[1] 'Doo'd Kiriistokaaw toolla toro wori siimohi Rubeyti Munyee kayamiit miinsane atin isoocheeka, 'dee wihiche tuumman garattaan.
[2] Geeddi atin Waakh igaran, saggi ambaaw atin liiwoye ka atin liibaabiiche, atin iyookkoyyohi af laa iwahatteen, a garattaan.
[3] Maantaka wihi an atin isoocheeko, eti Rubeyti Waakh woyto, koloo kalday laka, “Yeesso a falayyahe,” ma yadeeh. Eti Rubeyti Munyee woyto on menye koo addane, “Yeesso a Kamur,” yadeeh mele.
[4] Siimohi yeerarenye jira, i'daasenyi Rubeyta Munyee kalday on siimohaas enenyet siissa.
[5] Hilassi yeerarenye ba'h liihilo a jiraane, i'daasenyi Kamura kaldach on liihila.
[6] Jitassi hili Waakh lakahaaggicho a yeyyeerare, i'daasenyi Waakh kalday on miigti hil ba lakahaaggicho enenyet siicha.
[7] I'daasenyi Waakh ebba jitoo yeerenye Rubeyti Munyee goyteen kafiddiito lakaargo a siiche, waha la a indigirti 'doo'd Kiriisto tuumman on.
[8] Rubeyti Waakh on ka etoo wori khara lasiicha, Rubeyta Waakh on ka etoo addan wori walah lakagarti lasiicha.
[9] Toro Rubeyta Waakh on ka etoo addan kakhuufnaanki Waakh weyti lakakhuufo lasiicha, Rubeytaas on ka etoo addan siinti enenyet lakasamaacho lasiicha.
[10] Toro Rubeyta Waakhe etoo addan miigti wihi weeli enenyet iubaa'dan lakayeelo siissa, etoo addan la siinti Waakh liiyeyyeedo siissa, etoo addan laka siinti Rubeyti Waakh ichoow rubeyohoo addan seley lakaabti siissa. Etoo addan la siinti us afassi Rubeyti Munyee kayamiit kaayyeedo siissa, etoo addan la siinti us wihi afassaas ka leessi kalaabo siissa.
[11] Waha tuumman la a hili Rubeytoo one, a Rubeyti Waakh. Iche la saggi iche i'doonto u, ebba siintoo siissa.
[12] Sarti enenyet a too kaldach on, chirri iche miilassi ittaawe khabto laka. Toro la chirri miilal ittaaw yahiin laka, sartoo kaldache yeelaan. Sar Kiriisto laka a i'daas on.
[13] I'di tahe Rubeyta kaldaye Waakh on inno tuumman sartoo kalday goya inno kabaattissite, yaafohi Ya'huud ommos yaafohi Ya'huud ieheynan eheetteey ka ba, bow'da ommos 'doo'di lafure eheetteey ka ba. Inno tuumman la Rubeyta kalday on inno lasiiche, inno lakasookhube.
[14] I'di tahe sar tuumman miiloo kalday on menye, a miilassi ittaawe.
[15] Eemba luhe, “An dahan mee gone, an miili sartaas mee,” tidah? Jeentetaas u miili sartaas ma kabahto.
[16] Ommos eemba nabahtoo, “An il mee gone, an miili sartaas mee,” tidah? Jeentetaas u nabahtaas miili sartaas ma kabahto.
[17] Chirri kootte sarteen tuumman il kalday on tahe, sag inno walah idaagno mele gon. Chirri kootte sarteen tuumman nabah kalday on tahe la, sag inno walah iurinno mele gon.
[18] I'daasenyi Waakh saggi us i'doono, iche miil ba sarteen igesse.
[19] Sare chi'iche miiloo kalday on tahe, sar mee gon.
[20] Miilal a ittaawe, i'daasenyi a sartoo kaldach.
[21] Ile koloo kalday laka dahan, “An ma ki'doonno,” iidaahan ma tabuu'd. Toro la matah, koloo kalday laka luhlo, “An ma ki'doono,” iidaahan ma yabuu'd.
[22] Ugoka miilassi sareete inno wohoo 'da'ddaran koognahe, iche weyti fiddi laan inno iubaa'dan.
[23] Miilassi sareete inno iinkaanyitin, iche mujjum ogoogna. Miilassi sareete enenyet liitusin iche mujjum ogoogna.
[24] Miilassi sareete enenyet latuso la mujjum ma ogoogno. I'daasenyi Waakh miilassa sarteen tuumman a isgesse, jitoo miilassi inno iinkaanyitin weyti lakiinkaanyito yeele.
[25] Sare 'deerka ma isassaahto, i'daasenyi miil ba miili addan ekka aw ikhaba.
[26] Sar goyaka, chirri miiloo bolkho, miilassi addan tuumman a leebolkhaan. Chirri miiloo liinkaanyito, icho tuumman a isleehamaadaan.
[27] Atin tuumman a sar Kiriisto, etiin ba la sarta ka a miiloo.
[28] Urur Kiriisto goyaka Waakh 'doo'doo hilassane korche. Kolooraat ergaano, ki lammaatteet 'doo'di Waákh íyeyyeedo, ki seyyahnaatteet 'doo'di enenyet ayti Waakh abcho, ki kasookhuccho la a 'doo'di wihi weeli enenyet yeelin iubaa'dan yeelo, ommos ki siimohi 'doo'di khakkhannan lakasamaacho khabo, ommos ki 'doo'di addan gargaaro ommos siimohi urur Kiriisto ladakhti ommos ki afi us idaagin kaayyeedo.
[29] Enenyet tuummane ergaanee? Enenyet tuummane 'doo'di Waákh íyeyyeedee? Enenyet tuummane 'doo'di enenyet jiti Waakh abchee? Enenyet tuummane wihi weeli enenyet yeelin iubaa'dan yeela?
[30] Enenyet tuummane siimohi 'doo'di khakkhannan lasamaacho khaba? Enenyet tuummane afassi Rubeyti Munyee kaayyeeda? Enenyet tuummane wihi afassa ka leessi cheeka?
[31] I'daasenyi taba siimohi weyti khumman imoona. Toolla la wohoo wahaas tuumman kussane atin tusa.