<Apocalipsis 22

[1] Saypitanami ángel rikasimarqan imayyaqpis kawasikuq y kuyaylapaq cristal vidriuno chipipiykaq [chuya] mayuta. Say mayu yarqaykämurqan Tayta Dios y Jesucristo jamaraykashqan trönun chakinpitami.

[2] Jatun kaq cälli chawpinpami say mayu aywaykarqan. Mayupa kuchunkunachömi imayyaqpis kawasikuq jachakuna ichiraykäyarqan. Say jachakunami cada killa wayuq. Raprankunanami lapan nación runakunapaq jampi karqan.

[3] Kay pasata Tayta Dios maldicionash karpis say markataqa mananami maldicionanqanasu. Saychöqa Tayta Diospa y Carnishpa trönunmi kaykanqa. Sirviqninkunanami Diosta adorayanqa.

[4] Saychömi Tayta Diospa qaqlanta rikayanqa. Urkunkunachömi Tayta Diospa jutinpis qelqaranqa.

[5] Say markachöqa pasapis mananami sakanqanasu. Chipipiyninwan Tayta Dios asikyapaptinmi intitapis ni ima aksitapis nistäyanqanasu. Say runakunami imayyaqpis mandayanqa.

[6] Saymi ángel nimarqan: “Profëtakunata tantiyasiq Tayta Diosmi imapis päsananpaq kaqkunata sirviqninkunata wilanäpaq kachamash. Kay wilakushqäkuna rasun kaqlami kaykan”.

[7] Saynöpis Jesucristo nin: “Shamunäpaqnami kaykä. Kushishqami kawayanqa kay librucho qelqaraykaqta cäsukuqkunaqa”.

[8] Noqa Juanmi saykunata wiyashkä y rikashkä. Saymi lapanta rikasimaq angilpa puntanman adoranäpaq lätakuykurqä.

[9] Saymi nimarqan: “¡Noqata ama adoramaysu! Noqapis profëta mayikikunanöla y qelqashqaykikunata chaskikuqkunanölami Tayta Diospa sirviqnin kaykä. Tayta Dioslata adorayqa”.

[10] Mastapis nimarqan: “Lapanpis cumplinanpaqna kaykaptinqa revelacioncho rikashqaykikunata ama pakaräsinkisu, sinöqa libruman qelqarkur runakunaman apasiy.

[11] Mana alita ruraqkuna jina mana alita rurar kawakuyäsun. Jusalikuqkunaqa jina jusalikur kawakuyäsun. Ali runakunaqa alita rurar kawakuyäsun. Tayta Dios munashqanno santu kawaqkunaqa pay munashqanno santu kawakuyäsun”.

[12] Jesucristumi nin: “Shamunäpaqnami kaykä. Shamurmi runakuna kawayashqanman tupu juzgar premiuta qoshaq o castigashaqpis.

[13] Alfa y Omegami noqa kaykä. Qalaykunan y ushananmi kaykä.

[14] “Kushishqami kayanqa mushuq Jerusalénman yaykuyänanpaq y imayyaqpis kawasikuq jachapa wayuyninta mikuyänanpaq mödanankunata taqshakuqkuna.

[15] Say markaman manami yaykuyanqasu luta kawakuqkuna, brüjukuna, fornicación jusata jusalikuqkuna, runa mayinta wanusiqkuna, ïdulukunata adoraqkuna y lapan lulakuqkunapis.

[16] “Noqa Jesúsmi yärakamaqkunaman angilnïta kachamushkä imapis päsananpaq kaqkunata musyasinäpaq. Noqa Davidpita miraqmi y Waraq Qoyllarmi kaykä”.

[17] Santu Espïritupis y Jesucristuwan majasakänanpaq jipashpis “¡jukla shamuyna, Taytay!” nikäyanmi. Kay librucho qelqaraykaqkunata wiyaqkunapis “shakamuyna, Taytay” niyäsun. Yakunaqkunaqa shayämusun. Imayyaqpis kawasikuq yakuta dembaldila upuyäsun.

[18] Kay librucho qelqaraykaqta wiyaqkunatami albirtï: Mayqanpis kay qelqaraykaqkunaman yarpayninkunata yapaq kaqtaqa Tayta Dios fiyupami castiganqa. Kay librucho qelqarashqannömi say runakuna nakayanqa.

[19] Kay librucho qelqaraykaqpita juk yachasikuylatapis jorquyaptinqa Tayta Dios manami kachapanqasu imayyaqpis kawasikuq jachapa wayuyninta mikuyänanpaq. Saynöpis mushuq sagrädu Jerusalén markaman manami yaykuyanqasu ni kay librucho qelqaraykaq bendicionkunatapis manami chaskiyanqasu.

[20] Kay libruta qelqanäpaq tantiyasimaqmi nin: “Shamunäpaqnami kaykä”. “¡Amén! ¡Shakamuy, Señor Jesús!”

[21] Señor Jesucristo lapaykita imaypis yanapaykuyäläshunki. [Amén.]