[1] An a atin kanaha, wihi jiro a mehe ya, etoo goytiin ka soho'ddarriti suujenye kaassohta leessa. Soho'ddarritaas la a ti 'doo'di Waakh igaran laka koloo iyeelin. Etoo laammo ooyohiissa inokhte.
[2] Atin la nane a eylajjaan! Atin kootte incheenka a ooytaane 'dee eti waha yeelo goytiin ka rihtaan.
[3] Chirri an atin ileejirin laka, rubey ka a atin leejira. Ani la eta saggi us uskeel iyeele a gooche i'doo an atin leejiruu.
[4] Maanti atin anto Kamureenki Yeessee ka kulantaane anna rubey ka atin leejiro, miig Kamureenki Yeessee la atin leejirto,
[5] eta suuje dahanti Seytaan gessa. I'da ka etaas wihi uuriis goya kijiro uskeel imoono a labaabiicha, rubeytiis la maanti Yeessohi Kamure soonokhti a lariba.
[6] Atin a eylajjaane, wahaas la ma haaggan. Saggi chirri makaate lahaaggicho booddati makaate fuurisso too rucchul liikakhayo 'dee makaate tuumman weyti ifuurto weyti garattaan. I'daasu la etoo uskeel khabo, rabitohi enenyet tuumman a suujaacha.
[7] Taba saggi booddati makaate fuurisso liibahchuu, atin laka uskeel tuum goytiin kabahcha, 'dee 'doo'di husub ateeha. Atin rumanka a i'di makaateti booddataas fuurisso ikhabin. I'di tahe Kiriistohi heleenkeenki Baasakkee a lasoorriyooche.
[8] Maantaka chirri inno Daawta Baasakka gello, uus innohi uskeel ichoow suujoon khabno gelin gi'de. I'daakka inno a i'di makaateti boodda fuurisse nateeh. Taba gi'de 'doo'd Kiriisto rumanka ateeha, toro la 'doo'di yeedi rummaat on cheeko ateeha. I'daakka atin a i'di makaateti ifuurin.
[9] Khadaabeeyki oraate an atin isoochiire ka, 'doo'di soho'ddarri kaassohti kaseeha atin iidah.
[10] I'daasenyi an wori 'doo'di harratane soho'ddarri kaassohti ommos 'doo'di 'damaame ommos ki enenyet kakharaawo ommos ki iyookkoyyohi waakkhakh lakayeessi wahti mee woriis kaayyeedo. I'daas ka harrata dakkhane katabtaan.
[11] I'daasenyi khadaabi an soochiire ka, 'doo'di an soomiinsade a ki, Kiriisto rummeesde isyadeehe, i'daasenyi soho'ddarri kaassohti, 'damaamenye ommos iyookkoyyohi waakkhakh lakayeessi wahti ommos 'doo'di addan hanti ommos meleefeenye, ommos enenyet kakharaawo. 'Doo'di i'dee aleegolossanna laka.
[12] Rumanka, hili 'doo'di urur Kiriisto ieheynan lahukkumo keey mee. I'daasenyi hili 'doo'di urur Kiriisteenye uskeeli i'dee kijiro lahukkumo atine atin fuula.
[13] Waakh rubeytiissa 'doo'di urur Kiriisto ieheynan hukkuma. I'daasenyi i'di Chiirnaanneti Waakh kachiiran u, “Eti uskeel kijiro, goytiin kabahcha.”