[1] 'Dooninti 'doo'di addan la'doono yowda, toro la siimohi Rubeyti Munyee kayamiit weyti imoona. Kach ka la, siinti Waakh liiyeyyeedo yowda.
[2] I'di tahe eti afi Rubeyti Munyee kayamiit kaayyeedo, weeli enenyet mee leeyyeedo, i'daasenyi Waakh rubeytiissa leeyyeeda. Et yeediis daago mele, i'di tahe rubeytiis ka us wihi dagsane kaayyeeda.
[3] I'daasenyi eti wori Waakh kaayyeedo enenyete leeyyeeda, 'dee enenyet disa, uur miigoocha, toro la uur khoboocha.
[4] Eti afi Rubeyti Munyee kaayyeedo usu on isdisa. I'daasenyi eti wori Waakh kaayyeedo urur Kiriisto tuummane disa.
[5] An atin tuumman atinhi afassi Rubeyti Munyee kaayyeeddaan a 'doona, i'daasenyi kootte incheenka atinhi wori Waakh kaayyeeddaane weyti 'doona. I'di tahe eti wori Waakh kaayyeedo ichoow ki afi Rubeyti Munyee kaayyeedo, ki wori Waakh kaayyeedo weyti khumman. Eti afi Rubeyti Munyee kaayyeedo, walah us 'doo'di Waakh ibaho mele, sammata us afaas ilaabine, urur Kiriisto tuumman idisin.
[6] Toolla 'doo'd Kiriistokaaw saggoh atin igargaaro chirri an amiite, an afi Rubeyti Munyee kaayyeedo? Sag ba! Sammata an wihi Waakh isoobabbakkaahiche ommos runti an gardi ommos farniinki eti Waákh íyeyyeedo an atin ikasoochekin, ommos an walah atin iabin, an walah an atin kagargaaro mele gon.
[7] I'daasu laka chirri reemassi jiro ikhabine toro hooy bahcho i'di ki 'haab layadeeh ichoow indulle ba icho tuumman hooyi icho bahchaan seley liibahin, saggoh geeyi kooba dowo liigarta?
[8] Toro la chirri arabi laafuufo mujjum iyeedin, ayyo tannabta, diho irta?
[9] Atin laka 'deerka a i'daas on. Sammata at harrab ka yeedi 'doo'di addan mujjum daago ikaayyeedin, saggoh yeedaah liigarta? A i'doo at hafar leeyyeeddo on.
[10] Rumanka afassi ittaawenye yeerarenye harra ka jira, ki fool ikhabin la ma jiro.
[11] Chirri 'deerka an afoo foolicho ikhabin, an etaas ka a yeelanahe, etaas la ani ka a yeelayyahe.
[12] Waha 'deerka atin laka a atin miinsanyahiin. Atin siimohi Rubeyti Munyee kayamiit weyti yowattaan gone, weyti tirriinsada 'dee siinti urur Kiriisto disso yowda.
[13] Maantaka, eti afi Rubeyti Munyee kaayyeedo, Waakh a wahti 'dee afaas laabin a yubaa'de.
[14] I'di tahe chirri an afi Rubeyti Munyee ka Waakh wahdi, rubeyteey ka a weesda, i'daasenyi maleey indigir us 'helo mele.
[15] 'Deerka mehe yeelo? Rubeyteey ka Waakh a wahda toro maleey ka laka Waakh a wahda. Rubey ka Waakh a saa'da toro maleey ka laka Waakh a saa'da.
[16] Cha'at rubey ka Waakh saa'ddo, 'doo'doo siintaas ikhabin la kileejiro, saggoh, “Aamiin,” iyadeehiin, chirri icho wihi at elatti idaagin?
[17] I'di tahe saggi mujjumenye Waakh kala'd ilaabta, i'daasenyi 'doo'daas ma disso gon.
[18] An weyti Waakh kala'd ilaaba jeenteti an 'dirihiin afassi Rubeyti Munyee ikaayyeeduu.
[19] I'daasenyi urur Kiriisto goya yeedi ittaawenye afi Rubeyti Munyee kayamiite etoo kalday laka idaagin ma kaayyeedo. Yeedoo rucchule enenyet tuumman daago, enenyet walah abcho, iche kaayyeeda.
[20] 'Doo'd Kiriistokaaw, saggi nyaakhut iimalanna. I'daasenyi anki uskeeli layeelo ka, i'di nyaakhuti rurrucchul ateeha, mali atin malattaan ka la, 'doo'di wewweynaate ateeha.
[21] Amurre wihi kachiiran, “An 'doo'deey afassi liigaranne 'doo'di yeelan kaayyeedo kaleeyyeeda, toro la harrabbeti 'doo'di yeelane kaleeyyeeda, i'daasenyi 'doo'deey uliba laka ma idagansati,” iche Kamur essa.
[22] 'Deerka afassi Rubeyti Munyee 'doo'di Kiriisto rummeeste menye, 'doo'di Kiriisto irummeysanne walah tusaan. I'daasenyi farniinki 'doo'di Waákh íyeyyeedo ki 'doo'di Kiriisto irummeysan menye, a ki 'doo'di Kiriisto rummeesti.
[23] Maantaka chirri urur Kiriisto tuumman kulme, 'doo'd tuumman la afassi Rubeyti Munyee kaayyeedo, 'doo'di afassaas igaran ommos 'doo'doo Kiriisto irummeysan atin isoogele, atin i'daakka sirgo ma iyokkanaattaan a?
[24] I'daasenyi chirri atin tuumman wori Waakh kaayyeeddaane etoo Kiriisto irummeysan ommos etoo siintaas ikhabin atin isoogele, atin uskeeli us yeele a tussaane toro saggi us eti uskeel leh iyahe idowdowtaan.
[25] Wihi uuriis goyaka dagsan a lasoobahcha. Ulla 'deerka Waakh dahan a iooga, Waakh wahta wihi us yadeeh, “Saggi rumanka Waakh atin ileejiro a abde.”
[26] 'Doo'd Kiriistokaaw 'deerka mehe incheenka yeessaan? Maambaaw atin kulantaan, etoo geeyoo us Waakh idowo khaba, etoo wohoo us enenyet abcho khaba, koo laka wohoo Waakh ibabbakkaahiche khaba, koo laka afi Rubeyti Munyeenye kaayyeeda, koo laka afaase laaba, 'deerka waha tuumman saggoo icho urur Kiriisto imiigoochaan iyeela.
[27] Urur goyaka et lamma ommos et seyyah kalday on ebba koliis afi Rubeyti Munyee a kaayyeedo, etoo la afaas a laabo.
[28] Chirri etoo afa laabo ijirin, eti afa kaayyeedo urur Kiriisto goyaka a gammadicho, a isleeyyeedo toro Waakh a leeyyeedo.
[29] Et lamma ommos et seyyah Waákh a iyeyyeeddo, 'doo'di addan la wihi leessi mujjum goya a fiiricho.
[30] Chirri etoo kulam goya fiddiyo Waakh wohoo isoobabbakkaahiche la, eti oraate yeyyeedo a gammadicho.
[31] A geeddi atin tuumman ebba koliis wori Waakh kaayyeedo, 'dee 'doo'di addan tuumman wohoo abti, toro icho tuumman uur lamiigoocho.
[32] 'Doo'di Waákh íyeyyeedo rubeyohicho a jeycha.
[33] I'di tahe Waakh Waakkhi hugum 'daran menye, i'daasenyi a Waakkhi nebeyeet. Waha la a wihi ururreti 'doo'di Waakh tuumman laka'doono.
[34] Deyyeho ururre Kiriisto goyaka a gammadisso i'di tahe ma la'diicho one ma yeyyeeddo. I'di Chiirnaanneti Amurre tadeeh u, deyyeho iiche weynaan afiche kutin.
[35] Chirri icho wohoo aban 'doonaan, goobasicho ka makhaaballeticho a worsateen. I'di tahe a lakhaanyo chirri deyyeho urur Kiriisto goyaka yeyyeeddo.
[36] Yeedi Waakh atine atin kasoouummame? Ommos atin kaldaye atin sooeleele?
[37] Chirri etoo eti Waákh íyeyyeedo ommos eti siinti Rubeyti Munyee khabo iskoogyahe, saggi waha an chiiro amuri Kamur on iyahe, a kasa.
[38] I'daasenyi chi' etoo waha ikasin, Waakh laka usu ma kaso.
[39] Maantaka 'doo'd Kiriistokaaw, taba siinti wori Waakh lakaayyeedo weyti imoona. Toro la 'doo'di tuummane afassi Rubeyti Munyee kaayyeedin 'doono, atiranna.
[40] I'daasenyi walah tuumman saggi haaggan ichoow jiti mujjume on kahaaggicha.