<Apocalipsis 1

[1] Kay libruchömi qelqaraykan Jesucristuta Tayta Dios revelashqan. Jesucristumi angilninta kachamur say revelacionta sirviqnin Juanta revelarqan. Sayno revelarmi sirviqninkunata imapis päsananpaqna kaqkunata tantiyasirqan.

[2] Juannami say revelacionta qelqar Tayta Dios nishqankunata, Jesucristo nishqankunata y lapan rikashqankunata qelqash.

[3] Kushishqami kayanqa kay qelqaraykaqkunata liyiqkuna y liyipashqanta wiyar cäsukuqkunaqa. Kay qelqaraykaqkuna cumplikänanpaqnami kaykan.

[4] Asia provinciacho kaykaq qanchis iglesiakunacho shuntakaq wawqi panikuna: Noqa Juanmi qamkunaman qelqaykämü. Unaypita kawaq, kananpis kaykaq y shamunanpaq kaykaq Tayta Dios y trönunpa nawpancho kaykaq qanchis espïritukunapis kuyapäyäshushpayki ali kawayänaykipaq yanapaykuyäläshunki.

[5] Jesucristupis ali kawayänaykipaq qamkunata yanapaykuyäläshunki. Paymi Tayta Dios munashqannöla wilakuyninta wilakush y wanushkunapita puntata kawarimush. Kay pasacho lapan reykunapitapis mas munayyuqmi kaykan. Paymi kuyamashpansi yawarninta jichar lapan jusansita maylamashkansi.

[6] Mandamaqninsi rey kashpanmi makincho kanansipaq shuntamashkansi. Saynöpis Papänin Tayta Diosta sirviq cürakuna kanansipaqmi churamashkansi. ¡Jesucristo imaypis alabash kaykuläsun! ¡Pay japalan mandamaqninsi kaykuläsun! Amén.

[7] ¡Pukutay jananchömi Jesucristo kutimunqa! Kutimuqtami lapan runakuna rikayanqa. Payta tuksir wanusiqkunapis rikayanqami. Kutimuqta rikarmi maysaychöpis runakuna waqayanqa. Saynömi kanqa. Amén.

[8] Unaypita kawaq, kananpis kaykaq y shamunanpaq kaykaq munayyuq Tayta Diosmi nin: “Alfa y Omegami noqa kaykä. [Qalaykunan y ushananmi kaykä]”.

[9] Noqaqa Jesucristuman yärakuq mayiki Juanmi kaykä. Qamkunanölami Jesucristo mandaykashqancho kaykä. Nakasiyäshushqaykinölami noqatapis Jesucristuman yärakushqäpita nakasiyäman. Qamkunanölami mana ajayaypa shuyakuykä paypa nawpanman chänäpaq. Tayta Diospa wilakuyninta wilakushqäpita y Jesucristo salvamaqninsi kashqanta wilakushqäpitami Patmos islacho prësu kaykä.

[10] Saycho kaykarmi domingu junaq Espíritu Santupa munaynincho kashpä wiyarqä cornëta tukamuqnöraq qepächo kayno nimuqta:

[11] “[Alfa y Omegami noqa kaykä. Qalaykunan y ushananmi kaykä.] Revelacioncho rikasishqäkunata juk rölluman qelqarkur apasiy [Asia provincia] qanchis markakunacho kaykaq iglesiakunaman. Say markakuna kaykäyan Éfeso, Esmirna, Pérgamo, Tiatira, Sardis, Filadelfia y Laodiceami”.

[12] Qepächo sayno parlamuqta wiyarmi tikrarqä pï kashqantapis rikanäpaq. Saychömi rikarqä qoripita rurash qanchis candelabrukuna sariraykäyaqta.

[13] Say candelabrukuna chawpinchömi rikarqä runapa surin niraq kaykaqta. Paymi chaki puntanyaq mödanan jatish kaykarqan. Qasqunpami qoripita rurash wachkuwan wataraykarqan.

[14] Aqsanpis yuraq milwano y rashtano yuraqmi karqan. Nawinnami ninanöraq asikyarqan.

[15] Chakinkunapis waylash broncinöraqmi chipipirqan. Parlashqanpis aska yaku aywar qaparaqnöraqmi karuman wiyakarqan.

[16] Aluq kaq makinchömi qanchis qoyllarkunata sarararqan. Shiminpitanami ishkan lädunpa afilash espäda yarqamurqan. Qaqlanpis intinöraqmi chipipirqan.

[17] Payta rikaykurmi puntanman wanushno ishkiskirqä. Saymi aluq kaq makinwan yataykamar nimarqan: “Ama mansamaysu. Noqami qalaykunan y ushanan kaykä.

[18] Imayyaqpis kawaqmi kaykä. Imayyaqpis kawanäpaqmi wanusiyämashqanpita kawarimushkä. [Amén.] Noqami sararaykä wanushkunapa almankuna kaykäyashqan llävita.

[19] Lapan rikashqaykita qelqay. Kanan päsaykashqanta y päsananpaq kaqkunatapis lapanta qelqay.

[20] “Kananmi tantiyasishayki aluq kaq makïcho rikashqayki qanchis qoyllarkuna y qoripita qanchis candelabrukuna ima kashqantapis. Qanchis qoyllarkuna kaykäyan say qanchis iglesiakunapa angilninkunami. [Rikashqayki] qanchis candelabrukuna kaykäyan say qanchis markakunacho kaykaq iglesiakunami”.