[1] Toolla woriiyye an atin kaleeyyeedo a chilimmeti labaayicho, 'doo'di Waakhe ili Ya'huudiya kajiro lasiicho miinsan. Atin laka wihi an ururre Kiriistoti boroofenhi Galaatiya kajirto yeela iidah on, atin laka yeela.
[2] Teeba tuumman ibeenki oraat etiimba chilimme geeddi Waakh siiche, gaasoo meel a gesso, 'dee maanti an amiit chilimme addane labaayicho ba mele.
[3] 'Deerka maanti an imiy 'doo'di atin soobihisseen khadaabbeti eti icho yayyahiin tusso a siicha, siinti chilimmeti atin baayisseen khabaani ilkerengeetti weene Yeerusaleem ierga.
[4] Chirri iche mujjum tahe, a geeddi an laka irdi icho la iraahaan.
[5] Boroofenhi Makedooniya amiite, 'dee atin soo'daara. I'di tahe boroofenhi Makedooniya goya leeamiit.
[6] Anna kolossoo a atin leefiddiya. A geeddi an yeerti il roffo yahe tuumman an atin leefiddiyo, 'dee atin la meelbaaw an irdi ka sulhaasseey ka igargaartaan.
[7] Anihi i'daaru on atin leeamiite, atin kakuto ma 'doono. Afi Kamur ka, anihi geeddoo deer atin leefiddiyo khajjeela.
[8] I'daasenyi ilkerengeetti Efeesso fiddiya, ichoowka daawti Beentekos tateeh.
[9] I'di tahe aritti ballaaddane 'dee an hili khumman kahaaggicho a liifure chirri 'doo'di buure itirrimo laka.
[10] Chirri Timooti goytiin yimiy, taba uus roorrotoo rucchul laka goytiin ka khabin. I'di tahe ullaka i'deey u hili Kamure haaggicha.
[11] Uus etoo kalday laka goytiin ka usu 'darraawin. Chu'us irti, nebey on a kiirti, 'dee ani a isoonokhti. I'di tahe an usuhi mejeloo addane Kiriisto rummeeste khabaayi soonokhti, iche suga.
[12] Wori eteenki Aboollo layadeeh miinsan la, an weyti usu a hawwaasde 'doo'doo addane koo Kiriistee khabaayi atin iirda iidah. Usuhi toolla irti ma 'doono, i'daasenyi ibeenki us 'helo on irta.
[13] Taba istoorriba, kakhuufnaanki atin Waakh kakhuuftaan ka mujjum tolola. Abur'dowina, miig la khaba.
[14] Wihi atin haaggissaan tuumman ka, 'doonin kahaaggicha.
[15] Woriiyye goob Isteefana miinsan a garattaan. Icho a 'doo'di kolooraate boroofenhi Akhaaya ka Kiriisto rummeeste, hili 'doo'di Waakh liihilo ka issoobahche. 'Doo'd Kiriistokaaw, a atin hawwaasde,
[16] 'doo'di i'daase ichoow ki addane hil leehaaggicho aficho akutina.
[17] Emeetti Isteefana ichoow Fortunaata ichoow Akaayikas ba inta yimaateen, weyti kahamaade. I'di tahe wihi ankiin ka ankhaneete buuhicheen.
[18] I'di tahe saggi icho uur atin imiigoocheen, iche ani laka uur imiigoocheen. 'Doo'di i'dee wihi us essi weyti nabah isuda.
[19] 'Doo'di ururre Kiriisto boroofenhi Aassiya kajiro tuumman, a atin soobariitiche. Akiila ichoow Birisiila ichoow 'doo'di Waakhe minkicho ka kulmo, magahi Kamur ka weyti atin soobariiticheen.
[20] 'Doo'di Kiriisto rummeeste inta kajiro tuumman laka a atin soobariitiche. Taba 'doonin Kiriisto iskabariiticha.
[21] Waha la ani rubeytaaya dahanteey kachiira. Ani Baawulo weyti atin soobariitiche.
[22] Eti tuummane Kamur i'doonin, a falanyahe! Kamuroow dowwa soonokho!
[23] Yeessohi Kamure ba atin imaala.
[24] 'Dooninteey ba a atin leejirto, a mehe Yeesso Kiriisto ka inno tuumman a wohoo kalday.