[1] Yeesso 'deerka makhaaballetaas mammah ka wihi us iyidah, “Etoo geeyohi sabiibe gosiis goyaka il gesse. Gos ootti dagaheet kamarche, lunki gurnaanki sabiib lakayabti khute. Koondihi deere eti gos yaakhicho fiddiyo, laka dise. 'Deerka gosiis lakireeste, ulla iloo deer sulhaal kiirte.
[6] “Etoo kaldaye us ergati 'hade, a inankoo, ki us weyti 'doone. 'Da'ddaboka inankiis ergate. ‘'Dee inankeey a inkaanyitta one,’ iche essa.
[7] “I'daasenyi 'doo'di gos kireeste mehe isiyidah ya, ‘Ki dahal leh kalla. Kaaleya a nigaase 'dee dahalhiis weheen a yitaaheen.’
[8] 'Deerka khabteene, yigaaseene, gosi sabiib khariis iseyeen.
[9] “Kamalda bal, eti gosi sabiib leh 'deerka mehe yeela? A yamiite 'doo'daas yagiise, 'dee gos 'doo'doo addan gessa.
[10] Atin injire waha Chiirnaanneti Waakh ka ma soomin a? “ ‘Daakki 'doo'di minan diso 'dii'de, iche tirrinki dagaheete min tiiro yitah.
[11] Kamure waha yeele, indoheen ka la weyti haagganyahiin!’ ”
[12] 'Deerka weynaanti Ya'huud jiti iche Yeesso kakhabatti yowatte, a mehe saggi us mammahtaas ka woricho ikaayyeede iche garteen. I'daasenyi urure karooraane, 'deerka katabte iratte.
[13] Farissaayotoo ichoow 'doo'd 'Herood koo Yeesso iergateen angeye gelin 'doonta yeediis ka.
[14] 'Doo'd Yeesso iyimiyye, wihi us iyidah, “Eti ween, nah saggi at rum ikanokhan a garanna. At et at ibaasso mele, weyneetteey ichoow kuus ka ba. I'daasenyi jiti Waakhe at enenyet abisso ichoow runti Waakh a israahaan. Kaaysarhi weene kooddi liiguto a mujjum a bal mujjum mee?
[15] A igunna bal ma igunno?” I'daasenyi Yeesso saggi icho isikaayyeelaan garte, wihi us worsate, “Atin a i'doh ani angey igelin i'doontaan? Bal chilinkoo Rooma ikeena, a argo.”
[16] Chilinkoo liikeene. Chirraakka wihi u' worsate, “Foola ichoow magaha kachiiran, a keyya?” Wihi icho ilaabeen, “A koo Kaaysar.”
[17] Yeesso chirraakka iiyeyye, “Kaaysar, wihi wihiise iguta, Waakh la wihi wihiise iguta.” 'Doo'd usu weyti kagirmeeste.
[18] 'Deerka 'doo'doo Sadukaayo Yeesso iyimiyye wohoo worsate. 'Doo'da la 'doo'di tuume berri ma sookaho iche essa.
[19] “Eti ween, Muusa goorat mehe inno ichiire ya, ‘Chi' etoo walaaliis yumuyye, makhaabál katabe i'daasenyi nyaakhut ikhabin, etaas makhaabassaas a disti, walaaliis nyaakhut a idelo.’
[20] Reeroo teebeenye isleedesse a jire. Ki ween min diste nyaakhut ma 'heline, buje.
[21] Ki lammaatteet muunkhotaas diste, i'daasenyi nyaakhut ma 'heline, buje. Ki seyyahnaatteet laka i'daas on eheneet.
[22] Teebaccho ba, koo nyaakhut katabe mele. 'Da'ddaboka makhaabale laka tumuy.
[23] Maanti 'doo'di tuume lasookahcho, etichekoh makhaabassiis tateeh teebaccho la a disteenee?”
[24] Yeesso wihi us ilaabe, “Atin wihi Chiirnaanneti Waakh enenyet abisso ichoow miigti Waakh ma garattaan. Jeenteta menya jiti baabule ikijirtaan?
[25] Maanti 'doo'di tuume sookaho, min ma distaane ommos mindischo ka ma ladiibo. Icho tuumman i'di herti Waakhe goobi Waakh kijirto yateehiin.
[26] Atin wori 'doo'di tuume omoot lakasookahcho miinsan ma soomin a? Rumanka buuggi Muusa chiire ka wori geeyi hidaad goyaka bolkho a agarteen. Wihi Waakh iyidah, ‘Ani a Waakh Aburaaham, a Waakh Isakh, a Waakh Yaakoobo.’
[27] Usu Waakkhi 'doo'di tuume mee, i'daasenyi a Waakkhi 'doo'di jiro. Atin weyti khufteen, atinhi 'doo'di tuume kol us toro isookahin koogtihiin.”
[28] Etoo la a tagaanki amurre yimiyye wihi icho kahawwoochaan daage. Saggi Yeesso yeed ieysiiche arge, wihi us Yeesso worsate, “Amurreti Waakh tuumman goyaka, koh weyti khumman?”
[29] “Ki wihi addan tuumman kuto a kan,” Yeesso iyidah, “ ‘Daaga, yaafohi Issiraayeloow! Kamureenki Waakhe a Kamuroo kalday on.
[30] Kamuri Waakkhaahe uuraah tuumman ka ichoow rubeytaah tuumman ka ichoow malaah tuumman ka ichoow miigtaah tuumman ka 'doon.’
[31] Ki lammaatteet la a kan, ‘Ollokkaah geeddi at is'doonto 'doon.’ Amuri amurreta kussan, ma jiro.”
[32] Et wihi us soolaabe, “Eti weenoow a eysiisse. Wihi at tidah ka at a eysiisse, Waakkheen a koo kalday one, koo addan ma jiro, usu on menye.
[33] Kamuri Waakkhaahe uuraah tuumman ka ichoow garanti at walah garatti tuumman ka ichoow miigtaah tuumman ka 'doon. Ichoow ollokkaah geeddi at is'doonto, 'doon. 'Dooninta naffi tuum Waakh liigubo ichoow soorriyo tuumman a kutta.”
[34] Yeesso saggi makhaabal yeedi khara isoolaabe arge, wihi us iyidah, “At dakhi Waakh kadeeraan mele.” Uus maantaas la et usu wohoo addan worsan iggo mele.
[35] Geedda Yeesso uranti minki Waakhe buure ka Yeedi Waakh enenyet abcho, wihi us worsate, “A i'doh tagaammeti amurre, Ki Lasubhe a hiiy Dawuud ielatta?
[36] Dawuud rubeytiis Rubeyti Munyee ka yeyyeedaayi mehe yidah ya, “ ‘Waakkhi Kamure wihi us Kamureey iyidah, Dabankeeyki miigeete antoot orrommo, ichoowka chiiytaah tuum dahanohaah a soogesso.’
[37] Dawuud rubeytiis usu Kamure kawaha, saggoh 'deerka Ki Lasubhe hiiy Dawuud iyahe?” Urur tuumman hamaadi buure ka dagansate.
[38] Yeesso urur walah abchaayi wihi us iyidah, “Tagaammeti amurre yuubsada! Wihi icho weyti 'doonaan a ichohi darfohi hahhaaggane derdeer leesohti, toro la sokkoyyo ka weyti inkaanyit ka labariiticho.
[39] Toro la chi' minki weysiite Ya'huud ommos sukuukuyyo lagele, wihi icho weyti 'doonaan a ichohi meessi weyti lakiinkaanyito orronti.
[40] 'Doo'da muunkhoyyo ekkeesta, hoolahicho kakhaataan. Chi'iche weysatti la, enenyeti haaggane iskaayyeessa, weysi derdeeraassa. 'Doo'da Waakh sinati weyti kutto igoocha.”
[41] Yeesso minki Waakhe buure ka inti sadakha lakachibo hagga orronte, enenyeti chilimme saanduukhi chilimme lakalug'do kichibo 'dey'dooche. 'Doo'di ittaawenye kamurree, chilimmeti buure meel kichibe.
[42] I'daasenyi makhaabassoo muunkheenye miskiine timiyye, chilim lamma wohoo rucchul laka ibihin meel kalugu'dde.
[43] Yeesso abattitiis isiwahe, wihi us iyidah, “Rume atin icheeka, muunkhota miskiine, iche saanduukhi chilimme lakachibo, 'doo'di addan 'dirihiis wihi buure kalugu'dde.
[44] Kamurre tuumman kamurroonkiche ka sadakhatoore bihisse, i'daasenyi iche miskiinkiche ka wihi iche kanoossahe tuummane bihisse.”