[1] An ergaano menya? An wihi an 'doono 'doo'd Kiriisto yeelo ma yeelo? An Yeessohi Kamureene ma argin a? Jeenteti holi an dowe menya atin ichoow Kamur koo kalday ititaaheen?
[2] Chirri 'doo'di addan ka an ergaano Kiriisto ieheynan laka, wihi massan atin ka an a ergaano! I'di tahe atin i'doo ka a sumatti saggi an rumanka ergaanoti Kamur iahe tusso.
[3] 'Doo'di ihukkumo wihi an ilaabo kallaayo.
[4] Hili nah kijirro ka, nah golol ma mu'dan a?
[5] Nah i'di ergaanoti addan u ichoow i'di walaalinye Kamureen ichoow Keefas illeh u, deyyehoteenyoti too Kiriisteenye nah walhisso ma mu'dan a?
[6] Ommos ani ichoow Barnaba kalday on hil haagginna 'dee golol ka'hella?
[7] Iskartoh maanta hili iche haaggisso ka toro chilimme gutta? Etoh gos khaba toro gurnaanki us gosiis kasoobahche iumhan? Ersinkoh adihiis yaakhicha toro la haanu ikadamin?
[8] An waha mali weeli enenyet kalday on keelda? Chiirnaanneti amurre Muusa laka i'daas on kachiiran menya?
[9] A mehe Amurre Muusa wihi kachiiran, “Heer chirri us 'dargaayye yabti af ahidin.” Waakh chu'us i'da yidah ati ka heer kaldaye aw ikhaba?
[10] Waakh maanti us i'da yidah, yeeda eti us tuum miinsanyahe a nah menya? Aa! Waha jeenteteenna liichiire. Eti gos khuto ichoow ki 'dargaayye urfo kabahcho, icho tuumman khajjeeli icho gurnaan isleegismaane khabaan.
[11] Nah a i'di eti ilmohi Rubeyti Munyee kayamiit uurassiin kachibe gone, gurnaanki harratane nah atin kasugno a wihi weyti buurenya?
[12] Chirri 'doo'di addan gargaari us atin ka'helo mu'danyahe, nah kootte incheenka 'dirihicho ma mu'dan a? I'daasenyi nah wahaas nah mu'dan ma khaatin. Nah sina tuummane igarrahsanne, 'dee wohoo rucchule Wora Haaggane Kiriisto miinsan jeycho ma jiraan.
[13] Saggi eti minki Waakhe buure hil kahaaggicho gololiis minkaas ika'helo ma garattaan a? Toro la eti chalag hil kahaaggicho wihi chalagtaas lakasoorriyoocho miil kakhaba.
[14] I'daasu laka Kamur amuri us bahche a kan, eti tuummane Wori Haaggan cheeko laka, gololiis woraas us cheeko on ka'hela.
[15] I'daasenyi an injire waha imu'dan golol ma kayowan. Toolla la khadaaba mee soochiiro 'dee golol isiissaan. Anihi Wori Haaggane an i'daanu cheeko an keeylajo liikakhaato ka, anihi amuute deefta!
[16] A mehe Wori Haaggane an cheeko ka walah an keeylajo mele. I'di tahe wora an cheeko Waakhe ihossa. Chirri an Wori Haaggan icheekin la, sinati isugto eenna a buure!
[17] Chirri ani jeenteti an i'doono on u an Wora Haaggan icheeko, 'deerka kala'd a suga gon. I'daasenyi, Waakh a isoobahsate hila ikorche sag an ikabahsadi la mele.
[18] 'Deerka kala'ddeey a mehe? Kala'ddeey talla, Wora Haaggane an cheeko et iguto mele, toro la wihi imu'dan ka, an wohoo rucchul laka ma khaato.
[19] Et ianti mele. I'daasenyi an bow'dati enenyet tuummane iskayeela, 'dee geeddi an abuu'd 'doo'di buure Kiriisto ikeena.
[20] 'Doo'di Ya'huud ka i'di Ya'huude iskayeele 'dee 'doo'di Ya'huud Kiriisto ikeena. 'Doo'di amurre Muusa anatti ka la, an i'di eti amurre Muusa anatti iskayeele, 'dee 'doo'di amurre Muusa anatti laka Kiriisto ikeena. I'daasenyi amurre Muusa ma ianatti.
[21] 'Doo'di amurre Muusa ikhabin ka la, an i'di eti amurre Muusa ikhabine iskayeele, 'dee i'da ka 'doo'di amurreta ikhabin Kiriisto ikeena. I'daasenyi an amurreti Waakh ma 'dii'do, toro la amurre Kiriisto ianatta.
[22] 'Doo'di 'dabakhe ka la, an a is'dabakhnoocha, 'dee icho Kiriisto ikeena. An 'doo'da tuumman i'dichooda iskayeele, 'dee sagag tuumman ka 'doo'd gaasoo Kiriisto ikeena.
[23] Waha tuumman a iroonoti Wori Haaggane lataa'hicho, 'dee buuhi Wori Haaggan atin leegisma.
[24] Saggi atin igarattaan u 'doo'di iskabahsati icho tuummane orya, i'daasenyi etoo kalday on 'doo'd sooricha 'dee wihi la'helo 'hela menya? Atin laka saggaas iorya 'dee wihi 'doo'd lasiicho 'hela.
[25] Eti oriisi kijiro tuumman weyti sartiis oriisi itannabicha. I'dane yeela 'dee 'duubi massati 'hela. I'daasenyi inno 'duubi jirtuu tuumman imassanne yowanna.
[26] Maantaka an cha'an nyaamo baabul on ma ari'd, i'di eti etoo addan jaho u, hafar on ma jaho.
[27] I'daasenyi an sarteey a jaha, toro la tuum jeycha uus 'dee inkoo an 'doo'di ittaawe Wori Haaggan icheeke, ani rubeyteey oriisi goyaka liibihinne.