[1] Chirri etiinkoo etoo addane Kiriisto rummeeste iswaayeen, ma uryaawtaan a cha'atin holaas 'doo'd Kiriisto menye kootiinhi 'doo'di Waakh igaran igeessaane lahukkumo?
[2] Saggi 'doo'di Waakh berri 'doo'di harrata ihukkumo ma garattaan a? Cha'atin 'doo'di harrata berri hukkuntaan, wahaar rurrucchule goytiin kasoobabbaho ma tabuu'diin a?
[3] Saggi berri inno herti Waakh laka ihukkunno ma garattaan a? Geeddoo meheenye wahanyeyyohaar rurrucchule jirota miinsan igoossaan?
[4] Chi' wihi i'dee goytiin kasoobaheen a i'dohe toro kootiinhi 'doo'di urur Kiriisto ka i'daaru laka liinkaanyitin ikageessaan?
[5] An i'dane elda 'dee lakhaanyo atin kadowa. Rumanka goytiin ka etoo kaldaye khareenye 'doo'di Kiriisto rummeeste goyaka yeedi i'daase goocho ma jiro?
[6] I'daasenyi wahaas ma yeessaane, etoo Kiriisto rummeeste iche koo addan kootiin geecha lahukkuma, toro la 'doo'di Kiriisto irummeysan igeecha.
[7] Atinhi kootiin irattaan waha mehe tusaan ya, atinhi urur Kiriistee, wihi Waakh atin ka'doono raahin a agaafatteen. Atinhi atin liikhufo menya deefto? Atinhi etoo atin ekkeesti menya deefto?
[8] I'daasenyi atin rubeytiinna 'doo'di Kiriisto rummeeste ekkeysattaane toro ikhuftaan.
[9] Saggi eti uskeel leh dakhi Waakh igelin ma garattaan a? Iisekkeysanna 'doo'di isidisanne isleeur'do ichoow ki iyookkoyyohi waakkhakh lakayeessi wahti ichoow eti makhaabassi tiis ieheynan leeur'do ommos mejeli mejel leeur'do,
[10] ommos eti hatto leh ommos ki 'damaame ommos eti meleefee ommos eti enenyet hanti ommos eti enenyet kakharaawo tuumman koo kaldaye dakhi Waakh gelo laka ma jiro.
[11] Gaasiinkoo orey jiroti i'daasenye jire. I'daasenyi toolla Waakh uskeeliin a dikhe, atin munyaache. Toro la 'doo'di fiffissan atin iekkaache. Waha dakkhan a jeenteti wihi Yeesso Kiriistohi Kamure ichoow Rubeyti Waakkheen atin iyeeleen.
[12] Mehe leessa ya, “Wihi an yeelin 'doono walah ikajeycho mele.” I'daasenyi walah tuumman mee atin iroon. Toro la “Wihi an yeelin 'doono walah ikajeycho mele,” iche leessa. I'daasenyi walah idakhti mele.
[13] Mehe leessa ya, “Golol uure liiyeele, uur la golole liiyeele.” I'daasenyi Waakh lammacho ba a baabiicha. Toro la sarti enenyet soho'ddarri mee liiyeele, i'daasenyi hili Waakhe liiyeele. Kamur la usu sarteen lagta.
[14] Waakh la sarteen laka omoot a kasookahcha saggi goorat us miigtiis ka Kamureen omoot ikasookahchuu.
[15] Atin saggi sartiin miili sar Kiriisto itahe ma garattaan a? An sar Kiriisto a khaata ichoow sarti malaaya ba too kalday kayeela? Waakh meesseen bujiiy!
[16] Atin saggi eti malaaya leeur'de usu ichoow malaayataas ba wohoo kalday iyateehiin ma garattaan a? A mehe saggi Chiirnaanneti Waakh liikachiiruu, “Lammacho ba sartoo kaldaye yateehiin.”
[17] I'daasenyi eti tuummane usu ichoow Kamur ba wohoo kalday yateeh, usu ichoow Kamur ba rubey ka a koo kalday.
[18] Taba, soho'ddarri kafirda. Uskeeli addane enenyet yeelo tuumman, koo sar uskulaacho mele. I'daasenyi eti soho'ddarri kaassohti sartiissa uskulaacha.
[19] Atin saggi sartiin i'di minki Rubeyti Munyeenye Waakh atin siiche goya fiddiito itahe ma garattaan a? Atin kiin menye, atin a ki Waakh alah.
[20] A mehe Waakh wihi buurenye gute atin gatte. Maantaka ebba sartiis ka Waakh a inkaanyito.