[1] Toro wihi us iyidah, “Rume atin icheeka, gaasiinkoo maanta inta kijiro omoot ma argo, ichoowka dakhi Waakh miig khabaayi yamiit.”
[2] Inkoo ibeen lihe kutte ka, Yeesso Beetero ichoow Yaakoobo ichoow Yoohana khaatte, woye, haloo deer koreen, ichohaas on. 'Dey'doossaayi Yeesso luurgiyiche.
[3] Gaaddiis la weyti dakhnaatte, waha maanta torrogoote, dikhaassi harrata kootte ikayeelin yitaaheen.
[4] Eliiya ichoow Muusa ba orcho ka soobaheene, Yeesso leeyyeedeen.
[5] Beetero wihi us Yeesso iyidah, “Eti weenoow, a haaggantahe gon, chi' nah inta kijirro. Alley gaayim seyyah a disno, too a taahha, too a too Muusa too la a too Eliiya.”
[6] A mehe abattiti seyyahe weyti nahte, Beetero wihi us laabo ma garti.
[7] Mirisoo soobahe icho tuumman ankube. Hooyoo la mirisaas goyaka sooyeede, “Waha a Weeleeyki an weyti 'doono. Usu nabah isuda!” yidah.
[8] Chirraas on jilakh rorrogatte, et addane icho leejiro icho argeen mele Yeesso on menye.
[9] Chirra icho hal kasookhubtaan ka, Yeesso icho amur ibahche, iicho wihi icho argeen 'doo'di addan iicheekine ichoowka Ínam Aadam omoot a kasookaho.
[10] Wihi us iyidah raahte, i'daasenyi ayta omoot lakasookaho wihiche kahawwoocheen.
[11] Wihi icho Yeesso worsateen, “A i'doh tagaammeti amurre, ‘Eliiya koloo yamiit,’ ielatta?”
[12] Yeesso wihi us ilaabe, “Rumanka, Eliiya koloo yamiite, walah tuumman i'di icho eheneet toro kayeela. Kamalda bal a i'doh Chiirnaanneti Waakh goya Ínam Aadam bolokkhi buurenye latusa, weyti la'dii'da liikachiire?
[13] I'daasenyi wihi an atin icheeko, Eliiya a yimiyye, 'doo'd la suujoonki noole icho 'doonaan usu tuse i'di wihi usu miinsane lachiiruu.”
[14] Chi'iche abattiti addan itamiit, ururi buurenye icho khaariche argeen. Tagaammeti amurre ichehi abatti leeiriirto 'heleen.
[15] Enenyet uun us Yeesso arge weyti girmeeste, iorye bariitiche.
[16] Yeesso wihi us abattitiis worsate, “Atin mehe 'doo'daas isleeiriirtaan?”
[17] Etoo la urur goyaka wihi us ilaabe, “Eti ween, inankaaya kikeene, ginna dakhatta, yeyyeed tiratta.
[18] Kolbaaw iche khabatte, ile irogta, af dakkhan 'dombeestaane, ilko iskaroba cho'ha. Abattitaah, ‘Ginna inam kabahcha,’ iidahye, i'daasenyi iche a agaafatte.”
[19] Yeesso wihi us ilaabe, “'Doo'di wey'dane Waakh ikakhuufin, geeddoh atin leefiddiyo? Geeddoh atin igarrahsadi? Ínam ikeena!”
[20] Ínam Yeesso ikeeneen. Ginna uun iche Yeesso agarte, chirraas on inam korkokisse. Inam il gu'dde, fade, afa dakkhan 'domboyyo leekeene.
[21] “Uu' maantoh i'da eheneet?” Yeesso aabbahi inam worsate. Wihi us ilaabe, “Uus weel eheet.
[22] Geeddi buure 'dab ommos bicche goya kalugu'dda, ichehi tagiise 'doontaa. I'daasenyi cha'at wohoo nah iyeelin tabuu'd, uur nah isoonugleyso, nah gargaar!”
[23] “Cha'at wohoo tabuu'd a?” Yeesso yidah, “Eti Waakh on rummeesti walah us iubaa'dan mala.”
[24] Aabbahi inam chirraas on sooriire, wihi us yidah, “An a kirummeesda, i'daasenyi igargaare uurlammaal a baho.”
[25] Yeesso chu'us ururi intaas isooryo arge ka, ginna leejaakhe, “Ginnata ínam yeed ichoow dogo tirto, amure kibahchaa, toolla kofche inankaas goya kabahe, jirtuu la iinokhan!” iyidah.
[26] Ginna riirit gu'dubte, ínam korkokisse kabahte, inam i'di eti yumuy yitahye, 'doo'di buure, “A yumuy,” yidah.
[27] I'daasenyi Yeesso inam dahan khabte, sootoolliche, inam la tolossate.
[28] Inkoo Yeesso min gele ka, abattitiis dagsi ka mehe worsatte ya, “Nah a i'doh ginna bihit iagaafanne?”
[29] Wihi us ilaabe, “Ginnati i'dee, wihi bahcho tuumman a weysi kalday.”
[30] Intaas kakaheene, ili Gaalilaaya dah kagoocheen. Yeesso usuhi enenyet inti us kijiro abti ma 'doono,
[31] a mehe abattitiissa wohoo abchaa. Wihi us iyidah, “Ínam Aadam dowwanoha ka 'dube lagoocha, dahanohi enenyet lagessa yagiisiine, chirri maan seyyahe kutte ka omoot kasookaha.”
[32] I'daasenyi wihi us idowo ma abanne, toro usu worsan karooreen.
[33] Ilkerengeetti Kafarnaa'hum soogeleen. Chi'icho min geleen ka, Yeesso wihi us abatti worsate, “Atin kootte jit ka mehe isleeiriirtaan?”
[34] I'daasenyi gammadisse a mehe kootte jit ka eti 'doo'di addan tuumman iweene isleeiriireen.
[35] Yeesso orronte, abattiisti tomon ichoow lammee isiwahe wihi us iyidah, “Chi' etiinkoo orey 'doono, eti weyti 'duboot a yitaahe, falfati enenyet tuumman a yitaahe.”
[36] Weeloo rucchul khaate, goycho toolliche. Dahano kakhabte wihi us abatti iyidah,
[37] “Eti tuummane jeenteti us abattiteey iyahuu, nyaakhuta rurrucchul kichekoo martiisti, ani imartiista. Eti ani imartiisti la, ani menye eti isooergate martiista.”
[38] Saahka Yoohana wihi us iyidah, “Eti ween, nah etoo antohi magahaah ka ginnayyo enenyet goya kabahcho a agarre. Jeenteti us keen ieheynan u wahaas toolli inidah.”
[39] “Ajeyinna,” Yeesso yidah, “Eti antohi magaheey ka wihi weeli enenyet yeelin iubaa'dan yeelo, 'deeka toro ma ihayhayo,
[40] a mehe eti inno i'dii'din, a aaleenna.
[41] Rume atin icheeka, eti tuummane jeenteti us abatti Kiriisto iyahuu kooboo biccheet kisiiche, etaas koloo kalday laka kala'ddiis ma waayo.”
[42] “Chi' etoo 'doo'daar irummeesti kichokoo tarraantarricho la, etaas wihi ideefo a usuhi daddaabti buurenye gurnaan lakatumo lukhum lakahido beyti buure lakalug'do.
[43] Chi' dahantaah uskeel kaalugu'ddo, dahantaas gooy! Atihi dahan laaye jiroti jirtuu imassan 'hesso deefta, atihi dahano lammacho khabto, meessi 'dabi armaanjireene 'dabiche ijitin iratti ka.
[45] Chi' luhtaah uskeel kaalugu'ddo, luhtaas gooy! A mehe atihi elyeenye jiroti jirtuu imassan 'hesso deefta, atihi luhlo lammacho khabto, meessi 'dabi armaanjireen lakaalug'do ka.
[47] Chi' issaah uskeel kaalugu'ddo la, issaas bihi! Atihi issoo laaye dakhi Waakh gesso deefta, atihi indo lammacho khabto, meessi 'dabi armaanjireen lakaalug'do ka.
[48] Intaas ka, “ ‘'doo'daas akhsihiis ma yamuute, 'dabiche la jirtuu ma jito.’
[49] Saggi orran golol tuumman magaa'd liikachibuu, saggaas on enenyet tuumman 'dabi sinayyoot itaba.
[50] “Magaa'de a haaggantahe. I'daasenyi chi'iche gimbatiche waayte saggoh toro liigimbaacha? Magaa'ddi haaggane gimbatiche khabto ateeha! Nebey iskaleefiddiya.”