<Apocalipsis 4

[1] Saypitanami jana pasacho punku kicharaykämuqta rikarqä. Say hörami nawpata wiyashqänöla cornëta waqamuqnöraq kayno nimaqta wiyarqä: “Kayman wisämuy. Kananmi rikasishayki ima päsananpaq kaqtapis”.

[2] Jinan hörami Espíritu Santu rikasimarqan jana pasacho kaykaq trönuta. Say trönuchömi juk jamaraykarqan.

[3] Jamaraykaqqa jaspe rumino y cornalina ruminöraqmi chipipiykarqan. Jamakunan trönu jananpami esmeralda ruminöraq chipipiykaq seqyaw ichiraykarqan.

[4] Say trönutami tumapararqan ishkay chunka chusku (24) trönukuna. Say trönukunamanmi yuraq mödanash y qori corönan jatish mayor runakuna jamakuyarqan.

[5] Chawpincho kaykaq trönupitami asikyaypa asikyar elqukuy yarqamurqan. Maqakuypis bunruruypa bunrururmi wiyakämurqan. Trönupa nawpanchömi qanchis candelabrukuna rataraykäyarqan. Saykuna kayarqan Tayta Diospa qanchis espïritunkunami.

[6] Trönu nawpanpanami kuyaylapaq cristal vidriunöraq lamar rikakarqan. Saynöpis trönu nawpankunapa tumaypami chusku kawaykaqkuna kaykäyarqan. Paykunapami intëru cuerpuncho nawinkuna karqan.

[7] Punta kaqmi karqan león niraq. Ishkay kaqnami karqan töru niraq. Kimsa kaqnami karqan runa niraq. Chusku kaqnami karqan pajaykaq anka niraq.

[8] Say chuskun kawaykaqkuna soqta riprayuqmi kayarqan. Saynöpis intëru cuerpunchömi nawinkuna karqan. Say kawaykaqkunami paqaspa junaqpapis niyarqan: “¡ Santu, santu, santu! ¡Lapanpaq munayyuq Tayta Dios santumi kaykan! ¡Payqa unaypita kawaq, kananpis kaykaq y shamunanpaq kaykaqmi kaykan!”

[9] Trönuncho jamaraykaq imayyaqpis kawaq Tayta Diosta sayno adorar agradëcikur alabayaptinmi

[10] say ishkay chunka chusku (24) mayor runakunapis imayyaqpis kawaq Tayta Diospa nawpanman lätakuykur adorayarqan. Corönankunata jorqur Tayta Diospa trönunpa nawpanman churaykuyashpanmi niyarqan:

[11] “Tayta Diosnilä, qamlami lapanpaq munayyuq kaykanki. Imatapis qammi kamashkanki. Kawayta qosh kaptikimi lapanpis kawaykäyan. Saymi lapanpis respitayäshushpayki alabayäshunki”.