[13] Ginnayyohi ittaawe enenyet goya kabihisse, 'doo'di ittaawenye khakkhannan laka subakki geeyi oolif ka matah subahte, samaasse.
[14] Karnati 'Herood layadeeh la waha tuumman daage, a mehe magah Yeesso weyti ballaaste. Enenyet gaasoo mehe essa ya, “Yoohanahi Enenyet Baattissiyo iche omoot lakasookahche! Miigta i'deenye goytiis ka hil haaggisso, wihi enenyet iubaa'dan us yabuu'd, a jeentetaas on.”
[15] 'Doo'd gaasoo laka mehe essa ya, “Eta a Eliiya.” Gaasoo la mehe essa ya, “Eta a eti Waákh íyeyyeedo, a i'di makhaaballeti goorat Waakh iyeyyeeddo kichekoo.”
[16] I'daasenyi 'Herood maanti us waha leessi daage ka, mehe yidah ya, “Yoohanahi goorat an matah gooche iche omoot lakasookahche!”
[17] 'Herood rubeytiissa 'doo'd erge, Yoohana lasookhabte, jeela ka lahide. A mehe 'Herood 'Heroodiyati makhaabál walaaliiski Fiilif layadeehe diste.
[18] A mehe Yoohana mehe 'Herood idowe ya, “Amurre ichoow khaatannaanki at makhaabál walaalaah khaatatti ma israahaan.”
[19] 'Heroodiya 'deerka mogtaas Yoohana isi'datte, ogoos 'doonte. I'daasenyi ogoos ma tabuu'd,
[20] a mehe 'Herood Yoohana karoora, saggi us etoo fissane toro munyee iyahe iche garta. A toorriba laka. Kolbaaw us Yoohana dagansate, mal la gela. I'daasenyi toro, weyti dagansan 'doona.
[21] Saahka maane soomarte, ti 'Heroodiya 'doonte, a maalinki goorat 'Herood dessee. 'Herood 'doo'di sirgaaliis ka ichoow kiyatiis ka wewween, ichoow kamurreti Gaalilaaya magah khabto soowahe, sukuuku bahche.
[22] Inám 'Heroodiya soogesse, 'durte karnat ichoow martitiis ba hamaadisse. Karnat wihi us inám iyidah, “Walahbaaw at 'doonto soodah amballa kisiichaa.”
[23] Daarte, wihi us iyidah, “Walahbaaw at daahto a kisiicha, ichoowka nyuusi ili an andi laka.”
[24] Iname khar ibahte, abarche mehe worsatte ya “Mehe maanta idaahe?” Abarche mehe ilaabte ya, “‘Matah Yoohanahi Enenyet Baattissiyo 'doona,’ dah.”
[25] Iname chirraas on tiriyye, karnat iiratte wihi iche itidah, “Atihi matah Yoohanahi Enenyet Baattissiyo karam isookorisso, toolla kofche isiisso, iche 'doona.”
[26] Karnat weyti uur suujowe. I'daasenyi jeenteti wihi us idaatte ichoow jeenteti martitiis u, wihi iname daahte usuhi tirti ma 'doonin.
[27] Chirraas on 'deerka eti iskareete 'doo'di hidan yagiis erge, yeed kagu'dde matah Yoohana sookhaat iyidah. Eti iskareet la jeela irte Yoohana matah soogooche,
[28] matah karam sookorche. Inám karam ikeene, iche la abarche siisse.
[29] Chirri abatti Yoohana wihi yitah daagte ka, timiyye sartiis khaatte go'ddoo ka hawwaasse.
[30] Maanti ergaano soonokhatte, iche ichoow Yeesso kulmeen ka, wihi iche yeesse ichoow wihi iche enenyet abisse tuumman icheekte.
[31] 'Deerka abattitiis wihi us iyidah, “Kaaleya, intoo khaawwan a iranni, 'dee atin laka i'daaru nasa.” Jeenteti 'doo'di yamiit ichoow ki nokhti ibuuraatuu, Yeesso ichoow ergaano ba sag icho igolossataan mele.
[32] 'Deerka keley kooban goya kidiheene, intoo khaawwan irteen.
[33] I'daasenyi enenyeti buure maanti iche kahto arge, toro la eti icho yahiin garte. 'Doo'd la ilkerengeeto tuumman kasoobahe, luhlo on ka inti Yeesso illeh isohtaan ioryeene, geeddi kooban yomboochaan meel eleeleen.
[34] Chirri beyti Gaalilaaya afiche ka Yeesso kooban kasooyage ka, urura buure arge. Weyti uur inugleeste, a mehe 'doo'daas a i'di iiyti ersim laa. 'Deerka wihi ittaawenye Waakh miinsan abinnaan sookhabte.
[35] Geedda ka il a ibeennowe, abattitiis itimiyye, mehe itidah ya, “Il kola a ibeennowe, inta la a yib alah.
[36] 'Doo'd laabe, a irti gosasha ka, ichoow goobassi soodow ka, wohoo icho yamhiin a soogatteen.”
[37] I'daasenyi wihi us ilaabe, “Atin rubeytiin wohoo icho yamhiin siicha.” Icho la wihi icho iyidaaheen, “Rumanka wahaas chilimmeti eti hay siyyeet hil haaggiche laguto khaataan! Nahi chilimmeti geeddaase golol ganno wihi icho yamhiin siinno 'doonta?
[38] “Makaate geeddoh khabtaan?” worsate, “Nyaama bal yeya,” iyidah. Chirri iche abatte ka, “Makaate chan ichoow bahag lamma jirta,” tidah.
[39] Yeesso 'deerka abattitiis amur ibahche, enenyet seley a goggoosso, koobbino ka hoosi ulhaw a koorronti.
[40] Enenyet 'deerka kukkud ka ichoow tomon chacchan ka orronte.
[41] Makaateyyohi chane ichoow bahaggi lammee khaate, serey yeye, Waakh kala'd ilaabe, makaateyyo la jejjebche. 'Deerka abattitiis idiibe, 'dee enenyet a gisso. Bahaggi lammee laka jejjebche icho tuumman gise.
[42] Enenyet tuumman golossate, darge.
[43] Abatti la enjel tomon ichoow lamma makaate ichoow bahaggi laajjebche lasoowaache buuhaan soosuunte.
[44] Mejeli golossate, tiriis a geeddi alif chan.
[45] Yeesso chirraas on abattitiis kooban gesse, geeddi us urur kahcho, iche la ortiis inti beyti Gaalilaaya afichekuusenye Bessaayda layadeehe iratta.
[46] Inkoo us icho bariitiche ka, Yeesso burroo kore, Waakh wahte.
[47] Chirri il gelebnowe ka, kooban bey ukkuricheeda raahaane, Yeesso la keley on meessi kootteet kijira.
[48] Saggi abattitiis kho'doommeti kooban lakawoyo ka kooban downaan ileefaddo arge, a mehe hafare icho jeychaa. Geedda baryo kasoodowwaatte ka, Yeesso bey sarche kasohte, iirte, kakutin leheet.
[49] I'daasenyi chirri iche usuhi bey sarche kasohti agarte ka, meleyka koogtahe, riirte.
[50] A mehe iche tuumman a agarte, nahte rubey kabahte. Yeesso chirraas on, “Anahina, a ani roorro akhabina,” iyidah.
[51] 'Deerka kooban kaleedihe, hafar tolossate. Abatti tuumman weyti girmeysatte,
[52] a mehe girmohi makaateyyohi ittaawe walah iche kaabatte mele. I'di tahe uurassicho a ladagahnooche.
[53] Chirri icho beyti Gaalilaaya afichekuus imaaheen ka, intoo Gennaasaret layadeeh yimaateene, kooban hideen.
[54] Uun iche kooban kasooyagte, enenyet Yeesso kase.
[55] Ilaas tuumman goya kooryeene, 'doo'di khakkhannan siriiro kasoosi'deene, inti Yeesso kijiro icho daageen ka igeecheen.
[56] Meelbaaw Yeesso irte ka, ilkerengeeto eheetteey, goobab eheetteey ommos gosas eheetteey ka ba, 'doo'dichoki khakkhannan siriiro kasoosi'daane, sokkoti 'dee us yamiit, geecheen. Hawwaasteene, “Alley bal laddi kabuu'daah kalday laka a 'daareen,” iyidaaheen. Eti tuummane 'daare la samaate.