[1] Chirri an afassi weeli enenyet ommos afassi herti Waakh kaayyeedo, i'daasenyi an enenyet i'doonin, an a i'di ga'daari ballaaddane hafane weyti riiro, 'dollo lajaho on. Ommos an a i'di 'daanki buurenye immarah yeedo on.
[2] Chirri an siinti Waakh liiyeyyeedo khabo, chirri an wihi dagsan tuumman gardi, chirri an walah tuumman gardi, chirri an kakhuufnaanki Waakh weyti lakakhuufo khabo an halal laka guuricho, i'daasenyi an enenyet i'doonin, walah an ahe mele.
[3] Toro la chirri an wihi an khabo tuumman miskiino siicho, an sarteey laka an bahcho lagubo, i'daasenyi an enenyet i'doonin, waha haag icho ibahaan mele.
[4] Eti enenyet 'doono, a eti garrahsi lehe, uure nugulyahe, inaaf ma khabo, ma isatahnoocho, ma eylajo.
[5] Fiddihi lakhaanyo keeno ma fiddiyo, awtiis kalday ma yeyo, dowwa ma hollowo, suujoonki liiyeele ma ekkaacho.
[6] Uskeel ma kahamaado, i'daasenyi wihi rummaat on kahamaada.
[7] Us walah tuumman a si'da, walah tuumman kakhuufa, walah tuumman ka khajjeel a khaba, kol dakkhan la a garrahsata.
[8] 'Doonine koloo kalday laka ma massatti. I'daasenyi farniinki 'doo'di Waákh íyeyyeedo a massata, afassi Rubeyti Munyee kayamiit a gammadichaane, wihi lagarti tuumman la a kutaan.
[9] I'di tahe wihi inno garanni geeddoo on garanna, wori Waakhe inno kaayyeeno la geeddoo on kaayyeena.
[10] I'daasenyi chirri wihi buuho yimaateen, wihi ibuuhin tuumman a baabaan.
[11] Maanti an weel eheet, yeedi an kaayyeedo a yeedi nyaakhute, saggi an walah iabde la a saggi nyaakhute, maleey tuumman, a ki weeli rucchul on gon. Inkoo an weynaade la, wihi nyaakhunnoon tuumman a 'diiche.
[12] Wihi toolla inno agarro tuumman, a i'di oosinti mujjum liiargine, kitaab goya kajirto on. Berri la waha rumanka mujjum a agarra. Toolla walah tuumman geeddoo on garda, berri la Waakh saggi us tuum ani igartuu an laka usu tuume abda.
[13] Maantaka, waha seyyahcho a soo'hadaan, kakhuufnaanki inno Waakh kakhuufno ichoow khajjeeli inno Kiriisto khajjeello ichoow 'dooninti inno enenyet 'doonno, i'daasenyi ti weyti kutto, a 'doonin.