[1] 'Doo'd Kiriistokaaw, maanti an atin iimiyye an runti dagsane Waakh miinsan atin icheeke, an yeedassi burbuure ommos jiti khara ka ma atin leeyyeedin.
[2] I'di tahe wihi an gooche, geeddi an atin leejiro, wor Yeesso Kiriisto ichoow saggi massalaaba liikakaahe on menye, wohoo addan garan ma 'doonin.
[3] Maanti an atin iimiy an a 'darneete toro la weyti hamar kaseehe jeenteti an roorro ikhabuu.
[4] Farniinkeeyki Kiriisto miinsan ichoow Yeedi Waakhe an atin icheeke ka, an mali khara mee atin ikacheeke. I'daasenyi miigti Rubeyti Munyee ka, wihi an eldi saggi icho rum iyahiin a atin latuse,
[5] 'dee kakhuufnaanki atin Waakh kakhuuftaan kharati weeli enenyet menye, miigti Waakh kayamiit.
[6] Chi' nah 'doo'di Kiriisto goyaka ii'dowe leeyyeeno, wori khara kaleeyyeena. I'daasenyi waha kharati 'doo'di harrata menye ommos ti weynaanti harratane dowwa on baabaato mee.
[7] Kharati nah kaayyeeno la a ti Waakhe dagsan. Waakh la kharataas a dagche. Kharata la a ti Waakh geeddi us walah isoouumin gooche, 'dee wihi haaggan tuumman 'hella.
[8] Weynaanti harrata kichekoo kalday laka kharata inno kaayyeeno ma aban. I'di tahe chi' goorat icho abteen, Kamureenki weynaan tuumman leh massalaaba ma kakaahaan gon.
[9] I'daasenyi i'di liichiiruu, “Wihiiyye ile injire iargin wihiiyye nabahe injire idaagin toro la wihiiyye mali weeli enenyet injire ikamurin iche Waakh 'doo'di usu 'doono itannabiche.”
[10] I'daasenyi waha a wihi Waakh Rubeyti Munyee ka nah isoobabbakkaahiche. I'di tahe Rubeyti Munyee walah tuumman a fiirissa. Mali Waakhe dagsan laka a fiirissa.
[11] A mehe rubeyti weeli enenyet goytiis kijirto on menye, et mali etaas massi garti mele. Saggaasu la Rubeyti Waakh on menye, et mali Waakh massi garti mele.
[12] Inno rubeyti 'doo'di wahanyeyyohi harratane sussuuje raaho ma 'heline, Rubeyti Waakh katamiite 'helle, 'dee wihi Waakh i'daanu inno siiche abanna.
[13] Nah la wahaase cheekna, yeedassi kharati weeli enenyet kayimiy ka menye, yeedassi Rubeyti Munyee nah abisso iche kacheekna. Nah laka yeedassa ka, runti Rubeyti Munyee katamiite Rubeyti Munyee soobabbakkaahisso iche enenyet abinna.
[14] Eti tuummane Rubeyti Waakh ikhabin, wihi Rubeyti Waakh kayimiy ma khaatti, a mehe usu ka waha a 'dalammoon on. Toro wahanyeyyoha aban ma yabuu'd a mehe Rubeyti Munyeenye gargaarto ma khabo gon.
[15] Eti Rubeyti Munyee woyto walah tuumman icho haaggan ommos icho suuje a goocha. I'daasenyi eta etoo addan wahaas ma igoocho.
[16] “A mehe ayyo mali Kamur garta? Ayyo Kamur wihi us yeelo icheeka?” I'daasenyi inno mali Kiriisto khabo iche khabna.