[1] Khadaaba 'doo'di atin isoochiiro a ani, Baawulohi jeenteti Waakh isoobahsatuu ergaano Yeesso Kiriistee ichoow eteenki ullaka koo Kiriisteenye Timooti layadeeh. 'Doo'di nah khadaaba ichiirro la, a ururi Waakhe ilkerengeetti weene Koriinto kijiro, ichoow 'doo'di Waakhe boroofenhi Akhaaya kajiro tuumman.
[2] Waakkhi Aabbaheene ichoow Yeesso Kiriistohi Kamure ba atin imaalaane nebey atin kakaalaan.
[3] Waakh koolinno gi'de. Us a Waakh ichoow Aabba Yeesso Kiriistohi Kamureene. Us a Aabbaheenki uur nugule toro la a Waakkhi kol dakkhan uur inno khoboocho.
[4] Us sinayyo tuumman ka uur a nah khoboocha, 'dee nah laka 'doo'di addan sinabaaw icho khabaan ka uur miigoonna. Khoboonnaanki Waakh uur nah khoboocho ka, nah laka 'doo'd uur khoboon a nabuu'd.
[5] A mehe geeddi sina Kiriisto jiroteenyo ka weyti buuraatti, geeddaase Kiriisto ka laka khoboonnaanki uureenyo lakhoboocho weyti buuraata.
[6] Chirri sina nah taham, a saggoo 'dee uur atin liikhoboocho toro la atin liiribo. Chi' uur nah lakhooboche, a saggoo atin laka uur atin liikhoboocho. I'da ka, chi' sinayyohi i'di weheenyee atin kawaaraan, a garrahsattaan.
[7] Khajjeeli nah atin kakhabno la ma sesseeho. A mehe wihi nah tissibno saggaas atin sinayyo nah ileegisantaan u, khoboonnaanki Waakh uur nah khoboocho a nah leegisantaan.
[8] 'Doo'd Kiriistokaaw, sinati buurenye nah boroofenhi Aassiya ka 'helle, iche atinhi wihiche abattaan 'doonna. Huleesi nah khabne weyti nah kabuurneete miigteenyo kute, ichoowka kol us nah khaato koognahe.
[9] Rumanka uureenyo goyaka a i'doo omoot nah liigooche, 'dee awteenyo menye Waakkhi 'doo'di tuume omoot kasookahcho on kakhuufna.
[10] Waakh wahanyeyyohi uskule omoot keeno a nah karibe, toro la a nah riba. Nah usu gon khajjeella, 'dee ulla orey isohta nah riba,
[11] geeddi atin laka weysi ka nah soogargaartaan. I'da ka, 'doo'di buure maanti Waakh weysihaas daage buuhi us i'daanu inno siicho ka meesseenyo ka Waakh kala'd a ilaaba.
[12] Maantaka wihi nah keeylajno a waha, wihi rubeyoheenyoki haag ichoow suujoon seley saaho rumanka cheekaan, a saggi nah munyati Waakh ka jiroti fissan harrata ka ijirre, kach ka la a saggi nah ortiin ka ijirre. Waha la kharati weeli enenyete harrata ka menye, haaggi Waakhe buure on kayeelle.
[13] A mehe wihi nah atin isoochiirro, mali dagsan ma kijiro, a wihi atin soomin ichoow aban tabuu'diin on. Wihi an khajjeelo la a mehe ya,
[14] saggi atin geeddoo nah iabatteen u, tuume nah abattaane 'dee maanti Kamureenki Yeessee soonokhti ka nah keeylajjaan saggi nah laka atin ikeeylajnuu.
[15] Jeenteti an saggi atin ikakhuuftaan itissibuu la, mehe kamalde ya, koloo a atin soo'daara 'dee kol lamma atin liimaala.
[16] I'di tahe anihi maanti an Boroofenhi Makedooniya isohdi atin leeamiite toro la maanti an Makedooniya kasoonokhdi laka atin leeamiit iche 'doone. Atin la 'dee sohoteeyki an ili Ya'huudiya isohdi ka luhlo iyeessaan.
[17] Maanti an wahaas kamalde, jitoo 'dabakhenye kayeele? Ommos cha'an walah kamaldi, an saggi 'doo'di harratane ikamalda, 'dee, “Aa, aa,” ichoow, “Mele, mele,” isleeadeeh?
[18] I'daasenyi saggi Waakh liikakhuufuu, woreenyoki nah atin ikeenne laka koloo kalday, “Aa,” ichoow, “Mele,” ma isleeyadeeh.
[19] A mehe Yeesso Kiriistohi Weeli Waakhenye ani ichoow Silfaano ichoow Timooti woriis atin icheekne, koloo kalday laka, “Aa,” ichoow, “Mele,” ma isleeyadeeh. I'daasenyi usu ka a, “Aa,” kalday on.
[20] A mehe Waakh ayyinti tuummane us ayyiche, Kiriisto ka a buuhiche. Maantaka kol dakkhan chi'inno Waakh koolinno Yeesso Kiriisto ka, “Aamiin,” iche nadeeh.
[21] Waakh rubeytiissa nah ichoow atin ba Kiriisto ka wohoo kalday inno kayeela, mujjum inno toollicha. Toro la hiliis a inno isubhe,
[22] sumattiis inno gesse toro la Rubeyti Munyee rubeyoheen goya gesse. Toolla Rubeyti Munyeenye inno siicha 'dee wihi us inno iayyicho us berri inno siicho rummaacha.
[23] Waakh a idaagaa, us garteey a laaba, anihi bolokh atin ikeeno an i'doonine, jeentetaase ilkerengeetti Koriinto toro ikasoonokhawwaaye.
[24] Anki wihi atin kakhuuftaan ka ma atin dakhanni. I'daasenyi nah hile atin leehaagginna, 'dee atin laka hamaaddaan. A mehe kakhuufnaanki atin Waakh kakhuuftaan ka a chuukhantahiin.