[1] Yeesso toro minki weysiite Ya'huud gele. Etoo dahane hanjaawte la intaas a kijire.
[2] Chiiy Yeesso too intaas goya kijirta, wohoo icho Yeesso kacheektaane yowtaane, 'deerka usu Yeesso Seeri Lanaso ka etaas samaacho 'dey'doocheen.
[3] Yeesso wihi us eti dahane hanjaawte iyidah, “Enenyet tuumman ortiis tolosso!”
[4] Yeesso 'deerka wihi us icho worsate, “Seeri Lanaso ka, wihi haaggane layeelo ichoow suujoonki layeelo koh amurreteen israahaan? Jiroti enenyete laribo israahaan bal enenyeti layagiis?” I'daasenyi gammadicheen.
[5] Yeesso hol ka indo leeraahe toro weyti uur suujowe, matahmiigticho ka. Et, “Dahantaah fiti!” iyidahye, et dahan ficche, dahane toro tuum haagsatte.
[6] 'Deerka Farissaayo bahte, 'doo'd 'Herood iiratte, chirraas on jiti icho Yeesso kayagiisiin kamasseen.
[7] Yeesso ichoow abattitiis ba intaas katabeene, beyti Gaalilaaya afiche irteene, 'doo'di ittaawenye boroofenhi Gaalilaaya kayimiy la raahe.
[8] Wihi us yeelo ladaage, enenyeti ittaawe ili Ya'huudiya ichoow ilkerengeetti weene Yeerusaleem ichoow ili Idumeeya ichoow ili Yoordan berihiise ichoow ilassi ilkerengeetohi Tiiro ichoow Siidon tuumman kayimiy.
[9] Jeenteti urur ibuuraatuu, abattitiis koobanhoo us koro, 'dee goya katolossati, urur iskalaabo daahe.
[13] Yeesso irte burroo kore, 'doo'di us 'doono isiwahe, icho la usu iyimaateen.
[14] Et tomon ichoow lamma soobahsate, ergaanotiis kayeesse 'dee usu leejirta, toro leergata Yeedi Waakh cheekta.
[15] Toro la antohi iche ginnayyo laka enenyet kabihisso siiche.
[16] Reeri tomon ichoow lammeenye us soobahsate a kan, Siimon magahi us ibahche a Beetero,
[17] Yaakoobohi inam Sebedaayee ichoow walaaliiski Yoohana layadeeh. Icho la magahi us ibahche a Bowwanerge. I'daakka la mehe leessa ya, “Yeeleti Karkaraho.”
[18] Reeri addan la a Andereeya, Fiilif, Bar'dolomaayo, Mattaayo, Toomas, inam Alfaayo ki Yaakoobo layadeeh, 'Da'daayo, Siimonhi magahiis Yaaftiis'doone layadeeh,
[19] ichoow Yuuda Iskaariyoot, ki yomboka Yeessó 'dub gooche.
[20] Yomboka Yeesso minki us fiddiyo isoonokhte, urur la buuraate, ichoowka usu ichoow abattitiis saggi icho igolossataan laka waayeen.
[21] Chirri abartiis ichoow walaalinyetiis daageen ka yimaateen, goobe geechaanee. I'di tahe mehe essaan ya, “Us a sirgowe.”
[22] Tagaammeti amurre la ilkerengeetti weene Yeerusaleeme katimiyye, mehe elatta ya, “Beelsebuule dakhta alah! Miigti karnati ginnayyoote enenyet ginna kabahcha.”
[23] Yeesso 'deerka 'doo'd wahe, mammaho ka leeyyeede, “Seytaan saggoh Seytaan ibahcha?
[24] Yaafe chirri iche seley goote, geed iche fiddiito mele.
[25] Minki seley gowe, isdiho geed us fiddiyo mele.
[26] Seytaan laka, chirri usu on isikahe seley goggowe, geed us fiddiyo mele, a baaba.
[27] Rumanka et minki etoo miige gelo meehiis hato mele sammata us koloo etaas miige ihidhidin. 'Deerka chirraase minkiis hata.
[28] Runti an atin icheeko, enenyet uskeeliis tuumman ichoow gaf tuumman laka a liikakuta on.
[29] I'daasenyi eti Rubeyti Munyee igafe, jirtuu uskeeliis ma liikakuto. Uskeeli u' gele, a ki jirtuu laka imassan.”
[30] Wihi us 'doo'daas i'daas ikayidah, a jeenteti icho “Usu ginna dakhatta!” iessaan.
[31] Abartiis ichoow walaalinyetiis 'deerka yimaateene, khar tolossateen. Farniin ergeene 'dee Yeesso a liisoowaho.
[32] Ururi kootte Yeesso khaariche fiddiyo la, wihi icho Yeesso iyidaaheen, “Abartaah ichoow walaalinyetaah a kiyowtaane, kallaayo khar ka.”
[33] Wihi us worsate, “Kamalda bal, abarteey ichoow walaalinyeteey a ayyo illeh?”
[34] 'Doo'da fiddiyo khaariche yeye, “Yeya, abarteey ichoow walaalinyeteey kallaayo.
[35] A mehe eti tuummane wihi Waakh 'doono yeelo, a walaalaaya, a walaassaaya, a abartaaya,” iyidah.