[1] 'Deerka ilbooyye Kiriisto ichoow 'doo'di Waakh hili maliiski dagsan enenyet liicheeko dahanohicho soogesse nah iekkaacha.
[2] Ilbooyi walah dahanohiis lagesse, usuhi saggi us eti rumanka lakakhuufo iyahe tuso iche la'doona.
[3] Toolla atin ommos 'doo'di addane usu wihi an haaggicho tuumman mujjum yahiin ichoow usuhuus fiiricho ani ka a walahba. Ani rubeyteey laka saggaas ma isifiiricho.
[4] I'di tahe rubeyteey walah suujenye iche ikacheekatti mele, i'daasenyi wahaas saggi an uskeel iyeelin ma tusaan. Kamur rubeytiissa ihukkuma.
[5] Maantaka geeddi saha'ddi mujjume iitaahan uurassiin ka enenyet ahukkumina. Ibeenki Kamur soonokhti suga. Ulla wihi dagsane mug'di goya kijiro tuummane banay goya isoobahcha. Wihi weeli enenyet uuriis ka 'doono laka a soobahcha. Waakh la ebba koolohi imale a siicha.
[6] 'Doo'd Kiriistokaaw jeenteti iroonotiinna wahanyeyyoha ka iyookkoteey ichoow too Aboollo ikhaate. I'dane yeele 'dee wihi yeeda essi nah kaabattaan, “Wihi Chiirnaanneti Waakh goya kachiiran akutin.” I'da ka la weynaantoo ma keeylajjaane, too la ma 'darraawtaan gon.
[7] Ayyo 'doo'di etoo addan kadeefo atin kayeele? Mehe khabtaane, Waakh atin isiin? Chirri atin lasiiche la, a i'doh i'di etoo i'helin u, ieylajjaan?
[8] Kol atin daragteene kogtahiin. Kol atin kamurrowteene koogtahiin. Chirri nah kamurre ieheynan laka, kol atin kola kamurre titaaheene koogtahiin. Incheenka kootte karnatte tateehiine, 'dee inno tuumman walah isleedakhanna.
[9] I'di tahe ani ka, Waakh nahiiyye ergaanee 'dowe nah isoobahche, inti weyti 'duboot nah gesse. Nah a i'di 'doo'di herti Waakh ichoow 'doo'di harrata tuumman 'dey'doochaayi, omoot liiwoyo.
[10] Jeente Kiriistuu nah 'dalamme nah lakoogyahe, i'daasenyi jeenteti atin ichoow Kiriisto wohoo kalday itahiin u, kharayyo atin lakoogyahe. Nah a 'da'ddarannahe, i'daasenyi atin a mimmiig, nah a nah la'darraawa, atin la a atin liinkaanyita.
[11] Ichoowka uliba laka, nah raarah on khabna, sugub laka khabna toro la gaaddi raagte sar kakhabna. A nah lajahe, minki nah igello laka ma khabno.
[12] Dahanohaanya hol isikadowna. Chirri 'doo'd nah falo laka, nah 'doo'daas a iweysanna. Chirri sina nah loomhicho laka, a garrahsanna on.
[13] Chirri etoo nah hanti laka nah afi haaggan on ikalaabna. Ichoowka uliba laka, 'doo'di harrata duksahe nah iekkaacha, nah atte ka a u'du on.
[14] An khadaaba an soochiire ka, lakhaanyoti an atin kadowo menye, i'di nyaakhuteeyki an weyti 'doonuu, a atin tootoocha.
[15] A mehe cha'atin 'doo'di ittaawenye wor Kiriisto atin abcho khabtaan laka, ooyohiin a ani on. I'di tahe jeenteti inno ichoow Yeesso Kiriisto ba wohoo kalday inahuu, a i'doo an imbaabahiin ahe, Wori Haaggane an atin icheeke ka.
[16] Maantaka a atin hawwaasda, taba dabateey sooraaha.
[17] Jeentetane an Timootihi weeleeyenye an weyti 'doono atin ikasooerge. Usu a koo Kamure, toro weyti lakakhuufa. Timooti saggi an sohoteey ka Yeesso Kiriisto iraaho a atin kasoo'helcha. Wahaas ichoow wihi an urur Kiriisto meelal tuumman ka abcho a wohoo kalday.
[18] Gaasiinkoo a eylaja, i'doo an goytiin iimaatan u.
[19] I'daasenyi afi Kamur ka dowwanoha ka a atin soo'daara. Cha'an imiy la 'doo'da eylajo wihi icho essaan kalday on menye, icho wihi Waakh miinsan ka miig khabo ichoow ichohuus a abda.
[20] I'di tahe dakhi Waakh yeed on menye, a miigti Rubeyti Munyee.
[21] Wihi atin 'doontaan isigoocha. Maanti an amiit anihi sirbi sookhaaddi ommos anihi amiite 'doonin ichoow uuri samacchaare ka atin leeyyeedo 'doontaan?