[1] 'Doo'd Kiriistokaaw an saggi 'doo'di Rubeyti Munyee woyto ma atin ileeyyeedine, i'daasenyi i'doo atin 'dabakkhi weeli enenyete harrata ikhabtaane atin ileeyyeede. Toro la kakhuufnaanki atin Kiriisto kakhuuftaan ka atin a i'di nyaakhuti nahas nuugo.
[2] Cha'an wor Kiriisto atin abche, a i'doo an i'di nyaakhuti rurrucchul u an haanu on atin siiche. I'di tahe gololleti mimmiige ohom ma ubaa'dan gon. Uliba laka ma tabuu'diin ba.
[3] I'di tahe atin uliba a 'doo'di 'dabakkhi weeli enenyete harrata khabo. A mehe chirri maanta atin isinaaftaane toro la isleejaakhtaan wahaas saggi atin 'dabakkhi weeli enenyet ikhabtaan ma tusaan a? Waha la saggi atin uliba jiroti 'doo'di harrata ijirtaan ma tusaan a?
[4] Chi' gaasiinkoo “An a abatti Baawulo,” essi, gaasoo la, “An a abatti Aboollo,” essi, i'da ka atin saggi 'doo'di harratane Waakh igaran ma ijirtaan a?
[5] Kamalda bal, Aboollo a mehe, ommos Baawulo laka a mehe? Nah a ilbooyyeti Waakhe atin gargaarte atin la wori Kiriisto miinsan rummeysatteen on. Eteenyoba hili Kamur dahan gesse on haaggiche.
[6] Ani ilmo il gesse Aboollo la ilmohaas bicche kachibe. I'daasenyi, Waakhe ilinta soobahche.
[7] 'Deerka Waakkhi ilinta soobahcho usu khumman, eti ilim il gesso ichoow ki ilim bicche kachibo ba a walahba.
[8] Eti ilim il gesso ichoow ki bicche kachibo ba malicho a koo one, Waakh la ebba geeddi us hil haaggiche on kala'd guta.
[9] I'di tahe nah a 'doo'di Waakhe hil isleehaaggicho, atin la a i'di gosi Waakh ichoow minki Waakh.
[10] Haaggi Waakhe buurenye liisiiche ka, an a i'di tagaanki minan diso, anna daddaabohi ilaat a dise. Etoo addan la daddaabohaas sarcheeda min kadisa. I'daasenyi ebba saggi us min idiso a yuubicho gi'de.
[11] A mehe daddaaboha ilaate orey ladise Yeesso Kiriistee on menye, et daddaabohoo addan disin yabuu'd mele.
[12] Chirri etoo daddaaboha ilaat sarcho 'dahab ommos lahaag ommos dagahti gato miige, ommos kho'doomme ommos hoos ommos meydah kadiso,
[13] maanti Kiriisto soonokhti, hiliis i'di us yahe a lasoobabbakkaahicha. I'di tahe 'dabe saggi hil liihaaggiche soobabbakkaahicha. 'Dab ka hili ebba haaggiche usu mujjume ichoow usuhuus a latusa.
[14] Chirri ebba wihi us dise soo'hadeen etaas kala'd a laguta.
[15] Chirri wihi us dise 'dab yuhum, kala'd a waaya. I'daasenyi usu rubeytiis i'di etoo 'dab goya lakasoobahchuu, a bahsata.
[16] Saggi atin rubeytiin minki Waakhe buure itahiine Rubeyti Waakh rubeyohiin goya ifiddiito kasoo'hela.
[17] Chi' etoo minki Waakhe buure uskulaacho Waakh usu a baabiicha. I'di tahe minki Waakh a lagayyahe, atin la a minkaas.
[18] Iisekkeysanna gi'de! Chirri etiinkoo saggi 'doo'di harrata iekkaacho ka kol us khara yahe iskoogyahe, i'di eti 'doo'di harrata 'dalam iekkaacho a yitaahe, 'dee eti rumanka kharee a yitaahe.
[19] I'di tahe kharati 'doo'di harrata, Waakh ka a 'dalammoon. I'di liichiiruu, “Waakh 'doo'di kharayyee kharatichotaas on kakhabta.”
[20] Toro la wihi addane chiiran, “Kamur mali 'doo'di kharayyee a garta toro la saggi us ki ilmarhaatteet iyahe a garta.”
[21] 'Deerka, “An a abatti ebel,” eelanna eeylajina. I'di tahe walah tuumman a wihiinna,
[22] Baawulo ommos Aboollo ommos Keefas ommos harrata ommos jiro ommos omoot ommos wihi toolla jiro ommos wihi yombo soojiro tuumman eheetteey ka ba, a wihiinna.
[23] Atin la a koo Kiriisto, Kiriisto la a koo Waakh.