Apocalipsis 9
[1] Saypitanami pisqa kaq ángel cornëtata tukamuptin pasaman qoyllar shikwamuqta rikarqä. Say qoyllarmi chaskirqan supaykuna wichqaraykäyashqan wanwanyaykaq pasapa shiminpa llävinpa wawanta.
[2] Pasapa shiminta kichaskiptinmi jatun jornupita qoshtay yarqamuqnöraq qoshtay yarqamurqan. Say qoshtay intita sapaptinmi pasa sakakäkurqan.
[3] Say qoshtaypitanami kay pasaman juntaqpaq chukluskuna yarqayämurqan. Say chukluskunami alacranno seqaypa venënuyuq kayarqan.
[4] Paykunatami nirqan qewatapis ni jachatapis mana ushakäsiyänanpaq. Saypa trukanqa Tayta Diospa sëllunwan urkuncho mana señalaraq runakunalata nakasiyänanpaqmi nirqan.
[5] Saynöpis nirqan runakunata nakasirpis mana wanusiyänanpaqmi. Wanusiyänanpa trukanqa pisqa killa nanaywan nakasiyänalanpaqmi nirqan. Saymi alacrán picaptin nakashqannöraq nanaywan nakayarqan.
[6] Say wisan runakuna seqaypa nakar wanuyta munarpis manami imanöpapis wanuyanqasu. Wanuyta ashirpis manami tariyanqasu.
[7] Say chukluskuna kayarqan guërraman aywayänanpaq kamarish cawallukunanömi. Umancho qori corönan jatishnömi kayarqan. Qaqlanpis runapa qaqlanömi karqan.
[8] Aqsankunanami imayka warmipa aqsanno y kirunkunanami imayka leonpa kirunno karqan.
[9] Cuerpunkunaqa läta chalëcushnömi karqan. Pajayaptin riprankuna sapsapyashqanpis wiyakarqan carrëtan qarachash cawallukuna guërraman aywaqnöraqmi.
[10] Chupannami alacranpa chupanno awja punta karqan. Chupanwan chiwiptinmi runakuna pisqa killa qeshyar nakayarqan.
[11] Say chukluskunapa mandaqnin karqan wanwanyaykaq raqracho angilmi. Say angilpa jutinmi hebreo idiömacho Abadón y griego idiömacho Apolión.
[12] Say punta kaq nakay päsaskiptinpis ishkay nakaykunaraqmi chämunanpaq kaykan.
[13] Soqta kaq ángel cornëtata tukamuptinmi wiyarqä Tayta Diospa nawpancho kaykaq qori altarpa chuskun waqran chawpinpita parlamuqta.
[14] Saychömi say cornëta tukamuq angilta nirqan: “Éufrates mayu kuchuncho wataraykaq chusku angilkunata paskamuy”.
[15] Paskariykamuptinmi say chusku angilkuna mayu kuchunpita aywayarqan kay pasacho cäsi pulan runakunata wanusiyänanpaq. Say angilkuna puestukush kayarqan say höra, say junaq, say killa, say wata runakunata wanusiq yarquyänanpaqmi.
[16] Kayno niqtami wiyarqä: “¡Say angilkunawanmi ishkay pachak millón (200,000,000) soldädukuna cawallunkuna loqash aywaykäyan!”
[17] Soldädukunapa chalëcunkunami karqan ninano puka, zafiruno azul y azufrino qarwash. Cawallunkunapa umankunami karqan leonpa umanno. Shiminpitami yarqamurqan ninapis, qoshtaypis y azufripis. Saynömi soldädukunata y cawallunkunata revelacioncho rikarqä.
[18] Shiminpita yarqamuq azufri, nina y qoshtaymi kay pasacho cäsi pulan runakunata ushakäsirqan.
[19] Manami shiminpita yarqamuqkunalawansu runakunata cawallukuna wanusiyarqan, saypa trukanqa culebra niraq umayuq chupankunawanpis wachirmi wanusiyarqan.
[20] Sayno kaptinpis mana wanuq runakunaqa jusalikuyashqankunata manami wanakuyarqansu. Saypa trukanqa supaykunata y ïdulukunatami imaypis adorayarqan. Say ïdulukunaqa qoripita, qellaypita, broncipita, rumipita y qerupita rurash karmi rikayansu ni wiyayansu ni puriyansu.
[21] Saynöpis manami kachariyarqansu wanusikuq kayta, brüju kayta, fornicación jusata y suwakuytapis.