[1] Toolla wihi goorat atin khadaabi atin isoochiirteen ka iworsatteene atin isoolaaba. Aa! A haaggantahe chi' mejel min idisan.
[2] I'daasenyi 'doo'di isidisanne isleeur'do a buur gone, a deefta chirri aram ba arantiissa on khabo ommos arame ba arankicheeda on khabto.
[3] Makhaábal a hiliissa chu'us makhaabassiis leeur'do, arame laka a hilicheeda chi'iche arankiche leeu'durto.
[4] Makhaabale sartiche ma anatti i'daasenyi arankicheeda anta, makhaabal laka sartiis ma anti i'daasenyi makhaabassiissa anatta.
[5] Maantaka sammata atin koloo isikadaagin on menye, lammatiin isleeur'din iistiranna. Cha'atin istirattaan la, geeddoo on istirda 'dee weysi kalday gela. Yomboka 'deerka isisoonokhda, uus Seytaan jeenteti atin isjeyin iubaa'dan u kajmeti uskeel atin kalugu'ddo atin ikeenine.
[6] I'daasenyi waha amuri an atin siicho menye, a atin lee'diicha on.
[7] Incheenka atin tuumman i'daaya tateehiine mindischo laan fiddiitaan. I'daasenyi ebba siintiissa Waakh ka'hele. Koo siintane khaba koo la siintoo addane khaba.
[8] Maantaka 'doo'di minan idisan ichoow ki liidisin ichoow muunkhoyyo ba wihi icho ideefo, a ichohi i'deey ifiddiyaan.
[9] I'daasenyi chirri icho isjeyin iubaa'dan, min a disteene ommos a ladiso. I'di tahe ichohi makhaabassi ommos makhaabali icho weyti leeur'daan iildeerroti ka, ichohi minan disti ommos ladiso deefta.
[10] Toolla 'doo'di isdiste amura an siicho keey menye, a ki Kamur kayimiyye, makhaabál iiche makhaabaliche katabin.
[11] I'daasenyi chi'iche makhaabaliche katabte, mindischo laan a fiddiito, ommos makhaabaliche a isineybeen. Makhaábal la uus makhaabassiis rihin.
[12] Atinhi addan la wihi an atin iadeeh, chi' etoo koo Kiriistee makhaabassi Kiriisto irummeysan khabo iche la leefiddiyin 'doonto, makhaabala uus makhaabassa rihin. Waha wihi Kamur essi menye a malaaya on.
[13] Toro la chirri makhaabassoo too Kiriistee makhaabaloo Kiriisto irummeysan khabto, ulla usuhi leefiddiyo 'doono, makhaabassa iiche makhaabala katabin.
[14] I'di tahe makhaabalicheki Kiriisto irummeysan jeentetichuu Waakh a munyaache. Makhaabassi Kiriisto irummeysan, jeenteti makhaabali Kiriisto rummeestuu Waakh iche a munyaache. Chirri iche i'daas ieheynan la, nyaakhutiin ki 'doo'd Kiriisto mee. I'daasenyi saggi iche ijirtuu, nyaakhutiin Waakh a munyaache.
[15] I'daasenyi chirri makhaabali Kiriisto irummeysan makhaabassiis rihe, ommos makhaabassi Kiriisto rummeysatte makhaabaliche katabte, seley a baheen on. Eti koo Kiriistee chirraas mindischo ka a lafure. A mehe Waakh a inno wahe 'dee nebey kafiddiina.
[16] Atihi makhaabassoowe, atihi makhaabalaah Kiriisto ikeento 'dee Kiriisto rummeesti ma garatti. Ommos atihi makhaabaloowe atihi makhaabassaah Kiriisto ikeento 'dee Kiriisto rummeysatti ma garatti.
[17] Etiimba i'di goorat Kamur igooche toro la Waakh iwahe, i'daas on a eheetti. Amura a ki an ururre Kiriisto tuumman ka 'doo'd icheeko.
[18] Maanti Waakh atin wahe etoo a khandiineet? Etaas uus sumatti khandi bihin. Etoo maanti Waakh wahe ma khandiineynan a? Etaas uus lakikhandiyin laka.
[19] Anki Waakh ka, khandi ommos khandiwaayyo a walahba. Wihi khumman a atihi amurreti Waakh raahto.
[20] Ebba wihi maanti Waakh wahe us eheneet on a kafiddiyo.
[21] Maanti Waakh atin wahe gaasiinkoo bow'da eheet? Awa'dwaa'dina, i'daasenyi chirri saggoo atin bow'da ikabahtaan jirto bow'da kabaha on.
[22] I'di tahe eti maanti Kamur wahe bow'da eheet, Kamur ka a eti furan. I'daasu la, eti maanti Kamur wahe furneet, a bow'da Kiriisto.
[23] Waakh wihi buurenye gute atin gatte. Maantaka bow'dati wahanyeyyohi enenyet 'doono iitaahana gi'de.
[24] Maantaka 'doo'd Kiriistokaaw ebba i'di maanti Waakh wahe us eheet on a ifiddiyo.
[25] Toolla amur Kamur isiiche galtaam miinsan mele. I'daasenyi jeenteti uurnugleeli Kamure an eti lakakhuufo iahuu, maleey a atin siicha.
[26] Ani ka, jeenteti sinati buurenye inno kajirruu, a deefta chirri mejel ebba saggi us ijiro on ijiro.
[27] Min a disatte? 'Deerka seley bahnaan ayowan. Min ma disan a? 'Deerka makhaabál ayowan.
[28] I'daasenyi chirri at min disatte laka uskeel ma yeelin. Galtaanti ladise laka uskeel iche yeesse mele. I'daasenyi 'doo'di isdiste jiroti harrata ka sinati buurenye khaba, anna sinayyohane atin kaholin 'doona.
[29] 'Doo'd Kiriistokaaw wihi an atin icheeko kallaayo, ibeenneti ankhan a gaabantahe. Uus toolla kakhabatti eti makhaabál khabo, i'di eti makhaabál ikhabin a ijiro.
[30] 'Doo'di ooyo la, i'di 'doo'di iooyin a ijiro. 'Doo'di hamaado la i'di 'doo'di ihamaadin a ijiro. Ki walah gatti la i'di ki meehaas kiis ieheynan a isiekkaacho.
[31] 'Doo'di wahanyeyyohi harrata on kaassohti la, i'di 'doo'di ikaassohan a ijiro. I'di tahe harrata saggi iche toolla ijirto ka, dowwanoha a kutta.
[32] Atinhi wa'dwaa'd ikhabine 'doona. Eti min idisan wihi us kamassi tuumman a wihi Kamur miinsane, 'dee saggi us Kamur ikahamaadicho iyowti.
[33] I'daasenyi eti min diste wihi us aw ikhabo a fiddihi goobiissa harrata ichoow makhaabassiisti us kahamaadicho on.
[34] Us sag lamma liijiita. Makhaabassi makhaabal ikhabin ommos inanti galtaame wahanyeyyohi Kamur on aw ikhabaan. I'di tahe wihi iche 'doonto a sartiche ichoow rubeyticheti iche tuum Kamur ibihisso. I'daasenyi aranti disan wihi iche aw ikhabto, a fiddihi goobicheeda harrata ichoow makhaabalicheki iche kahamaadisso.
[35] Waha an atin idowo jeenteti an atin ijeycho menye, a iroonotiinna, 'dee fiddihi mujjume jirtaane, tuum Kamur isibihissaan.
[36] I'daasenyi chirri etoo galtaanti us alkume kol us mujjum iwoywoyin koogyahe, iche la geeddi lakadiso eleesse, wihi imale a yeelo, uskeel us yeele mele. A isdisteen on.
[37] I'daasenyi chirri et goorat masse, uuriis ka la gooche galtaam ma disdi yidahye ulla isjeyin yabuu'de, i'daasenyi etoo ikaholin, a haaggiche chu'us mindischo laan fiddiye laka.
[38] Maantaka eti min diste a haaggiche, i'daasenyi ki min idisan jiti weyti deefo tabe.
[39] Makhaabale geeddi makhaabaliche on jiro, makhaabaliche ma katabto. I'daasenyi chirri makhaabaliche buje, chi'iche 'doonto a geeddi eti iche 'doonto disti. I'daasenyi eta ki Kamur rummeeste on a eheetti.
[40] Ani ka chi' liidisine iche saggaas ifiddiito, iche weyti hamaadda. Ani ka an mali Rubeyti Waakhe khaba.