[1] Farissaayotoo ichoow tagaammetoo amurre ilkerengeetti weene Yeerusaleem katimiyye, Yeesso khaarisse.
[2] Abattitiistoo dahanohi bi'dire kagolossatti, geeddi icho igolossan dahano idikhan argeen.
[3] A mehe Farissaayo ichoow yaafohi Ya'huud tuumman, hugumme aacchinyetichooda raahaane, ma golossataan geeddi icho koloo dahano idikhan.
[4] Toro la chi'iche sokko katimiy, ma golossataan sammata icho koloo dahano idikhan. Saggaas on u hugummeti noole raahta i'di maanta ti kokkoobbe ichoow karmohi ga'daarre ichoow ibiriikkhe ladikho.
[5] 'Deerka Farissaayotaas ichoow tagaammetaas amurre wihi icho Yeesso worsateen, “Abattitaah a i'doh hugumme aacchinyeteen iraahine, dahanohi bi'dire ikagolossatta?”
[6] Wihi us ilaabe, “Iskaayyeessooy, Isaaya maanti us wori Waakhe atin miinsan kaayyeede a eysiiche. Wihi chiiran, “ ‘'Doo'da af on ka ikoolicha, i'daasenyi uuricho goyaka foga ileejiraan.’
[7] Immarah on iwahtaan. Hugummeti enenyet soouume i'di amurreti Waakh u enenyet abchaan.
[8] Amurreti Waakh a 'diissaane, hugunki enenyet jurkhissaan.”
[9] Yeesso toro mehe iyidah ya, “Atin jita ekkeysi atin amurreti Waakh 'dol ilaabtaane 'dee hugummetiin raahtaan ka enenna a tagaammee.
[10] A mehe Muusa amurane cheeke, ‘Aabbahaah ichoow abartaah inkaanyit’ ichoow ‘Eti aabbahiis ommos abartiis falo a layigaase.’
[11] I'daasenyi mehe elattaan ya, etoo a geeddi us aabbahiis ommos abartiis, ‘Gargaari atin ikasugtaan a siinti an Waakh ibahche,’ iyadeeh on. Gargaara Korban iche layadeeh.
[12] Etaas 'deerka gargaari us aabbahiis ommos abartiis gargaaro a tiratteen gon.
[13] I'daas ka antohi Yeedi Waakh a 'dii'ddaane, hugunkiin enenyet abissaan. Atin wahanyeyyohi i'daasenye ittaawenye yeessaan.”
[14] Yeesso toro urur tuumman isiwahe wihi us iyidah, “Idagansada, waha la abda.
[15] Walah enenyet khar ka gelo usu bi'dirroocho mele, wihi enenyet uuriis kasoobaho on enenyet bi'dirroocha.”
[17] Inkoo Yeesso urur katabe ka minkoo gele. Intaas ka abattitiis mammahti kootte us yidah, wihiis a mehe worsatte.
[18] “Atin laka walah atin gelo mele?” worsate. “Ma abattaan a, walah enenyet khar ka gelo bi'dirroocho mele.
[19] A mehe rubeytiis ma gelaane, i'daasenyi holoolo on gelaane sartiis kabahaan.” Yeesso la wahaas us yidah ka, saggi golol tuumman bi'dir ieheynane tuse.
[20] Yeed orey iwoye, “Enenyet wihi goytiis kasoobaho iche bi'dirroocha.
[21] A mehe enenyet uuriis goya iche mali suuje kayamiit i'di maanta, 'doo'di isidisanne isleeur'do, hatto ichoow ogoossi dubunuunu lagelo.
[22] Wihi addan a mejeli makhaabassi tiis ieheynan leeur'do, 'damaam, uskeeli layeelo, ekkeysi, soho'ddarri, kal'darri, ham, rannyaat ichoow 'dalammoon.
[23] Uskeelaas tuumman a ki enenyet goytiis kasoobaho bi'dirroocho.”
[24] Yeesso ili Gaalilaaya kakahe, ilassi ilkerengeetti Tiiro idow irte. Minkoo gele usuhi enenyet saggi us intaas ikijiro abti ma 'doono. I'daasenyi emeettiis ma dagsanto.
[25] Makhaabassoo inanticheti rucchul ginna dakhatti uus iche emeettiis daagte on timiyye luhlohiis ka il gu'dubte.
[26] Makhaabassa la a yaaftoo Ya'huud ieheynane ili Siiriya ka intoo Foniikiya layadeehe kadelatte. Yeesso hawwaassatte, wihi iche itidah, “Ginna inanteey goya kabihi!”
[27] I'daasenyi arám iiyeyye, “Alley, koloo nyaakhut a golossati, a mehe gololi nyaakhute lakhaato kararre liikhubo ma haaggan.”
[28] Wihi iche ilaabte, “Aa, Kamuraaw! I'daasenyi kararre laka, kombor iliche ka wihi nyaakhut kididdihe a suunatta on gon.”
[29] 'Deerka wihi us iyidah, “Jeenteti wihi at tidah u, tab ginna weel a kabahtee.”
[30] Goob iratte inantiche ichehi siriir kajiifto 'hesse, ginna la a kabahte.
[31] Yeesso saahka ilassi Tiiro idow kabahe, ilassi Siidon goya tabe, ilassi Ilkerengeetohi Tomone leeyimiyye Beyti Buurenye Gaalilaaya yimiy.
[32] Etoo dogo laaye yeyyeed lee'hoolyahe liikeene, enenyet tuumman Yeesso hawwaaste, 'dee dahan a korcho a samaacho.
[33] Ét 'dol geeche, nabho farro gesse, farro iskatufe, hanjuf harrab ka'daare.
[34] Serey yeye, “E'h!” yidahye, toro, “Effaa'da” yidah. I'daakka la “Furam!” iche leessa.
[35] Chirraas on et dogo bakkaaheene, harrabiis furname, mujjum yeyyeede!
[36] Yeesso urur amur ibahche uus icho wahaas cheekin. I'daasenyi urur geedda us amur ibahcho, geeddaas 'dirihiissa yeed taa'hiche.
[37] 'Doo'd weyti girmeeste, mehe essaan ya, “Wihi us yeele tuumman weyti haagganyihiin. Dogowaayyo ichoow afwaayyo laka a haaggicha!”