[1] An toolla wori gololi iyookkoyyohi waakkhakh lakayeessi liisoorriyooche miinsane kaayyeeda. Inno tuumman wihi wahaas miinsan a garanna. Kharateen rannyaate inno buuhissa, i'daasenyi 'dooninti inno is'doonno 'doo'di addan a miigoossa.
[2] Chirri etoo kol us walah tuum garti iskoog, garanti rummaate usu laka'doono, a kaankhantahe.
[3] I'daasenyi eti Waakh 'doono, Waakh usu a garta.
[4] Maantaka ayta gololi iyookkoyyohi waakkhakh lakayeessi liisoorriyooche layaham ka, saggi iyookkoyyoha harrata ka Waakh ieheynan a garanna. Saggi Waakkhi rummaate jiro la koo kalday on iyahe a garanna.
[5] A mehe 'doo'd gaasoo mehe essa ya waakkhassi ittaawe ichoow kamurreti ittaawenye 'doo'd wahti a jiraan. I'daasenyi waakkhassa beenaat harrata ommos serey kijireeneey ka ba,
[6] inno ka Waakkhoo kalday on jira, ulla a Aabbaheenna. Walah tuumman usu kayimaateene, inno la usu ijirra. Toro la Kamuroo kalday on jira, ulla a Yeesso Kiriisto. Usu on ka Waakh walah tuumman soouume, inno la usu on ka jiro 'helle.
[7] I'daasenyi 'doo'd tuumman mee runta garti. 'Doo'd gaasoo iyookkoyyoha a bare. Chi'icho gololi iyookkoyyoha liisoorriyooche yamhiin ka, jeenteti rubeyohichoki haag ichoow suujoon seley saaho 'dabakh iyahiin u, rubeyohichokaas bi'dirroochaan.
[8] I'daasenyi golol koloo kalday laka Waakh ma inno idowwaacho. Chirri inno iumhan walah inno waayno mele, chirri inno nuhum laka walah inno 'hello ba mele.
[9] I'daasenyi atinhi wihi atin tamhiin seley bihin tabuu'diin, yuubsada gi'de 'doo'di 'dabakhe daakki tarraantarricho iitaahana.
[10] Iyookkoka eemba etoo rubeytiisti haag ichoow suujoon seley saahto 'dabakh tahe atihi waha dakkhan garatti, gololi iyookkoyyo liibahche minki iyookkoyyo lakawahti ka taham kiagar? Eta a faajjiya 'dee ullaka gololi iyookkoyyohi waakkhakh lakayeessi liisoorriyooche yaham menya?
[11] 'Deerka eta 'dabakhenye Kiriisto rummeeste Kiriisto usu iyumuy wihi at garatti ka a baabiisse gon.
[12] Chirra at i'da ka etaahki Kiriisto rummeeste uskeel iyeesso, toro rubeyohichoki haag ichoow suujoon seley saaho 'dabakhe gaameerto, at Kiriisto uskeel iyeessa.
[13] Maantaka chirri gololi an aham eteeykoo Kiriisto rummeeste uskeel kalug'do, an yombuu toro jid ma aham uus an etaas koo Kiriistee kufinne.