[1] Ibeennetaas on ururoo buure toro kulme, golol la ma khabin. Yeesso abattitiis wahe wihi us iyidah,
[2] “An 'doo'da weyti uur isoonugleesda. Maan seyyah dakkhan ani on ileejire wihi icho yamhiin la ma khabaan.
[3] Chirri an ankaa khabaani goobassicho ilaabo jit ka a sussuuhaan. A mehe gaasichokoo foga kayimaateen.”
[4] Abattitiis wihi iche ilaabte, “Yiba ka la, gololi geeddaasenye enenyeta tuumman yaakho intoh ka'hella?”
[5] Yeesso la, “Makaate geeddoh khabtaan?” worsate. Wihi icho ilaabeen, “Makaate teeba.”
[6] Ulla urur amur ibahche orrommiche. Makaateyyohi teebee khaate, Waakh kala'd ilaabe jejjebche, abattitiis ididdiibe, “Ba'h gisa,” iyidah. Iche la ba'h gisse.
[7] Bahaggi rurrucchul laka wohoor a khabte. Yeesso wahaas laka iweeste, “Waha laka gisa,” iyidah.
[8] 'Doo'd golossate ichoowka darge. Abatti enjel teeba gololi jejjebane lasoowaache buuho soosuunte.
[9] Mejeli golossate a geeddi elif affar. Inkoo us enenyet laabe ka,
[10] chirraas on kooban goya gele, abattitiis khabaayi anki distiriighi 'Dalmanuu'da tabe.
[11] Farissaayotoo timiyye Yeesso leeiriirte usu angey gelin 'doontaa, wahanyeyyohoo miigti Waakh tuso goobi Waakh kayimiy daahte.
[12] Yeesso uur suujowe, “'Doo'da i'dee a i'doh wahanyeyyohi miigti Waakh tuso idaaha?” yidah. “Rume atin icheeka, wohoo kaldaye miigti Waakh tuso laka ma lasiicho!”
[13] 'Deerka Yeesso Farissaayo katabe, kooban goya inokhte, beyti Gaalilaaya aficheki 'diri irte.
[14] Abatti makaate a kadabte, too kaldaye iche kooban goya kakhabto on menye.
[15] Yeesso icho tootooche, “Yeedad Farissaayo ichoow yeedad 'Heroode i'di booddati makaate fuurissee yuubsada!” iyidah.
[16] Icho la iskaleehawwoocheene, wihi icho yidaaheen, “Jeenteti inno makaate ikhabine i'daas iessa.”
[17] Yeesso la, wihi iche kahawwoosso a garta, mehe icho worsate ya, “A i'doh makaatewaayyo ikayeyyeeddaan? Atin uliba walah ma abanna? Uurassiinna ladagahnooche?
[18] Indo a khabtaane, i'daasenyi walah atin agartaan mele! Nabho la a khabtaane, i'daasenyi walah atin daagtaan mele! Toro ma kasoo'hessaan a?
[19] Maanti an makaate chan mejeli elif chane ijejjebche enjel geeddoh makaateti soo'hadde kijirto soosuunteen?” Wihi icho ilaabeen, “Tomon ichoow lamma.”
[20] “Maanti an makaate teeba mejeli alif affare ijejjebche enjel geeddoh buuhto makaateti soo'hadde kijirto soosuunteen?” toro worsate. Wihi iche ilaabte, “Enjel teeba.”
[21] “Toro la uliba walah atin abatteen mele?” iyidah.
[22] Ilkerengeetti Bessaayda yimaateene, 'doo'doo la etoo indo laa Yeesso ikeene, hawwaasteene, 'dee dahan a ka'daaro.
[23] Yeesso et dahan khabte, ilkerengeet khariche geeche. Et indo katufe, dahan korche, “Wohoo a agarta?” worsate.
[24] Et la serey yeye wihi us yidah, “Enenyet a arga, i'di geeyohi sohti iyoogyahiin.”
[25] Toro et dahano indo korche. Kolaakka et indo furnameene, indo toro haagsateene, walah tuumman mujjum arge.
[26] Yeesso et minkiis ierge, wihi us iyidah, “Ilkerengeet goya iiran.”
[27] Yeesso ichoow abattitiis ba ilkerengeetohi ilkerengeetti weene Kaaysareya Fiiliffi kamarsan ikaheen. Jit raahaani, Yeesso abattitiis wihi us worsate, “'Doo'd an a ayyo essa?”
[28] Wihi iche ilaabte, “Gaasoo ati a Yoohanahi Enenyet Baattissiyo iche essa, gaasoo a Eliiya essa, gaasoo laka 'doo'di goorat Waákh íyeyyeedo a kichekoo, iche essa.”
[29] “I'daasenyi atin la? An a ayyo tadeehiin?” worsate. Beetero wihi us ilaabe, “At a Ki Lasubhe lasugo.”
[30] Yeesso icho tootooche, uus icho eti us yahe etoo kalday laka icheekine.
[31] Yeesso 'deerka abattitiis wihi Waakh gooche abinnaan sookhabte. Waha la a saggi Ínam Aadam sinati buure liituso, ewweenki Ya'huud ichoow kuhaaniyyohi wewween ichoow tagaammeti amurre usu i'dii'daane, liiyagiise, chirri maan seyyahe kutte us omoot ikasookaho.
[32] Yeeda weyti ibabbakkaahiche, Beetero la usu 'dol geeche leejaakhe.
[33] I'daasenyi Yeesso urgiye abattitiis yeye, Beetero leejaakhe wihi us iyidah, “Seytaankaane fooleey buj! At wahanyeyyohi Waakh menye, i'daasenyi wahanyeyyohi weeli enenyete kamalatta.”
[34] Yomboka urur ichoow abattitiis wahe wihi us iyidah, “Chi' etoo isooraahin 'doono, awtiis a 'dii'do toro la massalaabatiis barbar a sookorsati a isooraaho.
[35] A mehe eti tuummane jirotiis ribin 'doono jiroti rummaat a waaya. I'daasenyi ki ani ichoow Wori Haaggan jirotiis iwaayo, jirotiisti rummaat a riba.
[36] Etoo maanta a chirri us wohoo 'hele chirri us wihi harrata tuumman 'hele, jiroti awtiissa Waakh siiche la waaye?
[37] Ommos weeli enenyet maanta mehe diibin yabuu'de jirotiis kadooricha?
[38] Chirri etoo 'doo'da wey'dane waakkhassi addan wahti uskeel leh goyaka ani ikuuryaawo toro yeedeey kuuryaawo, Ínam Aadam laka maanti us miig Aabbahiis ichoow ti herti Waakhe munyee leesoonokhti, usu a kuuryaawa.”