[1] 'Doo'd Kiriistokaaw, wihi aacchinyetiinti Muusa woye kayitahye atin kasoo'helin 'doona. Icho tuumman mirisi Waakh sooerge woye toro la icho tuumman nebey beyti buure maaheen.
[2] Icho tuumman mirisa ka ichoow beyta buure ka a i'doo labaattissiye 'doo'di Muusa raaho lakayeele.
[3] Icho tuumman gololaas Waakh girmo ka siiche isleeyumheene,
[4] toro la bicchehaas Waakh girmo ka siiche isleeyubhaabeen. I'di tahe daddaabti buurenye girmeenye icho raahte bicche kayubhaabeen. Daddaabtaas la a Kiriisto rubeytiissa.
[5] Chi'iche i'daas tahe laka, Waakh aacchinyeteen buurche a kahollowe tuunte, sarticho hidaad tuumman kataa'hte.
[6] Wahaas tuumman la a iyookkoyyohi inno waanicho, uus 'dee inno laka i'dichuu wahanyeyyohi sussuuje maanjeeranne.
[7] 'Doo'daas gaasoo iyookkoyyohi waakkhakh lakayeessi wahte. I'dicho iitaahana. I'di liichiiruu, “'Doo'da a orronte sukuuku gele yomboka gir'daanki bi'dire ikahe.”
[8] 'Doo'daas gaasoo soho'ddarri kaassohte. Ibeenkoo kalday goyaka 'doo'di elif tomon lamma ichoow elif seyyahe 'debbeeste. Uus inno laka i'dichuu soho'ddarri kaassohan.
[9] 'Doo'daas gaasoo Kamur a kaje toofaf icho bakkicheen. Uus inno i'dichuu Kiriisto kajin.
[10] 'Doo'daas gaasoo a nyunnyuwe, herti Waakhe walah uskulaasso icho bakkisse. Uus inno i'dichuu nyunnyuwin gi'de.
[11] Waha tuumman yaafohi Issiraayel a kayitaaheene, 'dee iyookko inno iyateehiin. A lachiire 'dee innohi ibeenki harra 'dubiche soodowwaate jirro inno tootoochaan.
[12] Maantaka eti tuummane kol us mujjum toollo iskoog, a isyuubsati gi'de uus kufinee.
[13] Kajmeti uskeel atin kalugu'ddo a ti weeli enenyet tuumman lakakajo on. Waakh la a lakakhuufa gone, us kajmeti atin lakajo geeddi atin ituddubin 'dirihiche a atin kajeycha. I'daasenyi chirra atin lakajo, us toro jiti atin kajmetaas kabahsattaan a atin iyeela, 'dee kajmetaas ka garrahsan tuddubtaan.
[14] Maantaka aalasseeyki an weyti 'doono, iyookkoyyohi waakkhakh lakayeessi kafirda.
[15] Atin a 'doo'di ii'dowe. Wihi an kaayyeedo isigoocha.
[16] Chirri inno gololi Kamur ka Waakh koob ka kala'd ilaabno toro danno, inno tuumman gargaari diig Kiriisto isleegisanna menya? Makaateti lajebcho islaleeyaham ka la, gargaari sar Kiriisto isleegisanna menya?
[17] Jeenteti makaate too kalday itahe, innohi ittaawe laka a sartoo kalday. I'di tahe inno tuumman makaatetoo kaldaye isleegisanna.
[18] Bal 'doo'di Issiraayel yeya. Soorriyoyyohi Waakh chalag ka liibahche icho isleeyamhiin ka, wahnaanki Waakh chalag ka lawahti a isleegismaan.
[19] I'da ka mehe elda ya, soorriyoti iyookkoyyohi waakkhakh lakayeessi liibahche ommos iyookkoyyoha waakkhakh lakayeessi walah icho yahiin mele.
[20] Wihi an eldi a mehe ya, wihi 'doo'di Waakh igaran soorriyoocho, icho ginnayyo isoorriyoochaan menye, Waakh mee isoorriyoochaan. Ani la atinhi atin ichoow ginnayyo ba wohoo kalday tateehiin ma 'doono.
[21] Koobi Kamur ichoow koobi ginnayyoot ma isleedantaan. Ommos gololi komborti Kamur ichoow gololi komborti ginnayyoot ma isleetamhiin.
[22] Kamure inaaf gelin 'doonna? Kol inno Kamur kamiignahe koogtahiin?
[23] Mehe leessa ya, “Wihi an yeelin 'doono walah ikajeycho mele.” I'daasenyi walah tuumman mee atin iroon. Toro la “Wihi an yeelin 'doono walah ikajeycho mele,” iche leessa. I'daasenyi walah tuumman mee gargaar khabo.
[24] Awtiinna on ayowanna, i'daasenyi 'doo'di addan aw ikhaba.
[25] Chirri at jidi bicchir ka loororicho taham, jeenteti rubeytaahti haag ichoow suujoon seley saahtuu, walah awowworsan.
[26] I'di tahe, “Harra a ti Kamure, toro la wihi kajiro tuumman a wihiissa.”
[27] Chirri etoo Kiriisto irummeysan minkiis ka golol kiwahe at la iran 'doonto, iro on. Walahbaaw lakisiicho ka aham. Jeenteti rubeytaahti haag ichoow suujoon seley saahtuu, walah awowworsan.
[28] I'daasenyi chirri, “Golola a ki naffi iyookkoyyohi waakkhakh lakayeessi liisoorriyooche,” lakiidah, jeenteti eti i'daas kiidah ichoow iroonoti rubeyti haag ichoow suujoon seley saahtuu, gololaas uumhan.
[29] Waha la jeenteti rubeytaahti haag ichoow suujoon seley saahto menye, a jeenteti rubeyti etaas. A mehe a i'doh furnaanki an furanahe ka wihi an yeelin 'doono rubeyti etoo addane waha a suuj ielatti u ijeycha?
[30] Chirri an golossadi an Waakh kala'd ilaabo, a i'doh etoo addan toro golola an Waakh kala'd ilaabo ka iabaara?
[31] 'Deerka golossatteey ommos wohoo danteey ka ba, ommos walahbaaw at yeesso ka, waha tuumman saggoo Waakh liikoolicho iyeel.
[32] Fiddihi atin fiddiitaan uus etoo kalday laka tarraantarrin, 'doo'di Ya'huud ommos ki Ya'huud ieheynan ommos ururi Waakh eheetteey ka ba.
[33] Saggaasu la, ani walahbaaw an yeelo ka, wihi an yowdi iroonoteey menye, 'doo'di addane kahamaadicha, 'dee ribnaan 'helaan.