[1] 'Doo'd Kiriistokaaw, alleya gi'de, Wori Haaggane an goorat atin icheeke, atin khaatatteene, atin mujjum katolossaan a atin kasoo'helcho.
[2] Wora Haaggan ka la chirri atin wihi an atin icheeke tuumman mujjum khucchissaan, a atin lariba. Cha'atin Wori Haaggan on menye wohoo addan rummeysatteen la, immarah on rummeysatteen gon.
[3] I'di tahe an wihi weyti khummane an 'hele iche atin isookucche. Kiriisto jeenteti uskeeleenna iyumuy saggi Chiirnaanneti Waakh liikachiiruu.
[4] Usu a lahawwaale, ibeenki seyyahnaatteet ka Waakh omoot kasookahche, saggi Chiirnaanneti Waakh liikachiiruu.
[5] Ulla Beetero isoobahe yomboka toro ergaanoti tomon ichoow lammee isoobahe.
[6] Saahka toro 'doo'di Kiriisto rummeeste kud chan 'dirihiise koloo kalday isoobahe. 'Doo'da buurtiis uliba a jira, gaasoo laka a tuume.
[7] Yomboka Yaakoobo laka isoobahe, toro ergaano tuumman laka isoobahe.
[8] 'Da'ddaboka ani isoobahe, chirri an i'doo ka eti ibeenki ikamalin desse ahe laka.
[9] Ergaano tuumman goyaka ani 'daran. Jeenteti an ururi Waakh weyti sina iomhichuu, anihi kootte ergaano liiyadeeh laka ma imalin.
[10] I'daasenyi haaggi Waakhe buure ka eti an ahe a ahe. Haaggiis la ki ilmarhaatteet mee. I'di tahe an ergaanoti addan tuumman 'dirihicheeda hol dowe. Waha la ani menye, i'daasenyi Waakh on haaggiiskaas ka hil ikahaagsate.
[11] Maantaka ani ommos ergaanoti addan eheetteey ka ba, wora Waakh on cheekna, atin la wora on rummeysatteen.
[12] Toolla wori nah atin icheekne, a ki saggi Waakh Kiriisto omoot ikasookahche miinsane, saggoh toro 'doo'd gaasoo goytiin ka Waakh 'doo'di tuume omoot ma kasookahcho iessa?
[13] Chirri Waakh 'doo'di tuume omoot ikasookahin, Waakh Kiriisto laka omoot ma kasookahin ba gon.
[14] Chirri Waakh Kiriisto omoot ikasookahin la, wori nah cheekno a ki ilmarhaatteete, kakhuufnaanki atin Kiriisto kakhuuftaan laka a ki ilmarhaatteet on gon.
[15] Waha 'dirihicho la, chirri Waakh 'doo'di tuume isookahin, nah anki Waakh ka, garti beenaate goonne. I'di tahe garti nah goonne a tan, Waakh Kiriisto omoot a kasookahche nidah. I'daasenyi chirri Waakh rumanka 'doo'di tuume isookahin, Waakh Kiriisto ma sookahin gon.
[16] A mehe chirri Waakh 'doo'di tuume omoot ka isookahin, us Kiriisto laka omoot ma kasookahin ba gon.
[17] Chirri goorat Waakh Kiriisto omoot ikasookahin la, kakhuufnaanki atin Kiriisto kakhuuftaan a ki ilmarhaatteet gone, uliba laka uskeeli atin yeessaane atin anta.
[18] 'Deerka 'doo'di Kiriisto rummeeste goorat tuume tuumman, jirtuu tuumman a baabe gon.
[19] Chirri inno jiroti harrata kalday on ka Kiriisto khajjeel kakhabno, weeli enenyet tuumman 'dirihiissa inno liisoonaha.
[20] I'daasenyi toolla wihi rummaat a mehe ya, Waakh Kiriisto omoot a kasookahche. Kiriisto a 'doloohti oraate gurnaanki buure. Gurnaanka la a 'doo'di tuume Waakh berri khuuf omoot kasookahcho.
[21] I'di tahe saggi enenyet jeenteti wihi etoo yeele ituumuu, saggaase toro jeenteti wihi etoo addan yeeluu Waakh omoot ka inno isookahcha.
[22] I'di tahe enenyet tuumman jeenteti usu ichoow Aadam ba wohoo kalday iyahiin u a tuuma. I'daasu laka, Waakh enenyet tuumman jeenteti icho ichoow Kiriisto ba wohoo kalday iyahiin u enenyet tuumman jiro a siicha.
[23] I'daasenyi Waakh ebba koliissa on sookahcha. Waakh kolooraat Kiriistohi 'doloohti gurnaanki oraatenye sookahche, maanti Kiriisto soonokhti la, Waakh 'doo'diis a sookahcha.
[24] Maanti waha kuteen 'deerka harra 'dubiche yateeh. Inkoo Kiriisto karnatohi ginnayyoot tuumman ichoow wihi anto khabo tuumman ichoow wihi miig khabo tuumman baabiiche ka, dakh tuumman dahanti Waakkhi Aabbahiise gessa.
[25] A mehe wihi Waakh gooche, a Kiriistohi karnatenye walah dakhti ichoowka Waakh chiiytiis tuumman dahantiis gesso.
[26] Chiiytanki 'da'ddaboote us baabiicho a omoot.
[27] I'di tahe “Waakh anto tuumman usu siiche.” Yeeda, “Anto tuummane,” siiche yadeeh, a 'dowe, Waakkhi anto tuumman Kiriisto siiche rubeytiis goya ma kijiro.
[28] Maanti Waakh Kiriisto antohi walah tuumman siicho, Weeli Waakh rubeytiis antohi Waakhe iliis lagessa. Waakkha la a ki Kiriisto antohi walah tuumman siiche. I'da ka Waakh walah tuumman tuume iweenyahe.
[29] Chirri Waakh 'doo'di goorat tuume omoot ikasookahin, 'doo'di iroonoti 'doo'di tuume liibaattissiyo la mehe yeela? A i'doh 'doo'da iroonoti 'doo'di tuume liikabaattissiya?
[30] Nah la, chirri Waakh 'doo'di tuume omoot ikasookahin, a i'doh toro kol tuumman omoot ikajirra?
[31] 'Doo'd Kiriistokaaw, weyti katirriinsada adeehe, an kol dakkhan omoote itoolla! Wihi an tissibo an bihin atin kagu'ddo, inno ichoow Yeesso Kiriistohi Kamureene ba a wohoo kalday.
[32] Chirri an saggi weeli enenyet on 'doo'di ilkerengeetti Efeesso ka i'di binaat u isjahne an i'daakka mehe yeela? Chirri Waakh enenyet omoot ikasookahin, a geeddi an i'di enenyet essuu, “Golossanni, farso laka danno, i'di tahe saahta a tuunna,” an adeeh on gon.
[33] Uus 'doo'di addan atin ekkeysan! Mammahta kasoo'hela, “Wahalhi suuje eti sohoti haaggan khabo a kheeroochaan.”
[34] Waha mujjum kamalda, uskeeliin la 'diicha. Weyti lakhaanyo menya maanta chirri an saggi gaasiinkoo uliba Waakh ma aban eldi?
[35] I'daasenyi etoo kolossoo mehe worsata ya, “Waakh 'doo'di tuume saggoh omoot ikasookahcha? Sarti berri icho khabaan a too mehe?”
[36] 'Dalammeey! Cha'at ilintoo il gelisse, ilintaas sammata iche koloo iumaatan ma bahto, geeyoo ma tateeh.
[37] Wihi at il gelisso, geeyi bahe weynaate menye, ilim on il gelisse, i'di maanta ilinti 'dargaayye, ommos ilinti geeyoo addan.
[38] I'daasenyi Waakh on ilim ba saggi us i'doono wohoo i'di sareete gessa. Ilime ba la sarti leemujjume on gessa.
[39] Sarti wihi jiro khabo tuumman too kalday menye a yeerar, weeli enenyet sartoo yeerenye khaba, hoolahi lararti laka sartoo yeere khabaane, chimbiro laka sartoo yeere khabaane, bahag laka sartoo yeere khaba.
[40] Wihi harra kajiro laka sar a khabaane, wihi serey kajiro laka a i'doo icho sar khabaan. I'daasenyi haaggi sarti wihi saraat ichoow haaggi sarti wihi harrata tuumman a yeyyeerar.
[41] Orrahe haaggiche a khabta, yeyyah laka haaggiis a khaba, bakkaalle laka haaggiche khabta. Bakkaalle ka laka bakkaal ba haaggiis a yeer on.
[42] Maanti Waakh 'doo'di tuume omoot kasookahcho laka a i'da on. Sarti ladibo a ti suusahto, sarti omoot lakasookahcho la, a ti jirtuu isuusahin.
[43] Sarti ladibo a ti haag laaye, sarti omoot lakasookahcho la, a ti haaggan on. Sarti ladibo a ti 'darane, sarti omoot lakasookahcho la, a ti miige.
[44] Maanti ladibo, a sarti weeli enenyet on. Maanti lasookahcho la, a sarti Rubeyti Munyee jiro siisso. Chi' sarti enenyet jirto, sarti Rubeyti Munyee jiro siisso laka a jirta gon.
[45] 'Deerka wihi chiiran, “Eti oraate Aadam layadeeh, eti noole eheet.” I'daasenyi, Aadamhi 'da'ddaboot a Rubeyti enenyet jiro siisso.
[46] Sarti Rubeyti Munyee enenyet siisso mee orey timiy. I'daasenyi sarti weeli enenyete harratane orey timiyye, ti addan sooraahte.
[47] Eti oraat harra on kayimiyye, ebeere lakasoouume. Eti lammaatteet la goobi Waakhe kayimiy.
[48] 'Doo'di harrata a i'di eti ebeeri harra lakasoouume. 'Doo'di goobi Waakh la a i'di eti goobi Waakh kayimiy.
[49] Saggi inno toolla iyookkoti eti harrata ikhabno, i'daasu laka berri iyookkoti eti goobi Waakhe bihinna.
[50] 'Doo'd Kiriistokaaw, wihi an atin icheeko kallaayo, sarti weeli enenyete jid ichoow diig khabto dakhi Waakh ma mu'dan. Ommos wihi kheerowo inti berri walah ikakheerowin ma mu'dan.
[51] Maantaka wohoo dagsane atin isoocheeka. Inno tuumman ma namuute, i'daasenyi inno tuumman a inno luurgiyicha.
[52] Waha la koloo kalday on i'di ankhad ichoow libiisihi ileet u yateehiin maanti arabi 'da'ddaboot laafuufo. I'di tahe maanti arab laafuufe, Waakh 'doo'di tuume a sookahcha, icho la toro yombuu ma yamuutiine, Waakh inno tuumman la a inno urgiyicha.
[53] A mehe sarteenta tamuute suusahto ichehi luurgiyicho, ti iumaatane isuusahin lakayeelo la'doona.
[54] Maanti wihi yamuute suusaho luurgiyiche wihi iumaatane isuusahin lakayeele, 'deerka ayta Chiirnaanneti Waakh goya kijirto a labuuhicha, “Omoot a lakhorkhiche toro weyti lasooriche.”
[55] “Omootoow soorinti at enenyet soorisso meete? Omootoow miigtaahti orran at enenyet kabolkhisso meete?”
[56] Omoote uskeele miigti iche enenyet kabolkhisso ka'hessa. Uskeel la amurreti Muusa chiire iche miig ka'hela.
[57] I'daasenyi Waakh kala'd ilaabno. Us wihi Yeesso Kiriistohi Kamureene yeele ka, miigti inno uskeel ichoow omoot kasoorinno a inno siicha.
[58] Maantaka 'doo'd Kiriistoki an weyti 'doono, mujjum tolossada, uus wohoo rucchul laka atin sesseehin. Kol dakkhan hili Kamur tuum haaggicha. I'di tahe saggi atin igarattaan u, hili atin Kamur ihaaggissaan ki ilmarhaatteet mee.