[1] Saggi an dabat Kiriisto iraahuu, atin laka dabateey sooraaha.
[2] An weyti atin koolicha i'di tahe walah tuumman ka a ikasoo'hessaane toro la hugunki goorat an 'hele toro an atin isookucche, mujjume khucchissaan.
[3] I'daasenyi wohoo an atin abin 'doono a jiraan. Kiriisto usu matakki makhaaballe tuummane. Makhaabal la usu matakki makhaabassiisenye, Waakh la usu matah Kiriistee.
[4] Eti mejelenye urur Kiriisto goyaka weesti ommos wori Waakh kaayyeedo matakkiis la ogooganyahe, matakkiissa lakhaanyo kadowa.
[5] Toro la, deyyeho chi'iche urur Kiriisto goyaka weysatti ommos wori Waakh kaayyeeddo matah la iogoogan, matakkicheeda lakhaanyo kadowta. Iche ichoow aranti matah lahaa'de lakhaanyo iskadowte i'da ka yeerar mee.
[6] Deyyeho chi'iche matah iogoogan a geeddi iche matah haa'datti on gon. I'daasenyi deyyeho chi' matakki lahaatti lakhaanyo leeyahe la, matakkiche wohoo a korsatti gi'de.
[7] Aram walah us matah korsati mele. I'di tahe usu iyookkoti Waakhe lakasoouume, toro la weynaanti Waakhe tusa. I'daasenyi arame weynaanti arankicheeda tussa.
[8] I'di tahe áram mee arám kayimiy, i'daasenyi arámé áram katimiy.
[9] Toro la Waakh áram jeenteti arameet mee isoouume, us arámé jeenteti aram isoouume.
[10] Jeentetaas ichoow jeenteti herti Waakh u, a haaggantahe chirri arame wohoo antohi makhaabaliche tuso matakkiche kakhabto.
[11] I'daasenyi innohi 'doo'di Kamure ka la, deyyeho mejel laan walah iche yeesso mele, mejel la deyyeho laan walah us yeelo mele.
[12] I'di tahe saggi deyyeho mejel ikasooummantuu, saggaase mejel laka deyyeho idessa. I'daasenyi walah tuumman Waakh on kayamiitiin.
[13] Bal waha isigoocha, a haaggantahe chirri deyyeho urur Kiriisto goyaka Waakh soowahto, wohoo la matah ikorsan?
[14] Weeli enenyet tuumman goyaka, chirri eti mejele tinti derdeer khabo lakhaanyo ma iskadowo?
[15] I'daasenyi chi' deyyeho tinti deddeer khabto, a inkaanyiticheeda. I'di tahe tinticheti deddeer a lasiiche, 'dee matakkiche koogoogta.
[16] Chirri etoo ayta iriir gelin 'doono la, wihi an iadeeh a mehe ya, inno eheetteey ommos ururi Waakh eheetteey ka ba, et hugunkoo addane yeere weysiit khabo mele.
[17] Waansiha toolla an atin isoocheeko ka, walah an atin kakoolicho mele. I'di tahe chirri atin kulantaan, haag menye, wihi suuje on soobaha.
[18] Wihi kolooraat, chirri atin i'di urur Kiriistuu kulantaan, wihi an daage a mehe ya, atin seleye goggootaane an la yeedaas geeddoo ka a rummeesda.
[19] A mehe koobbinohaas goytiinna kijiraane, 'dee goytiin ka 'doo'di rumanka koo Kiriistee laarga.
[20] Chirri atin kulantaan, gololi Kamur mee tamhiin.
[21] I'di tahe chirri atin golossattaan, etiimba gololiissa on yahame ma issugtaan. Gaasoo ankaa khabaayi nokhta, gaasoo la meleefu yateeh.
[22] Goobassi atin kagolossattaane toro atin biccheyyo katabhuubiine laatahiin? Ommos ururi Waakhe 'darraawtaane toro 'doo'di miskiinenye lakhaanyo kadowin 'doontaan? Kamalda bal, mehe atin iidaahe? Wahaase atin kakoolicha? Koloo kalday ma atin kakoolicho!
[23] A mehe wihi an Kamur ka 'hele, toro la an atin isookuccho, a mehe ya gelebti Yeessohi Kamureene ladiibe, makaatetoo khaate,
[24] chirra us Waakh kala'd ilaabe ka, jejjebche, toro wihi us yidah, “Waha a sarteeyti atin liisoobahche, amha 'dee ikasoo'hela.”
[25] Saggaas on u, inkoo icho gololi gelebeet yumheen ka, kokkoob khaate, wihi us yidah, “Kooba a ayyinti husube Waakh enenyet diiggeey ka igoocho. I'da yeela, maambaaw atin dantaan ka ikasoo'hela.”
[26] I'di tahe maambaaw atin makaateta tamhiine, atin kooba tabhuubiin tuumman, atin toro enenyet saggi Kamureen iyumuyye icheektaane, ichoowka maanti us soonokhti.
[27] Maantaka eti tuummane jiti Waakh ortiis ikamalin ka makaateta yahame ommos kooba damo, etaas sar Kamureen ichoow diiggiissa uskeel igela.
[28] Ebba koloo geeddi us makaateta iumhane ommos kooba idamin, a isfiiricho.
[29] I'di tahe eti tuummane sarti Kamur ikasine makaateta yahame ommos kooba damo, etaas hukkunki Waakhe isikeena.
[30] Jeentetaase buurtiin i'da'ddarantahe, buurtiin la ikhakkhannantahe, gaasoo laka ituume.
[31] I'daasenyi chirri koloo inno isfiirinne, Waakh ma inno hukkumo gon.
[32] Chirra Kamur inno hukkumo a inno sookhuncha, uus 'dee i'di 'doo'di wahanyeyyohi harratane sussuuje raahuu uskeel inno liigoonne.
[33] Maantaka 'doo'd Kiriistokaaw, maanti atin kulantaane atin gololi Kamur tamhiin, issuga.
[34] Chirri etoo raarah khabo, goobiis ka a soogolossati. I'da yeela uus 'dee maanti atin isleegolossattaan atin lahukkumine. Wahanyeyyohi addan la maanti an amiite atin kawaanicha.