Apocalipsis 13
[1] Saypitanami lamarpita anticristo yarqaykämuqta rikarqä. Payqa qanchis umayuq y chunka waqrayuqmi karqan. Cada waqranchömi corönata jatirarqan. Cada umankunachönami Tayta Diospa contran qelqararqan.
[2] Cuerpun karqan leopardupa niraqmi. Chakinkunami kayarqan ukumaryapa niraq. Y shiminnami karqan leonpa niraq. Paytami munayninta dragón qorqan lapanta mandananpaq.
[3] Anticristupa juk uman seqaypa shatush kaykaqtami rikarqä. Shatush kaykarpis wanunanpa trukan aliyarqanmi. Aliyaptinmi runakuna mansakäyashpan nishqankunata cäsukuyarqan.
[4] Anticristuta munayninta qoshqanpitami dragonta runakuna adorayarqan. Saynölami anticristutapis adorar niyarqan: “¡Payno munayyuqqa manami pipis kansu! ¡Manami pipis payta vinciyta kamäpakunsu!”
[5] Anticristutami Tayta Dios kachaparirqan yachaq tukur paypa contran rimananpaq. Saynöpis munayninta qorqan chusku chunka ishkay (42) killa munashqanno imatapis rurananpaqmi.
[6] Saymi anticristuqa Tayta Diospa contran, jana pasacho kaykaq templupa contran y jana pasacho kaykaqkunapa contran imaykatapis nirqan.
[7] Saynöpis anticristuta Tayta Dios kachaparirqan payman yärakuqkunata atacar vincinanpaqmi. Saymi munaynincho sarararqan maysay trïbu runakunatapis, maysay marka runakunatapis, ima idiömata parlaq runakunatapis y maysay nación runakunatapis.
[8] Lapan runakunami anticristuta adorayarqan. Say adoraq runakunapa jutinkunaqa Libru de la Vïdacho manami qelqararqansu. Say libruqa wanusiyashqan Carnishpa librunmi kaykan. Say libruta Tayta Dios qelqarqan kay pasata kamashqan wisanmi.
[9] Rinriyuq kaqkunaqa nishqäkunata wiyakuyäsun.
[10] Carcilcho wichqaraqpaq kaqkunaqa carcilchömi wichqaräyanqa. Wanusish kayänanpaq kaqkunaqa wanusishqami kayanqa. Sayno päsaptinpis Diosman yärakuqkunaqa pacienciakuyäsun. Imano nakarpis payman yärakuyäsun.
[11] Nirkurnami rikarqä anticristupa profëtan pasa rurinpita yarqaykämuqta. Pay karqan carnishpa waqranno waqrashqami. Isanqa dragonnömi parlarqan.
[12] Anticristunömi munayyuq karqan. Paymi lapan runakunata nirqan anticristuta adorayänanpaq. Anticristuqa uman shatush kashqanpita aliyashnami kaykarqan.
[13] Saynöpis anticristupa profëtan milagrukunatami rurarqan. Runakuna rikaykäyaptinmi jana pasapita ninatapis shikwasimurqan.
[14] Anticristupa nawpancho milagrukunata rurarmi runakunata engañarqan. Nirkurnami runakunata mandarqan ïduluta rurayänanpaq. Say ïdulu karqan uman shatush kashqanpita aliyash anticristo niraqmi.
[15] Anticristupa profëtanqa munayyuq karmi ïduluta kawayta qorqan. Saymi say ïdulu parlar payta mana adoraq kaqkunata wanusiyänanpaq nirqan.
[16] Saynöpis anticristuqa yachaq runata y mana yachaq runatapis, rïcu runata y muchuq runatapis, ashmaykunata y mana ashmaykunatapis lapantami aluq kaq makincho o urkuncho karpis señalasirqan.
[17] Say señal karqan anticristupa jutinpa nümerunmi. Señaläni kaq runakuna manami rantipakuyta ni rantikuyta kamäpakuyarqansu.
[18] Anticristupa ima nümerun kashqantapis shumaq tantiyakuyay. Say nümerunqa kaykan soqta pachak soqta chunka soqtami (666). Runapa jutinmi say nümeru kaykan. Pipis yachaq kaqqa tantiyakusun pï runapa jutin say nümeru kashqantapis.