[1] Chirra us minki Waakhe buure kabaho, abattitiis koo wihi us yidah, “Eti ween, haaggi minassa ichoow daddaabohi burbuurenye lakadise, yey!”
[2] Yeesso wihi us ilaabe, “Minassa tuummane burbuure yeya! Berri daddaabtoo kaldaye ti addan fuusso lakatabo mele. Icho tuumman a lasookhuba.”
[3] Chirra Yeesso Hali Geeyohi Oolife minki Waakhe buure yeyo koorronte ka Beetero ichoow Yaakoobo ichoow Yoohana ichoow Andereeya la iyimaateene dagsi ka usu wohoo worsateen,
[4] “Nah isoocheek wahanyeyyoha maantoh yateehiin? Toro mehe yateehe 'dee saggi dowwanoha ka waha tuumman liisoobuuhicho tusa?”
[5] Yeesso la wihi us iyidah, “Yuubsada, uus etoo kalday laka atin ekkeysan!
[6] 'Doo'di ittaawenye ani iskaayyeelo yamiite, ‘An a Ki Lasubhe’ essi, a agartaane, 'doo'di ittaawenye ekkeestaan la.
[7] Maanti atin yaafohi isdiho ichoow worassi ibuuhine dihoyyoot daagteen, anahina. Wahanyeyyoha a sooyateehiine, i'daasenyi ibeenki yomboot uliba a ankhanyahe on.
[8] Sirgaalle a isdihta, karnato laka isdihaan. Ilassi ittaawe ka harra sesseehta, nabhayye laka tamiit. Wahaas a chiis birriissa on.
[9] “Atin rubeytiin laka yuubsada. Jaldaabohi Ya'huude atin liidiiba, minassi weysiite Ya'huud ka atin lajaha. Jeenteteey u, gaafanayyo ichoow karnatte atin liigeecha atin liicheekta, atin la garti Wori Haaggan tateehiin.
[10] Wihi Waakh gooche, koloo Wori Haaggane 'doo'di harra tuumman liicheeka.
[11] Maambaaw atin lakhabte dahanohicho atin lagesse, orey on wihi atin sootadeehiin akawa'dwaa'dina. Wihi chirraas atin lasiiche on daha. A mehe atin mee yeyyeeddaan, i'daasenyi Rubeyti Munyeenye yeyyeedda.
[12] “Etoo walaaliissa 'dub goocha dahanohi nahab gessa 'dee layagiis. Ooyo laka weeliis i'daas yeela. Nyaakhut 'doo'di dele yeedicho 'dii'da, dahanohi 'doo'doo addan gessaane 'dee layagiis.
[13] Enenyet tuumman a atin 'dii'da jeenteti atin abattiteey itahiin u. I'daasenyi, eti garrahsate ichoowka sinata 'dubiche eleele a lariba.
[14] “Maanti atin ‘iyookkoti weyti bi'direnye 'doo'd keehisso’ inti ikamalin katolosso agarteen, 'doo'di ili Ya'huudiya fiddiyo tuumman halal a ifirdo. Atihi yeeda soonto yeeda a kigelo.
[15] Eti minkiis sartiis fuulo uus min geline wohoo rucchul laka khaatin.
[16] Eti gos goya kijiro, uus nokhanne kabuu'diis sookhaatan.
[17] Ibeennetaas sinati deyyehoti nuugsatti ichoow ti huleesenye nyaamitto iubaa'dan sugto enenna a buure.
[18] Waakh waho, uus maanassaas sinayyoot, maanti il weyti roffo yahe hir 'deyo eheynan.
[19] A mehe sinati maantaas jirto, ti geeddaase uus uumaccho ka Waakh harra soouume ma laargine, ichoow uliba. Toro wihi i'dicheenye lasooargo ba ma jiraan, jirtuu tuumman.
[20] Chi' Kamur ibeennetaas igaabin, etoo kalday laka ma soo'hado. I'daasenyi iroonoti 'doo'diiski us soobahsatuu, ibeennetaas a gaabiche.
[21] Maantaas chi' etoo, ‘Yeya, Ki Lasubhe kalla,’ ommos, ‘Yeya Kuulla!’ kiyidah, arummeysan.
[22] A mehe 'doo'doo Ki Lasubhe iskaayyeelo ichoow 'doo'di 'doo'di Waákh íyeyyeedo iskaayyeelo a soobaha. Icho la wahanyeyyohi ittaawenye nane miigti Waakh tuso ichoow girmo yeelaane, 'dee chi'iche tateeh 'doo'di Waakh soobahsate ekkeestaan.
[23] Isyaakhicha gi'de! Walah dakkhan geeddi il ankhayyahe a atin isoocheekee.
[24] “I'daasenyi maanassaas sinayyohaas buure kuteen, “ ‘orrahe a daayatta, yeyyah la banayhiis ma soobahcho,
[25] yiyyihimo serey a kasookhubtaane, miigti saraat la lakorkokicha.’
[26] “Maantaas Ínam Aadam usuhi mirso goyaka yamiite, miig ichoow antohi buure khabo weeli enenyet tuumman a arga.
[27] Herti Waakh harra 'dollohiche affarcho ierga, 'doo'di Waakh soobahsate harra 'dubiche ichoow sereyta daayan 'dubiche kasoobaayissa.
[28] “Taba geeyi fiig yeeda kaabda. Uu' liikhimohiis ulhawtaane seeb bahchaan, saggi 'daato isoodowwaatte a garattaan.
[29] Saggaas on u maanti atin wahanyeyyoha ibeenki 'da'ddaboot tuso agarteen, saggi soonokhantiis isoodowwaatte kola ititah a garattaan!
[30] Rume atin icheeka, 'doo'di i'dee ma tuumo ichoowka wahanyeyyoha tuumman yateehiin.
[31] Sereyta daayan ichoow harra a kutaane, i'daasenyi yeedasseey jirtuu tuumman ma kutaan.
[32] “Aabbaheey on menye, et maantaas ommos saha'ddaas garti mele. Herti Waakhe goobi Waakh fiddiito ommos Ínam Aadam laka ma gartaan.
[33] Taba isyaakhicha! Toorribda! Ibeenki saha'ddaas tateeh ma garattaanee.
[34] Waha iyookkoka, a i'di etoo sulhaal irti. Minkiis katabo, bow'dayyohiis anto siicho, kooba hili us haaggicho ikatabo, eti arit fiddiyo la amuri us meel yaakhicho ibahcho.
[35] “Maantaka toorribda, a mehe saha'ddi ooyohi goob leh soonokhti ma garattaanee. Usu geleb ommos naanokho ommos geeddi lukki kariiro ommos baryo yamiit ma garattaan.
[36] Chu'us dog laan yamiit, uus atinhi u'durtaan atin 'helin.
[37] Wihi ani atin iadeeh an enenyet tuummane iadeehe, ‘Taba isyaakhicha!’”